وكانت منكعه بانزين
رحنه الها اني وساره ... تلكيناه
وكعدناها علئ كرسي بالحوش عدنه...
عادل مااعرف اوصف الكم حالته
انتبهت اله مصدوم
رهف
عادل
صدك الي كلتيه
عادل مابيدي شئ .... هذا مقسوملي
ماسمحلج ... اموتج ولا احد يلمسج غيري
ساره.. عادل اطلع منا ماتشوف ضروف لبنيه
ساره... احبها وهي بس اليه واحرك بيتهم واحركها بيه بس تفكر تزوج هالمعيدي
امي تبجي
حنان تبجي وترجف وحدها وتناشق
عادل .. عينه حمره وتجدح نار
ساره تحاول تهدي عادل وتطلعه منا ماتكدر
عادل كافي ارجووك روح منا
تقرب مني واني رجعت لوره
يتقرب...
واني ارجع
واشرلي بصبعه
ويمد اصبعه علئ كتفي
هاي رهف ماتصير لغيري احرك الدنيا كلها
عادل اطلع ... روح
عادل .... عيونه بيهن دمعه وبيهن بركان يمكن يثور بأي وقت
رهف ماانطيج لغيري فهمتي
اطلع اطلع
طلعوو عادل وساره
واني شمرت روحي عالكاع.... وضليت ابجب بعلووو صوتي
عادل طلع بس طلعت روحي وراه
اتمنئ روحي طلعت مني ولا عادل
روحي تصيحله
بس مايسمعني
بس مجبوره
اختي وابنها اولئ مني ومن حبي +
حنان خلص موافقه علئ نجم
يمه دكي عليهم
يمه خليهم يجهزولي الجفن مالتي
مو البدله
يمه وصيهم عليه وعلئ كلبي
لان راح اكون بس جسد
يمه مابيه اكووم .... اريد الي يسندني
اريد عادل
يمه احبه
حرام عليكم .. شنو ذنبي
ذنبي حبيت .... ماغلطت
بس ردته بالحلال
يمه
رهف انتي بس اليه تسمعين لولا
عادل كال هجي من وره الحايط
واخوانه يسكتون بيه وماكوو.......
رهف بس اليه تسمع حيدر لولا.... والله اذبهم كلهم سجن... واذب حنان ورجلها
بس ياخذوها مني
امي.... ولج سمعتي
سمعتي شيكول
هذا شيسكته النه كوليلي..... فهميني
وفجأه اختفئ صوت عادل واهله من البيت يمكن دخلوو جوه
دخلت حنان حمام وسبحتها
وامي علك ضغطها وانطيتها علاجها
رحت غسلت الحمام
غسلت الحوش من البانزين
ذبيت نص قهري بالبيت وتنضيفه
اخذت الجلكان مالت البانزين
ردت اصعده فووك
صعدت واني بيه قهر .... تعب سنين كله مايعبر الي بيه
لابيه بجي ولا بيه صرخه
بيه الم
صعدت وخليت الجلكان بمكانه
رهف مااكدر بدونج
التفتت
عادل من وره الحايط
رهف امووت
رهف احبج .... ماكدر بدونج اضيع
للحكايه بقيه
يتتبع
طبعا القصه بعدهي بدايه فقط
عادل .....رهف احبج
مااكدر بدونج
عادل ؟؟
اي عادل ... رهف لاتتوقعين اخليج تاخذين غيري
انتي كل عقلج..... (ويضحك بإستهزاء
عادل روح منا . لاتجي امي
مااروح انتي هنا مكانج ... وهذا بيتج..( ويأشر علئ الشقه مالته... رهف انتي مكانج بكلبي ولا اريد اخسرج بيوم من الايام
عادل ابوس ايدك روح
ليش انتي الي تضحين ليش ماتضحي اختج علمودج
اختي رادت تموت نفسها علمودنه اني وياك بس اني ماقبلت و واعدتها خلص عادل الله يخليك روح بس تشوفك امي يصعد ضغطها
