#بلا_عنوان

#بارت3

#بارت3
ساره:مرت الايام وبديت اتقرب من اهله
امه وابوه ناس طيبين
اخته نسرين مخطوبه صارت صديقتي
بالبيت الام هي تطبخ متقبل احنا نطبخ بس نعزل لو شويه نساعدهه بالتحضير

مر شهر ع زواجنه ورجع لدوامه
من يجي اخلي رجلي ب مي بارد ووياه ملح وانشفهن اله
بالبدايه استغرب بس بعدين تعود
بس كل مايتقرب مني احسه مجبور لما اني جزعت ومليت منه
قررت اني اسحب نفسي
كافي هالشلاع القلب
منين الگاهه من اهلي لو منه
قررت بعد ماانام يمه
فد اسبوع اذا ماسأل يعني مرتاح هيج
وفعلا بيوم جان هو مموجود رحت شغلت التلفزيون طلعت فلم ونمت ع القنفه اول ميجي اسوي نفسي نايمه
صارت 11 تقريبا هو اجه من بره
اني حطيت ايدي ع وجهي والثانيه ع بطني
وحطيت الريمونت ع بطني عود ممنتبهه
هو اجه شال الريمونت وطفه التلفزيون ونام

سمير :مر ع زواجنه شهر واني مااحجي وي اهلي اطلع بره لل 12 ياله اجي
ودايما الگاهه منتضرتني
بيوم رجعت لگيتهه نايمه ع القنفه والتلفزيون مفتوح عرفتهه غافيه وهي تباوع
ايييييي بعد احسن
طفيت التلفزيون والضوه ونمت

ساره :مرت الايام واني كل يوم اسوي نفسي غافيه
مره اجه من وكت
اني شغلت التلفزيون ونمت ع القنفه

سمير :مرت الايام وهي كل يوم ماتنام يمي يمكن حست اني مجبور عليهه
بس هي هم خطيه
يوووو شبيدي عليهه
بيوم رجعت من وكت هي صارت 9 فتحت التلفزيون ونامت ع القنفه
سمير :تعالي هنا مو ترتاحين اكثر
ساره :لا هنا قريبه احب اسمع الصوت ومااريد اعلي عيب كولهه نايمه
سمير :براحتج
ساره :هالمره صدگ غفيت واني اباوع 😂

مرت الايام ع هالمنوال
مابينه حجي نهائيا
يجي من الدوام يتغدى وينام للعصر يطلع يجي تالي الليل مرات اني گاعده ومرات لا
نسرين صارت كلش صديقتي تسولفلي عن خطيبهه وشلون يحبهه
خالتي معتبرتني بنتهه
ابو سمير يعتبرني بنته وميقبل ع زعلي
ام سمير حست اكو شي بينه بس اني طمنتهه وكلتلهه سمير ضايج عنده شويه مشاكل بالشغل لايضل بالج

سمير :استمرت حياتي وياهه هيج هي ابتعدت لان حستني مجبور عليهه
مرات انقهر عليهه شلون نايمه لوحدهه
رجعت ل دوامي
جانت اكو ويانه موضفه مطلقه عمرهه تقريبا 25 اسمهه ريام
كلش حلوه عيون خضر وبييضه وطول يجنن جسمهه رشيق
لبسهه ناااازك وحصر

بس بالفتره الاخيره بدت تتقرب الي
واني مكلت باطل هم سوالف وضحك
بديت اميل الهه
يعني ماكو رجال يقاوم هيج جمال وهيج جسم
بيوم قررت افاتحهه بموضوع انو نتزوج بالسر
لان والدي من سابع المستحيلات يقبل اتزوج
واني رجال واريد مره تداريني اريد اباوع لوجه حلو مو مثل الي عندي
وفعلا حاجيتهه بالموضوع بالاول استغربت بس مارفضت بعدين وافقت وكلتلهه خلال هالاسبوع نتزوج

