بكي لأجلها الجبال (الجزء الثاني)- للكاتبه رباب عبد الصمد

12

سلمى / يعنى انت لسه قايل ان مفيش حرف بيعدى على ودانك هباء وتيجى دلوقتى متسمعنيش كويس انا قولت انه قالى ازوركوا مش ازوره وفى فرق كبير بين الاتنين يا حضرة الضابط ...وبخبث قالتله وبعدين هو معنى انك انت كمان قولتلى انى ممكن ازوركوا ان يكون قصدك ازورك انت بالذات
ادهم / مردش
سلمى / اظن خلاص كدة ولتالت مرة .....
اتفاجات بادهم وقف وحاوطها بايده وهو ساندها عالباب واصبحت سلمى مسنودة بضهرها عالباب وهى محاصرة بين ايدين ادهم
ادهم بهمس / هستنى زيارتك وعايزك تخلى بالك من نفسك لحد ما ارجع ولو احتاجتى اى حاجة فبمجرد تفكيرك بس فيه هتلاقينى ادامك
سلمى وهى مش عارفة ترد من كتر توترها من الوضع اللى هيا فيه / تص...تصبح على خير ولفت بسرعة وفتحت الباب وخرجت ونزلت وهى كلها سعادة وهو كمان نام على سريره وهوعنده شعور غريب اول مرة يحسه
فى الصباح نزل جاسر وراجح ولقوا سلمى محضرالهم الفطار
راجح / ايه الفطار الجميل دة تسلم ايدك يا لولو
مدام حياه وهى ساندة على ايد سلمى عشان تساعدها وهى بتقعد عالسفرة / بصراحة انا بشهد لسلمى ونفسها فى الاكل
سلمى / ممكن يا ماما تدعى لامى الله رحمها بظهر الغيب لان هى اللى علمتنى الاكل وازاى احضر سفرة
مدام حياه / ربنا يرحمها يا حبيبتى .... صحيح اللى خلف ما ماتش
راجح بضيق / بصراحة انا مش عارف انا ايه لزمتى فى ام التدريب ده
جاسر / انت كان ممكن يخيل ليك انك ممكن تعترض
ادم / اكيد بتتكلموا على ادهم بس خلى بالكوا دة نازل ورايا
سلمى اتفاجات بحمزة جاى يجرى عليها ويحضنها
مدام حياه فرحت لما شافت حمزة متعلق بسلمى كدة وحست بتغيير فى شخصيته لما بدا يحس بالحنان اللى افتقده مع امه د
ادهم / صباح الخير ومال على ايد والدته وقبلها
مدام حياه / اقعد افطر معانا
جاسر / ما انتى عارفة يا ماما عمره ما هيفطر الا لما يشرب فنجان القهوة ومعاها سيجارتين
ادهم / بس يا خفيف واتجه ناحية المطبخ عشان يعمل القهوة
سلمى راحت وراه بسرعة
ادهم / خير قومتى من عالفطار ليه
سلمى / انا عايزاك تبطل العادة دى وتفطر الاول عشان كدة غلط جدا
ادهم / مش هينفع صدقينى مش هعرف افوق الا لما اشرب القهوة
سلمى / عشان انت عودت نفسك على كدة وممكن اوى تعود نفسك برده عالفطار الاول وبعدها القهوة
ادهم / مش هقدر
سلمى / بس اللى اعرفه ان عندك اراده امال بيسموك الجبل ليه
ادهم / لو سمحت يا سلمى روحى كملى فطارك
سلمى / طيب خلاص روح انت وانا هعملهالك
ادهم / لا مش هشيل ذنب انى قومتك من عالفطار
سلمى / انا اصلا مش هفطر وهعملى قهوة معاك
ادهم / اوعى دة خطر
سلمى / ليه ما انت بتعمل كدة
ادهم / انتى عايزة ايه يا سلمى
سلمى / تبطل العادة دى
ادهم / اوعدك هفكر
سلمى / تبدا من دلوقتى والا .....