عادل باوعلي بعصبيه ... بسيطه رهف بسيطه
راح عادل
وبقيت وحدي فووك
ضليت ابجي وحدي
كعدت جوه السياج... ليش هجي ياربي انشلع كلبي... ليش مامكتوب اليه افرح
عادل حلمي... وامنيتي
من اخلي راسي عالمخدمه اتذكر طوله ووجها وابتسامته
اتذكر كلامه وشقاه اليه
كنت اتخيل عادل يدخل عليه البيت اهلي ولابس قاط.... واهله وزفه
واني لابستله بدله بيضه .... وياخذني من اهلي يخليني ابيت اهله
يخليني بكلبه ........وبحضنه
اه ياامي..... كلبي انكسر... ومنو الي يجبره بعد
كمت علئ حيلي
باوعت عادل ماكوو
حلمي ماكوو
باوعت علئ رهف ماكوو هنا بهذا المكان
وعادل مو يمها
وجهالي ماكوو يلعبوون هنا ... بالبلكون
باوعت حلمي وحبي مو هنا
باوعت لهناك بعيد وره بيوتنه اشجار ومزارع
هه حلمي هناك عند نجم
الي ماشفته ولا اعرفه..ولا اريده
اصعب شئ بالحياه انك تنجبر علئ شئ ماتريده ..... وتخلي وراك حلم وتروح عنه غصب عنك
اباوع بين حلمي هنا
وبين ذاك الحلم الي بعيد عني وانجبرت عليه
عادل احبك بس مو بيدي
عادل انت رويحتي
انت العطر مالتي الي اتخيله وانام.... حته من كان يروح لدوام اصعد فوك
واشوف مكانه وناركيله مالته.... ارتاح
احس نفسي شفته هوو ...
بغيابه احس بضياع ... مفاركه ولف ... واريده يمي
يغيب يوم .... عبالك مسافر بعيد ومايجي الا بعد سنه
علئ الرغم نتواصل رسائل... ويدزلي صور اله وهو كاعد عالمكتب ... والزي مالته والنجمتين
كنت اتباهه بيه بيني وبين نفسي
فديت حبيبي الهيبه
ليش هجي حب مابقه شهرين ويضيع بين يوم والليله
ليش لان ضعيفه وماعندي كلمه
لان اني إمراه هجي انجبر
يعني لو ولد كان مكاني يقبل يزوج بنت مارايدها
مسحت دموعي
ومسحت ثوبي من تراب سطحنه
وتذكرت لازم مااحلم بالعالي .. اني تربيت هنا وراح اروح هناك
ما الي قسمه ارتاح
واكون مرتاحه بيوم
نزلت جووه
امي.... وين جنتي
نضفت لسطح
نضفتي السطح ... لو نضفتي عينج من الدموع
يمه
اعرف بيج مجبوره واعرف مكسور كلبج
بس شبيدي عليج ... والله لو اختج مو حامل فلا خليتها ترجعله
ولا خليتج تزوجين نجم
وانطيتج للي ترديه
وعادل ما الكه منه بيووم مستحيل
العصر هم اجن ام عادل واخته الجبيره
وقنعوو امي لمن ملووو
بس رفضت
وطلبوو جوابي
ورحت الهم وكتلهم خلص اني انخطبت
وطلعوو زعلانات منه
وهناك واسمع الهوسه ابيتهم
وعادل يتحلف بمحسن
واخوانه يسكتون بيه وماكووو
وره الليل حنان خابرت رجلها وكالت اله اني وافقت
وره يومين اجو النه محسن وامه
واتفقوو علئ الزواج والملجه مالت لشيخ بيوم واحد
هم هجي عاداتهم.... واخذو حنان وياهم
بعد لا صعدت فوك
ولا شفت عادل ولا فتحت تلفووني....
مر شهر....
