قلب قابل للكسر

Part 8

#قلب_قابل_للكسر

//////بقلم الكاتبه زينب ماجد//////

البارت_8

بعد نجاحي بأول عمل الي.. اخذت الاداره بالشركه واستلمتها.. اكمل مدرستي ومن بعد الساعه 12 اتوجه للشركه..

اشوف كل الاعمال.. وقت فراغي اذا ما كان عندي اجتماعات واشغال مكثفه.. اكعد اقره دروسي..

ابد ما هملت دراستي.. ركزت بحياتي زين وقررت انجح.. اقرى خلال طريق رجوعي للشقه الساعه 5 العصر..

وقت ما قبل المغرب احب انزل على البحر وامشي واتنفس بيه الحتى استمد القوه والاسترخاء منه. 

وانتزع ضغط العمل والضغوطات النفسيه بسبب الدراسه.. ساعه استرخاء اسميها.. استمتع بمنضر الشمس الحمرا وهي تغرب من ناحية البحر..

يأذن اتوجه للمسجد للصلاة.. اكمل صلاتي ارجع للشقه اكل واكعد اذاكر.. للساعه 9 اخذ الدرويل واطلع مع ربعي..

مو عراقيين هم اماراتيين  بس طيبين تعرفت عليهم بدبي .. ما تجمعني بيهم رابط قوي لكن هيج بس طلعه ووناسه وكذا لا اكثر..

احرص ارجع للبيت قبل ال11 لحتى ارجع ابدل واخذ الهيتفون والmb3 واركض على البحر فد نص ساعه او اكثر..

لحتى ارجع تعبان منهك اجل ما لسوي هو اخذ حمام وانام بدون تفكير من التعب طوال اليوم..

وهكذا مشت ايامي.. اللي استفقده من كل هلحياة هي امي.. هواي احتاجها.. واشتاق لطبخها ..

الاكل بالامارات يختلف عن اللي بالعراق.. اشتهي تشريب اشتهي اشتهي كباب عروك.. هواي اكلات عراقيه اشتهيها..

ادورها بالامارات والكاها.... بس مو مثل طعمها بالعراق ومن الخبز العراقي اللي تخبزه حمديه هنااك..

الخادمه ابد ما استلطف اكلها.. مو طيب.. تاركها للتنضيف فقط.. ويومين بالاسبوع اطلبها ما خليتها تعيش وياي. 

لان ما احتاجها.. واني مو فوضوي.. البس واعدل بس ما اخرب الدنيا وراي ارتب واطلع.  وملابسي الوصخه..

اخليهم بسله بالحمام يم الغساله هي تجي كل اسبوع مرتين تغسلهم وتكويهم..

فدوم جنت احجي وي امي على سالفة الطبخ.. فمره فتحت وياها كاميرا على ال ياهو.. وكتلها علميني تمن ومركة باميه..

فخطي هي كامت تعلمني قلمتها وغسلتها وعلكتني الخطوات.. وسويت التمن بس عجن شوي وياي ما ادري ليش

المهم جنت طاير واني مسوي انجاز طابخ باميه بنفسي.. حتى لو معجنه بس اكلت منها ماعونين هههههههههه..

خطيه كامت تفتح وياي الوالده كاميرا وتعلمني الطبخ. بس العجن 3 جربته وما ضبط.. بالفرن تطلع تلعب النفس.. مو مثل التنور العراقي..