حجيت لخالة اخلاص ولاول مرة بقت ساكتة متعرف شتكول شبيح خالة...
ها ماكو شي شهد هذا يحبج بخبال لو تحاولين تتقبلي لو تعوفي...
بقيت افكر ما اعرف شسوي تعشيت وياهم ورجعت للبيت شفتهم راجعين كعدت سولفت وياهم وسالت شكال الدكتور على جدو...
الحمد لله كلشي زين بس شوية الضغط...
الحمد لله ماما اريد اكلج شي...
احجي شبيج....
ماما والله ضايجة والبنات صديقاتي رح يطلعون يتغدون بالمطعم باجر ميخالف اروح وياهم....
ليش ميجون يمج واني اسويلكم احلى غدة...
ماما ضايجين يريدون يغيرون جو حبابة الله يخليج...
شلون تروحون..
ميس كالت اذا تجين احمد السايق يودينة واذا ما اروح تروح وياهم....
ما ادري افكر...
ماما مو ميس تنتظر خبر مني حتى تخابر احمد قبل ميتاخر الوقت...
تروحون وترجعون بسرعة متتاخرون...
ان شاءالله ان شاءالله بستها شكرا حبيبتي بس اريد فلوس هم
ميخالف شكد تلحين...
رحت عالسريع خابرت ميس وحجيتلها وقبلت بقى بس اكول لاسامة حتى يرهمها....
صعدت نمت واني الفرحة بگلبي باجر اشوف المخبل مالتي... يا ربي اني ليش هيج احبه شكد مياذيني ولا حتى اكدر اضوج من عندة....
ثاني يوم الصبح كعدت نظفت البيت بعدين سبحت وحضرت روحي وكعدت انتظر اسامة يخابرني شوية ورن التلفون ركضت عليه الو...
مرحبا شهد اني اسامة تكدرين تحجين لو اخابر بغير وقت...
هلو اسامة بس لحظة... اخذت التلفون للصالة ورديت الباب الو هلو اسامة...
هلو شهد خير ردتيني اخابرج أن شاءالله ماكو شي.
لا لا ماكو شي محتاجتك بخدمة بس بيني وبينك لتكول لخالد...
ان شاءالله ادللي بالخدمة.
تسلم مشكور... اليوم اريدك تحجزلنة بصاج الريف على غدة وتاخذ خالد بحدود الاربعة العصر واني انتظركم هناك بس الله يخليك ما اريده يعرف
بسيطة يمعودة هبطيني عبالي اكو شي صاير بس انت تعرفيه هذا مخبل اذا ما قبل شلون...
ما اعرف شلون بس اقنعة حتى لو غصبن عليه..
ان شاءالله خير بعد تامرين بشي...
لا سلامتك...
شهد سؤال بس شلون رح ترحين....
يعني اذا مو خالد يحاسبني انت تحاسب لتخاف احمد السايق يوصلني وخالد يرجعني اعرف ميقبل ارجع وحدي او احمد السايق يرجعني....
خوش حجي ان شاءالله بالاربعة خالد يمج....
شهد البارحة كالت تريدني ضليت الليل كلة شايل هم ما اعرف شتريد وهذا خالد بقى يلح شرادت منك كتلة بس وصتني عليك... المهم عالسريع خابرت عالمطعم حجزت وجيبوا اليقنعه يطلع... طبعا صار يومين هو فوك بغرفتة مينزل كلشي يصعدلة ليفوك صعدت عليه غطة راسة ويصيح اريد انام خالد لتسوي نفسك نايم اليوم نروح نتغدة برة كافي مثل النسوان بس تولول كوم شبيك شهد تحبك يوم يومين وترجع... رفع الغطة من راسة...
بس ترجع اتغير واذبح طلي والله...
هههههه لك انت صدك هيج تحبها يلة كوم اسبح ووزين نروح نتغدة برة ...
اسامة لخاطر الله متعوفني بيا حال اني يكول نتغدة برة
كوم لتخليني اسويلك سالفة.. المهم بالكوة سبح وما قبل يزين ولا يبدل يريد يروح بالشورت وتيشرت يمعود عدل بدل ماكو ميقبل بالكوة قنع يبدل هالمرة لبس دشداشة وشماغ حاولت وعالجت كال ما اروح بطلت اضطريت اخذه هيج وصلنة للمطعم اني حجزت الطابق الثاني وهو يريد يكعد بالاول المهم قنعته يصعد فوك كتلة اوصي اكل واجي وراك.....