كم مره اجن النسوان النه
وره شهر جابولي جنطه بيها قطع الوان ويمكن عطرين وقلمين حمره لون احمر كلش ولون وردي طوخ
وقلم كحله
فستان اخضر..... والثاني وردي طوخ
حته الي عايشه بصحراء ماتلبسهم
مجلافه مالت جسم.... وشامبوو ... وسيت صابون .... وجواريب سود.... وحجابين ....,وعلبه ضلال... مورد خدود احمر وعبايه راس ام 25الف
وحفايه مالت بيت
سيتين نوم....... وجنطه مالت طلعه
ومعطر جوو... وشحاطه سوده
اما الذهب... تراجي ذهب عراقي وحلقه ساده وكلاده يمكن تجي سعرها 600 و500
وهم يفتحون الجنطه ... واني بقيت
ماعرف اضحك اوو ابجي
حنان حاسه بيه... وكالتلي راح اشتريلج الي تردينه
عود تواسيني
ماتعرف كلبي مورم من الضيم
نجم لاشفته ولا شافني بس ام نجم تجي.... هيه وحنان ... او هي وجناينها
اشتريت خط جديد
ورقم موبايل عادل بجهازي
كنت دائما اتابع بيه متصل اولا
وكان يتقصد يخلي صور الفايبر بيها كلام يقصدني...
دائما يكتب عبارات علئ الصور ...,تخليني احن اله واشتاك غصب عني
يعرف بيه اتابعه
حته رمز شبكتهم مايغيره علمووودي....
يوميه يخلي صوره لفايبر انا المشتاق وانا المجروح
مرات يكتب متألم وتعبان..... مرات يخلي صوره واحد بالعمليات وكاتب اتمنئ الموت
صعدت فوك. كانت ب12بليل... شبعت بجي بوقتها.... تمنيت اني الي اموت
تمنيت تخلص حياتي
مامرتاحه .... حب عادي ماراضي يروح من كلبي وعقلي .. غصب عني مصبره نفسي
ولازمه نفسي ومااراسله....
خليت اغنيه حزينه بصوت ناصي كلش ....
شمسوي بيه فراكم .... كلبي يحن ليامكم
كل يوم انا احتاجكم..... صدكوني مشتاااااااك
وضليت اسمعها وابجي
ابجي علئ حبي الي ماكمل
ابجي علئ كلبي الي مافرح.... روحي الي متعذبه بغيابه
خليت راسي بين رجليه
وبقيت ابجي بصوت ناصي
ماحسيت الا شئ طفر يمي حيل.... تصورته بزونه...... بقيت بوضعيتي
وابجي
شخص لزم ايدي
فزيت .... ورفعت راسي
عادل
ياروح عادل ....ليش هجي اسوين بيه
لا اراديا
رحتله ركض وحضنته
وهو شبكني حيل .... وعصرني حيل علئ صدره
حسيت بدفوو ماحسيت بيه بعمري
ماتحملت
ضليت ابجي بعلوو صوتي وهو ضل يبجي وياي...... اول مره اشوف عادل بهجي حاله.... بشخصيته وضعه.... ووضيفته مسويته قاسي
بس وياي كان شخص اخر
كنت مثل طفله بحضنه
رهف متت ... ادمرت بغيابج
عادل مو بيدي
رهف ميت تعرفين شنو يعني ميت
اعرف الموت لان انا عايشته هس
ليش سويتي هجي. بيدج ضيعتي حبنه
رفعت راسي... وخله ايده علئ وجهي ومسح دموعي
هاي العين مااريدها تبجي .... انتي ملك اليه ماراح تصيرين لغيري
عرسج اسويه عززززه عليهم
خليت ايدي علئ حلكه..... عادل صوتك لاتسمعك امي
ليش هجي رهف دمرتيني
مو بيدي... عادل.... راح اموت عادل شسوي كولي
خل نسافر ومناك نزوج
لا عادل مستحيل اسويه واخلي امي وحدها واكسر ضهرها
رهف ادمرت شوفي شصاير بيه ...كوليلي شسوي ترئ متت تبهذلت
عادل حبيتك وماراح احب غيرك
عادل خله ايدي علئ وجها
وكال اخ اخ ... شسويلج بعد تدرين البنات تتمنئ حبيبها يخطبها
وانا كم مره خطبتج وانتي الي رفضتي وطردتي اهلي
باوعت بيه .. اوووف ... مشتاقه اله كلش مشتاقه لسوالفه والحجي وياه...... مشتاقه نرجع الايام قبل امراه بلا قلب
