قلب قابل للكسر

Part 4

#قلب_قابل_للكسر

//////بقلم الكاتبه زينب ماجد//////

البارت_4

صف سيارته ونزل وياي.. اتقربت.. افتح الباب انفتح من يمه وطلع بشار شافني ضحكت وحظنته وهوه صرخ يسااااااااار خويه ..ولك بوووووية ..

حظنته حيل وكمت ابجي وهوه يبوس براسي.. طلعت امي تصيح صلاوات على محمد يمه وليدي حبيبي رجع وتهلهل وتبجي ..

ركضتلها ابجي وابوس بيها وعمامي التمو واهلي.. وجبار يبوس براسي ويمسح على شعري..

كلت البشار ابوي وين.. كال راح قبل شوي للشرطه.. كتله هذا الرجال انقذني منهم.. وصحت الحجي اسمه محيسن او محسن. واكف على صفحة ويبجي على حالنا .

سلم عليه بشار ودخله جوه وعمامي استقبلوه.. طبيت جوه وياهم.. بشار صاح تعال يسور اكعد يمي ولك طگ كلبي عليك..

كعدت.. كال شني القضيه.. منين اخذوك.. لعبنه بحازم طوبه وكاللنه والله وصلته الباب المدرسه ورحت اجيت تانيته هواي..

تالي كالو يسار طلع..

-حشاك الچلاب يكلولي الحجي دازنه.. حازم عنده شغل.. يحجي وياي وباوع الخدي..  كال ولك شني كاتليك شمسويلك..

كتله شفت ايام سوده ما تنحمل..بس الله يعلم بيها.. جاي احجي.. طب ابوي.. درت وجهي هو صرخ وصاح يسار بويه..

وكعد من حيله.. كمت يمى ابوس براسه وابجي واحظنه.. بعدني عنه  واخذ من شماغه.. وخلاه على وجهه وكام يبجي اول مره اشوف ابوي بهاي الهستريه ..

وهوه كاعد على القنفه.. واني كعدت يم رجليه.. ما احس الا رجع راسه وكام يفتح بدگ  م دشداشته. 

كلها التمت عليه انخبصنه عليه.. بشار وجبار شالو ونقلوه للسياره بسرعه.. اني ردت اروح وياهم..

عمي الجبير ما قبل.. كال شوف حالك.. ارتاح ابوك بخير تلكه ضغطه هبط من الصدمه صارله يومين ينوح عليك..

دخلت خواتي اجن يسلمن.. بستهن من راسهن وصعدت لغرفتي.. كعدت على سريري وكمت ابجي..

انوب نزعت ملابسي باوعت جروحي.. باوعت خدي.. متأذي.. ما بدلت.. رحت لفراشي ابجي مليت من الوضع الانه بي..

على ساعه اهلي يموتون بسببي.. شنو ذنبنا.. بقيت ابجي لحد ما نمت بس بالشورت.. لهناك..

حسيت الغطا نرفع من جسمي.. فتحت عيني لكيته ابوي.. بعدني ما شايل راسي.. خله راسه على راسي وبجه حيل..

كمت.. نزلت بالكاع وكعدت كباله واكله حجي تأذيت والله.. بعد ما اتحمل.. وهو يمسح بدموعي ويكلي سهله وليدي  فنه اليمسك بعد..

اضمك بكلبي واقفل عليك.. كض  وجهي وداره كال ضاربيك. كتله لا شردت منهم وتجرحت..

باوع لجسمي.. وكام.. كال البس خل ناخذك.. لبست ونزلت وي ابوي.. صعدني بالسياره.  اخذني لمركز الشرطه..