ادهم / حاضر يا سلمى هفطر الاول حاجة تانى
سلمى / توعدنى ان دة يكون على طول
ادهم / مش هقدر اوعدك عشان مقدرش اوعد واخالف
سلمى / طيب عالاقل وانت فى فترة التدريب
ادهم / حاضر
سلمى / طيب يالا بينا نفطر
ادهم / حضرى نفسك عشان هوصلك فى طريقى
سلمى / لا عشان ياسين هيعدى عليا
ادهم بضيق / براحتك
سلمى / على فكرة ياسين هيخطب شروق قريب
ادهم من جواه فرحة كبيرة لان سلمى بتحاول تثبتله ان مفيش بينها وبين ياسين حاجة وهى اكيد مش هتبررله دة الا اذا كان هو يهمها زعله
ادهم بجمود من غير ما يبين الفرحة اللى جواة مبروك
راجح بغيرة / هما بيعملوا ايه كل ده فى المطبخ دة ما كانش فنجان قهوة
جاسر ابتسم لانه متاكد ان مشاعر ادهم اتحركت ناحية سلمى وكان مبسوط جدا لاخوه بس مش عارف هيكون ايه مصير الحب دة فى وجود نيرة ولانه متاكد ان ادهم عمره ما هيفكر انه يطلقها حفاظا للشكليات ولشعور حمزة ابنه
ادم / مبدهاش انا قايم اشوفهم
مدام حياه وهى ملاحظة قرب ادهم من سلمى وده شىء مفرحها جدا انما احساسها وسؤالها هو نفس احساس جاسر وسؤاله وبحدة لتغطى عالموقف / مالكوا فيه ايه الحق عليها انها قامت تعمله القهوة
وقبل ان تكمل كلامها لقت ادهم وسلمى خارجين من المطبخ واللى ادهشهم ان ادهم سحب الكرسى اللى على راس السفرة وقعد عشان يفطر
ادم / ايه ده انت عملت القهوة وشربتها ولا ايه
ادهم بعيون زى الصقر / شىء ميخصكش
ادم / انا اسف بس انا لما لقيتك اتاخرت وكمان جاى تفطر فقولت انك اكيد شربت القهوة
سلمى بلجلجة لانها حسيت انهم اخدوا بالهم انهم اتاخروا فى المطبخ اصل حاولت انى اقنع ادهم انه يفطر الاول قبل ما يشرب القهوة
ادم / نععععم يعنى انتى عايزة تفهمينى ان ادهم بيفطر قبل ما يشرب القهوة
ادهم بعصبيه وبصوت جهورى / وانت مالك اصلا ايه اللى يدخلك فى اللى ملكش فيه مبقاش الا اصغر واحد هو اللى يتكلم
ادم بتوتر / انا ....انا اسف انا مقصدش انا بس استغربت
ادهم ولا تزال العصبيه هى المسيطرة وكانه بيدارى شكله ادامهم انه طاوع سلمى ورضى انه يفطر الاول / وانت ايه اللى يخليك تستغرب وايه الداعى للاستغراب اصلا هو انا عملت حاجة غريبه انا هفطر زيكوا عادى جدا وفجاة قام من غير ما يفطر وراح ناحية المطبخ عشان يعمل القهوة
سلمى حسيت بالتوتر اللى حصل وندمت انها صممت انه يفطر الاول
جاسر بعصبيه / يعنى عجبك كدة ما كونتش قادر تسيبه يفطر الاول انت فعلا عيل لا يعتمد عليك
ادم / هو انا عملت حاجة انا والله مقصد انى اضايقه
راجح / انت عارف ادهم عنيد وعنده كبرياء فباسالتك دى حسسيته انه اتنازل عن رايه لما وافق سلمى انه يفطر الاول فطبعا عند فى نفسه عشان يثبت انه عمره مابيتنازل عن رايه
سلمى / طيب انا هدخله
جاسر / خلى بالك من كلامك واستحملى عصبيته
سلمى / حاضر
وبالفعل دخلت سلمى المطبخ وهى متوترة
ادهم وهو مديها ظهره / لو سمحت يا مش عايز كلام فى الموضوع دة
سلمى استغربت انه عرف انها هى من غير ما يبص ومن غير هى ما تتكلم
سلمى / بس انا عايزة اتكلم ممكمن عشان خاطرى كفايه انى هفتقدك اسبوع
ادهم لفلها بسرعه اول ما قالت كدة
سلمى اتنبهت للى قالته ومش عارفة تتراجع فيه واتوترت فما كان منها الا انها قالتله طيب ممكن متكسفنيش وتاخد من ايدى السندوتش دة
واتفاجات لما ادهم مسك ايدا اللى ماسكة السندوتش ورفعها لفمه وبدا ياكل من ايدها
سلمى / لو سمحت يا ادهم سيب ايدى عشان لو حد دخل هيفهم غلط
ادهم / هيفهم ايه يعنى
سلمى / ها
ادهم / خلاص بالراحة يا ستى متتكسفيش اوى كدة واخد منها السندوتش وساب ايدها
سلمى مقدرتش تنطق حرف وخرجت بسرعه
مدام حياه لاحظت توترها فسالتها بخبث ها كلمتيه
سلمى / مردتش وكانت لسة مخضوضة من الحركة اللى عملها ادهم
