رجعت للبيت الطريق كلة افكر بشكل خالد شكد يعجبني هيج شخص ثكيل ومحترم اووو لازم اشيلة من بالي وصلت للبيت بدلت وكعدت يم جدو متعودة اسولفة كلشي ماما جانت بالمطبخ تشتغل...
جدو شبيها ماما؟؟؟....
ماكو شي عمامج خابروا اليوم وسالوا عليج....
بعد وقت شيريدون مني لو اخر يوم بعمري ما اروح يمهم هذولة الحرامية.....
عيب بابا مهما يكون هذولة عمامج.....
جدو يا عمام مو نفسهم زوروا اوراق الورث حتى مينطوني ورث بابا.....
حبيبتي انت مو بعوزتهم هم والله يتجازون...
الله كريم اروح يم ماما خطية هم اساعدها وهم اطمنها...
رحت للمطبخ شفت ماما تشتغل وتبجي.. ماما شبيج حبيبتي مسحت دموعها عالسريع...
ماكو شي شلونها الحفلة اليوم؟؟....
الحفلة حلوة وانت احلى واطيب واغلى ماما بالدنيا وداعة عيونج الحلوات لآخر يوم بعمري ما اعوفج واروح يمهم اريد بوسة من هالخدود الحلوة.... شنسوي عشة جوعانة....
جدو يريد كبة حلب.....
يلة كبة حلب.... تعشيت وكعدت سولفت بعدين صعدت لغرفتي شغلت اغاني احب اسمع اليسا حضرت غراضي للدوام اول ما خليت راسي عالمخدة واريد انام صارت صورة خالد براسي يا ربي هذا الشخص لازم اشيلة من راسي لا هو من ثوبي ولا اني من ثوبة....
بقينة ننتظرهم يصعدون بالسيارة سلمت على مصطفى وطلعنة اني واسامة رحنة للمنصور جانت عندي شغلة كضيتها عالسريع ورجعت للبيت بالطريق نسولف اسامة شفت هاي البنية اليوم؟؟؟؟....
شهد؟ شبيها؟؟....
اي شهد شنو رأيك بيها؟؟؟؟
خالد عوف البنية هاي مو مثل باقي البنات مبينة بنية محترمة ومؤدبة. .
هي هاي المشكلة من اول يوم داومت واني عيني عليها ومراقبها....
اي منتبه عليك بس هاي وحدة وياك متكولي على شي بالك....
ما اعرف اسامة هاي دوختني....
لو تتغير لو تعوفها احسن الك والها....
ضليت ساكت وصافن بحجي اسامة وصلت للبيت سبحت واكلت وصعدت اريد انام متعود صيف وشتة انام بس بالبجامة ما البس تيشرت وامي تحجي عليه المهم كعدت ساعة بثمانية تقريبا مثلج وارجف نزلت لكيت امي وابوية كاعدين بالمطبخ يسلفون نسيت اكلكم امي تصير بنت عمة ابوية ومتزوجين عن حب جدي جان معارض لان ابوها جان غريب مو من تكريت ديرتهم ابوية بوقتها كال لجدي لو انتصار لو ما اتزوج...
حجية برددان...
طبعا تنام بدون هدوم مليون مرة اكلك البس تيشرت خفيف احسن من الماكو تعال اكعد يم الصوبة هسة اسويلك شي دافي تشرب....
شلونة الحجي....
يا ول انت متبطل سوالفك شكبرك بعد تصير متعب امك طول الوكت....
ياب والله ما مسويلها شي ما اعرف انام والله، اسامة وينة.....
راح يجيب مسواك لاهلة...
اسامة من جان صغير ابو قتلوا بشغلة عشاير وهو الوحيد لامة كرابتنة من بعيد والدي تكفلة كمل كلية بغداد واشتغل وية الوالد بعدين من كبرت صار وياية والدي بنالهم بيت بالحديقة الجانبية هو وامة حتى يبقى قريب علينة....
بقيت بردان كاعد يم الصوبة وارجف رجع اسامة جابولي دوة ماكو فايدة نمت وغطوني هواية ونفس الشي تمرضت صارت عندي افلاونزا قوية والتهاب اللوزتين بقيت اسبوع بالفراش ما اكدر اكوم ولا حتى اكدر اداوم كلية اسامة اخذلي اجازة مرضية وانطة خبر لمصطفى...
داومت بالكلية عادي ماكو شي جديد بس خالد ماكو مرت يومين وهو ماكو بس نشوف مصطفى مرات يسلم علينة وميس تفرح....
بابا شبيج مفضوحة انت على كيفيج ميطير والله.....
لج ما اعرف هذا الولد عبالك مسويلي سحر ما ادري شيصير بية من يصير قريب علية بس اشو وحدة خالد ماكو......
شمدريني بابا هذا ابن المسؤول قابل مثلي ومثلج الدروس تروحلة للبيت. المهم مر الاسبوع وبدينة ناخذ محاظرات اكثر وصارت صدك الدروس صعبة التهيت بدراستي ونسيت كلشي... خلص الاسبوع ارتاحيت شوية من تعب الدراسة وخالو جان نازل اجازة والتمينة كلنة على الغدة الجمعة مسوين سمك مسگوف وتمن ودولمة اكلنة وسولفنة العصر خالو اخذنة اشترالنة غراض واكلنة زنود الست وكنافة ورجعنة ثاني يوم دوام اول ما دخلت للبيت شفت خالد ومصطفى حسيت نفسي فرحت وما اعرف شنو سبب هذا الشعور....