ساره :مرت الايام باااهته ابتعد عنه قدر الامكان
مرات اسوي كيك ونسهر اني ونسرين لل 1 ياله ارجع ع الغرفه حتى مااشوفه
خالتي بدت تخليني اطبخ
اول مره اطبخ الهم جان برياني كلش حبو وابو سمير طلب انو كل يوم اسوي الغدا
سمير بالفتره الاخيره تغير
يجي من وكت ويبقه ع التلفون سهران
جنت حاطه هالاحتمال انو عنده حبيبه
مرت الايام وسمير گام ينام بره البيت بحجه يسهر لو شغل
كل يوم حجه واني ممصدگه ابدا
قرب موعد زواج نسرين وخالتي گالت ليله زواجهه نروح للامام نزور
وفعلا الاربعاء بالليل قررنه نروح
اتصل ع سمير مغلق گلت لخالتي گالت ماعليج اگوله ابوك هو الي گاللهه اطلعي

رحنا زرنه وصلينه واتونسنه جانت نسرين فرحانه
طبعا مهند اخو سمير هو الي اخذنه وبقه ويانه فد حباب
واحنا گاعدين بالحضره
طبعا جنت لابسه نقاب بس مطلعه عيوني
جاي اباوع ع الناس وجان انصدم 😳😳😳
ماتوقعت اشوف هيج ابدااا

سمير :مر اسبوع واتزوجت ريام طبعا اجرت بيت بعيد عن منطقتنه
اخذنه اجازه ثنينه اسبوع
بحجه شغل بقيت يم ريام
اووويلي مو بنيه
تموووت متت بيهه
حبيتهه كلش
نسيت ساره ونسيت اهلي ونسيت كلشي
بعد ماكمل الاسبوع اخر يوم ريام طلبت انو نطلع نزور ونتمشى لان مطالعه
بالاول خفت لا احد يشوفنه بعدين كلت هو ليل ومنو يطلع ابوي ميطلع بالليل
رحنا زرنه ورجعنه گعدنه بالحضره واني ايدي ب ايد ريام
اخذنه نص ساعه وبعدهه تمشينه ورجعنا للبيت
جان اخر يوم من الاسبوع ولازم تعوضني 😉
والنوب بين يوم ويوم اجيهه
ثاني يوم رجعت للبيت وجان زواج اختي توقعت مموجودين گلت اخذ ملابس وارجع ل ريام
اول مدخلت لگيت ساره حاضنه رجليهه ومدنگه

ساره :واحنا بالحضره شفت سمير حاط ايده ب ايد وحده
بس الي وياه كلش حلوه
عيون لون وبيضه تجنن
مااتحملت رأسا نزلت دمعتي نزلت البوشيه حتى محد ينتبه شويه وگامو واهله ماانتبهو جانو يسولفون
رجعنا للبيت رأسا رحت لغرفتي وگعدت ابجي
انهاريت كلش
ليش هيج حضي
ادري مو حلوه
ادري هو احلا
بس شبيدي
بشنو قصرت وياه
يااارب ساعدني
مااريد ابقه وياه بعد
شويه واجت نسرين
نسرين :ساره حبيبتي شبيج ليش تبجين
ساره :مابيه بس اريد ابقه لوحدي
نسرين :والله مااعوفج ولج من تشوفيني تعبانه تسهرين وياي شلون هسه
اعوفج
احجيلي شصاير
ساره :اوعديني متحجين لاحد 😭
نسرين :وعد كولي خوفتيني
ساره :😭😭 نسرين اخوج تزوج عليه 😭
نسرين :😳😳 شدراج
ساره :شفت قبل شويه 😭😭
حاط ايده ب ايدهه
بالفتره الاخيره متغير وياي عرفت عنده حبيبه بس ماتوقعت يتزوجهه بهالسرعه
😭😭 ولج ماصارلنه سنه متزوجين
نسرين :يااروحي يجوز مو مثل مامفتهمه
ساره :لا متأكده 😭😭
نسرين :لو يعرف ابوي والله يموته
ساره :😳 لا دخيلج عفيه لاتكوليله
نسرين :تحبي 😔
ساره :ولج هو اول رجال بحياتي بعمري ماحبيت احد ولا جانت الي علاقه ب احد 😔
مو اله احبه بس هو زوجي ع الاقل يكولي مو يستغبيني
نسرين :اهدي يروحي
گومي اسبحي وارتاحي بس ابدل واجيج
ساره :لا يقلبي روحي ارتاحي وراج هوسه باجر
بس فدوه لاتزعلين اذا مگدرت احضر
نسرين :ولو راح اضوج بس يله
تصبحين ع خير
ساره :تلاگين الخير قلبي

راحت نسرين وبقيت افكر بهمي

يتبع...