كتاباتي

القرد المشتت ووحش الهلع (2)

هنا نحجي عن الحلول بعد ما شخصنا الخلل وعرفنا بالنتيجة شلون قشمرنا القرد وخلانا نستسلم وأكلنا الوحش مال الهلع ..😢

*اكو دراسة تكول المماطلة مرتبطة بالتصورات العميقة للوقت وهي :
- الأنا بالوقت الحاضر
- الأنا في وقت المستقبل
(اهووو عاد صار يتفستق احجي بمالاتنه وعوف التفستق ..😏)

*الانسان يا رويحتي اذا فقد التواصل مع نفسه بالمستقبل وفقد الشعور بـ انا المستقبل !
راح القرد يقشمرنه ! .. يعني شلون ؟
*يعني ما يخليك تفكر بالمستقبل وشنو تريد تصيره وتريد توصله وما يجب ان تكون عليه ..ويخليك مشغول بالحاضر ونحير بالطربكه والطبات والطلعات والفيس والانستا..
خبصتها عليكم مو ..😂

راح احجيلكم تجربة سواها عالم خوش رجال..
هذا الزلمه جاب شلة من الشباب قسمهم نصين نص اخذلهم صور وسوالهن فوتوشوب photoshop وخلاهم اكبر من عمرهم الحالي ب30 او 20 سنة
ونص عاف صورهم نفسهن ما لعب بخلقتهم ..😂
المهم جاب الصور للمجموعه الاولى الخلاهم شياب وشوفهم الصور مالتهم وكال للشباب اذا انطيتكم مليون دينار وين تصرفوها وحط خيارات الهم يعني تصرفوهن بصندوق التقاعد لو بالطربكه وتبذروهن ؟!

اختارو الشباب جماعة صور الفوتوشوب يصرفوهن بصندوق التقاعد عكس المجموعه الثانية اختارو التبذير وشراء اشياء مو مهمه ابدا ..
مجموعة الشياب اختارو هيج لان تواصلو مع انا المستقبل وصار عدهم شعور بيها ..

* فأحد الحلول حتي نسيطر ع المماطلة هي تخيل انفسنا شنو نريد نصير بالمستقبل هيج راح نحد من الافراط بالمماطله والتسويف ونربط قرد الراحة ..🙊

أما #الحلول_العلمية حتى نتخلص من المماطلة خمسة حسب ما قدموهن المختصين :

اولا / التواصل مع شخصك بالمستقبل ..يعني بس سلم عليه واعرف اخباره وكذا وارجع لا تكطع صلة الرحم بي ..😎

ثانيا / المسامحة وتخلص من جلد الذات ـ يعني لازم تسامح نفسك وتبدي صفحة جديدة
(يعني نفس التوبه أنسى كلشي وابدي من جديد)

ثالثا / اذا انطوك عمل او عندك واجب وجان مزاجك البرتقالي متعكر لا تنتظر مزاجك يتحسن ويصير صافي يالله تبلش بالعمل...!
لا بالعكس ابدي بالعمل وخلي الانجاز هو يحسن مزاجك..

رابعا / اذا عندك هواي دروس وشغل روح ابدي بالصعب 💪
وتحزم للواوي حزام ذيب ..

خامسا / جيبلك #ورقة_وقلم واكتب امورك العاجلة والآجلة وابدي بالاهم ثم المهم وهكذا وصابر وثابر على تحقيقها

☝☝
هاي النقطة الأخيرة دائما استخدمها وجدا ناجحة وياي .. وكلما اخلص شغلة احط اكباله صح ✔
وبنهاية اليوم شعور ولا اروع من تشوف القائمة كلها صحات.
وتذكر دائما (لا يغير الله ما بقوم حتى يغيروا ما بأنفسهم)

طولت عليكم وادري بيكم مليتو بس لازم واحد يتعب نفسه ويجبرها على اشياء ما يحبها حتى يوصل لليحبه ..😎
وتعيشون وتسلمون ..

#يعقوب