لا اعلم من ساكون ولا اعلم اين ساكون ولكن اعلم ان الله سيختار لي الخير....
تعجبت شهد تريد تطلع برة الكلية ووحدنة اكيد اكو شي...
طلعنة اني وخالد واسامة والطريق كلة اني افور بس اريد اوصل لمكان واحجي بس ما اريد اسامة يكون موجود وخالد يسوق وعينة عليه رحنة لمطعم كعدنة وهو ما نطق ولا حرف واني صايرة اعصاب ما تحملت وحجيت... اسامة عفية تكدر تعوفنة شوية الله يخليك؟؟؟.
كالت لاسامة عوفنة عرفت صارت الشغلة صدك.... اسامة اترخص وراح كعد بالسيارة....
خالد الصار اليوم ما مقبول نهائيا اول واخر مرة تصرف من كيفك يعني اني الكلية كلها تحجي باخلاقي وثكلي بعد الصار اليوم لكولهم خوش موضوع يحجون بي....
اكص لسان اليجيب سيرتج...
خالد الله يخليك انت ليش ماخذ الشغلة باستهزاء وعادي عندك ترة اني صايرة اعصاب ثانيا على يا اساس انت تلزم ايدي ولا فوكاها تكول حبيبتي خالد اخاف بالك اني حالي حال باقي البنات انت غلطان مو شهد التخاف من ابن المسؤول لو تتلوكله خلي هذا الحجي بالك..
اوكي كملتي لو بعد عندج شي....
باوعت عليه شنو هالبرود وهو دومه عصبي.. كملت ما عندي شي نكدر نرجع...
زين اني شنو موقعي يعني انت حجيتي وسمعتج متريدين انت تسمعيني...
شسمع خالد ماكو مبرر للسويتة اليوم لو شكد متحجي وتطلع اعذار...
اوكي رح تخليني اكل تبن لو لا؟؟؟؟
جتني الضحكة بس حبستها، حشاك تفضل احجي بس نتناقش مو ابقى ساكتة اسمعك...
شهد شعندة مهند وياج؟؟؟
انت اكثر واحد بالدنيا يعرف اني ما عندي اي شي لا وية مهند ولا وية غيرة واحد ما عندة كرامة يعني شبيدي عليه..
زين انت ليش مقبلتي بي...
اكدر اكلك هذا مو شغلك بس رح اكلك ليش اني ما اريد اضيع تعب اهلي واخون ثقتهم وامشي وية واحد مثل مهند...
يجوز نيته صافية؟؟؟؟
اولا واحد مثل مهند اني بالنسبة اله رقم بالقائمة، وثانيا هذا مو موضوعنة....
موضوعنة أنه اني احبج وانت ولا عبالك؟؟؟ اني من اول يوم شفتج وانت مسيطرة على حياتي كلها مو بس تفكيري، ما فكرت بيج بيوم بنية مو صافية الله شاهد عليه هاي اول مرة بحياتي اكول لبنية احبج عندي هواية علاقات فوك متصورين بس ولا وحدة جدية اريد احجيلج كلشي عليه قبل متحكمين علية من هسة اكلج ثقي بالله اذا جوابج لا صدكي تبقين اخت عزيزة واتمنى مياثر هذا الشي على علاقتنة كاصدقاء واذا قبلتي لا هاي خليها للوكت وهو يثبتلج شنو خالد...
يعني اني جنت اعرف خالد معجب بية بس مو لدرجة الحب تفاجأت من الحجي وبقيت صافنة ما اعرف شجاوب وشحجي.. خالد بس اني عمري ما جنت اتخيل اني وانت...
اني وانت شنو شهد احجي؟؟
يعني علاقة حب..
انت مفكرة باحد غيري.
لاماكو هبج شي ابد...
خلص انت ممفكرة باي احد مو بس بية...
سكتت نزلت راسي وسرحت صدك ماكو غيرة شاغل تفكيري..
شهد وين رحتي احجي الله يخليج...
قبل شوية كلت عندي هواية علاقات....
اي كلش هواية بس مثل مكتلج ولا وحدة علاقة جدية واكثريتهم مصلحة فلوس وسلطة بس وداعتج بليلة ويوم كلهم يتصفون.. اكون صريح وياج من البداية اي علاقة اكول للبنية شريد منها اذا قبلت خير على خير رفضت الله وياها...
اكو بنات رفضوا؟؟
وحدة او اثنين...
اكو وحدة من البنات مفكرة بيك بغير العلاقة...
شهد اني كتلج من بداية العلاقة اكون صريح وياها ما مجذب على اي وحدة ولا ظالم بنية بحياتي.... بقيت احجي وياها اكثر من ثلاث ساعات وهي بس تباوع علية شوية وتنزل راسها شوية.... رجعنة للكلية اول مصعدت بالسيارة اعتذرت من اسامة والطريق كلة ساكتة وتباوع عالشارع وصلنة للكلية دخلنة اخر محاظرة بعدين طلعنة للبيت...
وصلت للبيت ابوية جان موجود كعدنة سولفنة وهم فتح موضوع العسكرية...
لو داخل كلية العسكرية مو احسن من هالتعب..
ما احب العسكرية هم اعوف مرتي وجهال يشتاقولي..
يعني انت تشتاقلي..
ليش لعد مو ابوية وتاج راسي...
اسامة شلونة؟؟؟
اسامة زين أربعة وعشرين ساعة وياية... بقينة نسولف بعدين صعدت ارتاحيت ونمت..
رجعت للبيت يالطريق حجيت لمييس كلشي فرحت كلش بس كتلها لتكول لاحد وتبين انه متعرف كلشي..ثاني يوم بالدوام عادي ماكو شي بس تصرفاته رجعت نفس ما هي ثكيل وميضحك والحواجب المعقوجة....
شبيك اليوم...
ماكو شي... هذا ابو الخط مالتكم ما احبه....
احمد شبي خوش ولد...
ما احبه واغار عليج....
باوعت عليه بتعجب ترة بعدني ما كلت اوكي...
ليش بيها مجال تكولين لا لخالد ....
لا والله هم عاجبتك روحك روح صفي جيش البنات العندك وبعدين الله كريم...
بس هيج اعتبريهم راحوا بايييييي....
والعصبية تبطلها...
هاي شلون...
ما اعرف...
ادللي بعد..
ماكو شي وشكو تكول ادللي عبالك معاجبك ....
لا ليش من حقج...
عبالي..
زين اكدر انطيج رقمي لو هم لا....
ما اعرف افكر..
يا ربي شوف شتسوي بية واني الدنيا كلها تركض وراية...
الدنيا ما عدا شهد... والله يا خالد يا مدلل الا اطلع الدلال كلة من خشمك ....
هاي انتقام مو علاقة..
هذا هو بكيفي انت مو تكول هيج..
تاخذين افلامي وتبيعيها عليه...
شنو؟؟؟
ماكو شي يدلل الحلو....
