قلب قابل للكسر

Part 3

#قلب_قابل_للكسر

//////بقلم الكاتبه زينب ماجد//////

البارت_3

يسار.. من بعد اختطافي ابويه شدد عليه بالطلعه بالمنطقه .. قله ما جنت اطلع.. اكثر الاحيان نخلصها اني وسنان بالبيت..

لو بيتنا لو ابيت اهله.. نلعب بلي.. او طوبه بالكراج.. او ويه صحبانه بالفرع.. المهم ما نبتعد عن ابيوتنه خوف الاختطاف..

والوضع جدا اتأزم بالعراق.. ضهرت ميليشيات عصابات كلها تدعي الدين وبأسم الدين يقُتل السني والشيعي..

صارت الحرب بالشوارع..اضافه الى الفرهود والبوك ونظام ماكو امان ماكو الوضع ساب.. اللي ينقتل بالشارع نكول الله يرحمه..

محد يهتم من كد ما كثر الموت.. صارت جثث العالم يكنسها ويغسلها الكناس وابو البلديه..

ولا جن دم عراقي واله حرمته. صار وضع البلد من سيء الى اسوء.

في يوم 4/2/2004 يصادف يوم الاربعاء.. جان اخر يوم من امتحانات نص السنه لمرحلة الرابع الأعدادي العام..

كعدت الصبح امتحان احياء ومسطور راسي من القرايه وشكد قريت احس كلشي ما قاري..

اصعب امتحان چنت احسه.. كعدت متوتر بدلت نزلت.. لكيت الحجي وامي كاعدين على الطاوله..

وحمديه جاي تصب بالجاي.. كلت صباح الخير.. ردو صباح الانوار..

امي......يمه تعال اكلك لكمه فدوه العينك.. على لحم بطنك ييمه حتى ما يضل عندك عقل وتجاوب وتنجح..

يسار..... يمه مستعجل والله. ما اكدر حيل متوتر..ادعيلي يمه ادعيلي فدوه..

الحجي طلع فلوس وخلاها بأيدي كال ديربالك على نفسك وليدي.. كتله تأمر حجي..

امي جبرتني الا اكل.. حتى لو تفاحه على الاقل.. اخذت تفاحه منها وطلعت للكراج .. لكيت السايق حازم منتضرني..

صعدت وياه.. واني اكل التفاحه واراجع كتاب الاحياء. يارب بس كون اجاوب احس عقلي صاير متجر مال معلومات..

متروس ترس.. ومن كد ما هواي احس كل المعلومات ناسيهن.. حسيت على السياره اتوگفت.. حجه السايق.

-وصلنه استاذ يسار..

-شكراا .. مو تتأخر عليه حازم.. الساعه 10 ونص تعال..

-حاظر..

-نزلت اتمشى بالممر مال المدرسه والطلاب تدخل والجو بارد والدخان من اتنفس يطلع من حلكي..

ولاف ركبتي بلفاف..وادفي بنفسي.. مو برد يكتل جان.. دخلت الساحه مال المدرسه مالتي.. لكيت سنان يقره..

ضربت على كتفه ها يلذيب

-هلا يسار

-بشر حافظ لااا ..