اول مرة بحايتي اخذل انسان وحسيت نفسي خذلت خال علي من انطيتة وعد خالد بعيوني لاخر يوم بعمري بس خذلتة وخذلت شهد وعمتي والكل بقيت اروح واجي ما اعرف وين اروح ومنو اسال من شهد كالت خالد ماكو راسا عرفت راح يدور على ابوه بس وين طلعت للشغل ماكو احد بس امريكان ركبت السيارة وطلعت عالبيت شفت الجوارين ملتمين بالشارع والامريكان يطردون بيهم شافني واحد من الجوارين...
اسامة اسامة...
هلا ابو حسين شلونك...
متكولي شجابكم هنا متعرفون الامريكان مراقبين البيت...
ليش منو اجة ابو حسين...
هاي شبيك خالد هسة اخذوا الامريكان....
يمعود كول غيرها...
والله هسة شافوه واتعارك وياهم وضربوه بالسلاح على راسة وكع بالكاع واخذوا روح ابني ترة شوية ويرجعون يومية هيج يجون يسون كمين....
كعدت عالرصيف وخليت ايدي على راسي ما اعرف شسوي شكول لامة شكول لمرته ضليت افتر بالمنطقة بلكت احد يعرف شي ماكو بس كالو ماخذي لمعسكر بنصب الشهيد بزيونة الدنيا تخوف وبدت تظلم رجعت اخاف انزل شلون اكلهم اخر شي سلمت امري لالله ونزلت همزين الولد جانو برة وجد شهد وخالها كتلهم طلعت تسالني على رجلها سكتت باوعت عليها همزين جدها اخذها بعدين استسلمت للامر الواقع وكتلهم وما اشوف شهد الا وكعت شلناها للمستشفى كالوا حالة عصبية ولازم تبقى تحت العناية لأنه حامل اني هنا كعدت بالكاع خليت ايدي على راسي ولك وينك مرتك حامل تعال ليش رحت ما ادري ترجع تشوف ابنك لو لا، بقت يومين بس تصحى تبقى بس تصيح خالد ينطوها مهدئ ترجع تنام اني ما اكدر ادخل عليها علي كال نكللها موجود بس يحققون ويا ويطلع حتى تهدئ دخل كللها شوية هدئت واستقرت حالتها كتبولها مقويات جبتها ورجعناها للبيت اول مدخلنة للبيت اسامة انت شفتة لو بس كلولك هو موجود باوعت عليها ما اعرف شجاوبها علي رد. لا خيتي ما شفناه بس كالوا موجود وان شاءالله بس تحقيقات بسيطة ويطلع... عفتهم وطلعت برة احاول ادور احد يشتغل وية الامريكان...
نرجع بالزمن شوية وية خالد...
حسيت اني شكد فاشل وحالي حال النسوان كاعد بالبيت واولول وابوية الجان دائما يكول اريدك تعاوني بشيبتي منعرف عليه كلشي قررت اروخ ادور اسال زين منو رح يخليني اطلع امي شهد لو اسامة قررت اطلع بدون ما اكول لاي احد... زين شهد شلون نايمة بحضني ومتقبل تعوفني دقيقة أربعة وعشرين ساعة يمي فكرت اطلع الصبح قبل ميكعدون اي هاي خوش طريقة صار الليل صعدنة بغرفة شهد نامت بحضني والليل كلة كاعد والعب بشعرها واحجي وياها اباوع عليها حجيتلها هواية سوالف بس هي نايمة طلع الصبح واني مرة اكول اروح ومرة أكول لا قبل الحرب ابوية طلعنة هويات بأسماء ثانية كال احتياط، توكلت على الله ردت اكوم بس شهد صارت كدامي شلون يا ربي انطيني قوة اخر شي باوعت عليها بستها من راسها حست عليه كتلها نامي ادخن وارجع نزلت بالبيت الكل نايمين طلعت بالكراج دخنت ما سمعت صوت ولا احد حس عليه فتحت الباب الخارجية على كيفي وطلعت حتى لابس تراك رياضي... طلعت عالشارع واخذت تكسي لمكان شغل الوالد كلت عسى اشوف احد يعرف شنو السالفة شفت الامريكان كاعدين بالمكان ومحوطي شفت ولد اثنين بالشارع... السلام عليكم...
عليكم السلام...
سوال متعرفون الناس الجانت تشتغل هنا وين صفى بيهم الدهر...
اووو ناس ماتوا وناس اخذوهم الامريكان والروس الكبار طفرت...
بكلبي اكول ابوية ميسويها بس ما اكدر اسالهم على ابوية كتلهم ابن عمي هالولد الوحيد لاهلة وجان يشتغل هنا ومفقود وامة محروك كلبها عليه...
والله يا خوية منعرف...
بقيت اسولف وياهم شوية وبعدين اخذت تكسي وطلعت يم بيتنة شفت الامريكان كاعدين بيتنة والهمرات مالية الشارع...
جان اكو ولد بالمنطقة مرة راد يشتغل حارس بس ابوية كال حتى شهادة ثالث متوسط ما عندة شلون اشغلة وحجة ويا بوقتها وكلة امتحن خارجي ثالث واني اعينك منتسب ظل هالناقص حاقد علينة حتى سلام جان ميلسم... لمحتة كاعد يم الامريكان يم بيتنة طلعت وغيرت اتجاهي كلت افتر بالمنطقة بلكت اشوف واحد من الجوارين يعرف شي اول ما انداريت سمعت صوت يصيح خالد خالد بقيت امشي ما انداريت وما حسيت الا الامريكان فوك راسي عبالك مجرم وهو وياهم ويصيح اسمي ويكلة للمترجم هذا خالد هذا خالد... انداريت عليهم حجيت وية المترجم وكتلة اني مو اسمي خالد وهاي هويتي اسمي عمار شافوا الهوية بس بقوا مصرين ياخذوني تقاويت وياهم بس ماكو فايدة اخر شي واحد منهم ضربني بالسلاح على راسي وخذوني واني بين الواعي وبين فاقد ما حسيت الا اني بالكراج مال بيتنة اباوع عالبيت وبگلبي اكول يا دار وين العمروج البيت وصخ ومليان تربان الابواب مفتحة الشبابيك مكسورة اول ما رجعلي الوعي اخذوني بالهمر خلوا شي على راسي وطلعنة بقوا يمشون ووكفوا شالو الغطة من راسي شفت نصب الشهيد دخلوني جوة تحقيقات بس لا ضرب ولا اهانة بس اسئلة حتى مترجم ما احتاجوا بحكم دراستي جنت زين بالإنكليزي...
المهم بقيت يومين بغرفة وحدي بعدين نقلوني يم جماعة ومن ضمن الجماعة ابوية بحيث اول ما شفتة نزلت على رجليه بستها وبقيت بحضنة ابجي مثل النسوان بقيت كاعد يمة وسولفلي شلون لزموه والتحقيقات ويا شاف الضربة براسي كتلة لتخاف وحجيتلة طبعا اترزلت لان طلعت وحدي ولزموني بس بعدين بقينة كاعدين سوة جانوا اكو ويانة ضباط كبار جماعة ابوية......