جاسر بابتسامة / سلمى ماما بتسالك اتكلمتى مع ادهم
سلمى / اه .... قصدى لا مدنيش فرصة
خرج ادهم ومعاه فنجان القهوة بعد ما اكل السندوتش وطبعا محدش عرف انه اكل حاجة
ادهم / يالا يا حصرة الضابط منك ليه عشان مانتاخرش
راجح / احنا جاهزين اول ما تخلص قهوتك نتحرك على طول
راجح / هتوحشينى يا سلمى بس خليكى فاكرة انى فى بينا وعد
سلمى / لا متخافش اول اما ترجع على طول
ادهم اتضايق من كلام راجح انما مش مبين حاجة ولا سلمى واخدة بالها انه اتضايق لانها بتتكلم بكل طلقائية ومش فاهمة ان ادهم ممكن يفسر دة بمعنى تانى
ادم / اما انا باه هستغلها طول ما انتوا فى التدريب وهاخدها معايا على طول النادى
جاسر / وانا كمان هتوحشينى يا لولو بس اللى هيصبرنى انك وعدتينى انك هتزورينى ووعد منى اول ما ارجع للتدريب هكون فاضيلك وهفسحك فسح فى اماكن عمرك ماروحتيها
سلمى / بجد انا بقالى كتير متفسحتش
جاسر / هو انا هيكون ورايا غيرك
ادهم النار بتغلى جواه وبعصبيه انا خلصت يالا بينا
جاسر حس انه نال مراده وانه حرك غيرة اخوه
مال ادهم على ايد مدام حياه وقبلها وتجاهل سلمى لانه كان متضايق منها جدا
سلمى اتفاجات من رد فعله وتحوله المفاجىء واتضايقت جدا
وخرج التلاته فى طريقهم للتدريب وبعدها خرجت سلمى وقابلت ياسين وصورت قاعة الافراح وبعدها راحو المجلة
ياسين لسلمى / شروق لسة مجاتش
سلمى / مردتش
ياسين بصلها عشان يشوفها مبتردش ليه لقاها دخلت اوضة محمد عامر واخدت نفس طويل وهى مغمضة عنيها كانها مشتاقة تشم ريحته
ياسين / تاااانى يا سلمى هنعيده تانى مش قولنا ندعيله افضل
سلمى مش بترد عليه ولا سمعاه اصلا وراحت قعدت على مكتبه وفجاة انفجرت فى العياط
ياسين بصدمة / ايه ده ..بس ... بس انتى لازم تقومى من هنا دلوقتى حالا وبيحاول يشدها ويقومها انما هى ولا بتتحرك من مكانها ولا حاسة بايده اللى بتشدها
ياسين / يا سلمى متخلينيش اضطر اشيلك ولو حد دخل علينا هيبقى منظرنا زفت
سلمى / برده زى ما هى وفجاة شروق دخلت واول مابصتلها اتخضت عليها وقالت لياسين انا كنت متوقعة اول ملاقيت النور بتاع الاوضة منور بس ليه يا ياسين تسيبها تدخل ده احنا مصدقنا وقربت ناحية سلمى وحضنتها وسلمى استسلمت لحضنها وانفجرت اكتر فى العياط
ياسين / مش هينفع كدة ساعدينى يا شروق اننا نخرجها
اخيرا سلمى نطقت وقالتلهم لا انا عايزة افضل هنا شوية
شروق/ طيب ممكن باه تقوليلنا انتى ايه اللى حصلك ده احنا مصدقنا انك بدتى تنسى
سلمى / انا منسيتش يا شروق ولا عمرى هنسى انا تناسيت او بحاول اتناسى
شروق / ولو ده فى حد ذاته شىء كويس
ياسين / لحظة بس يا شروق وبص لسلمى وقالها انتى ايه اللى حصلك خلاكى جاية تجرى عالاوضة كانك عايزة تشتكيله من حاجة
سلمى بصتله وكانها بتقوله عندك حق اما شروق فحسيت ان ياسين عنده حق وانه ضغط على وتر حساس
شروق / طيب ممكن تهدى كدة وتكلمينا وتقوليلنا ايه اللى حصل
ياسين / اتكلمى بكل صراحة وبكل اللى حساه ومتتكسفيش والحمد لله ان محمود مش هنا
سلمى حكيت لهم على كل حاجة حصلت معاها من يوم مدخلت الفيلا لحد النهاردة الصبح وحكيتلهم عن يوميات محمد عامر وازاى كاتبلها كانه شايفها وقاعد معاها وازاى كل اللى كاتبه بيحص معاها بالظبط وازاى كاتبلها تتصرف ازاى وحكيتلهم على حنية مدام حياه والدفا اللى حسيته بينهم وحكيتلهم على كل المواقف اللى حصلت بينها وبين نيره وتعمدها انها تهينها وحكيت كمان عالمواقف اللى حصلت بينها وبين ادهم واخواته ولما سالها عن ياسين بس طبعا مذكرتش انها قالتله ان ياسين هيخطب شروق وحكيت لما حاولت تساعده فى ترتيب شنطه واللى حصل بعدها واللى حصل النهارده الصبح لما خليتها يفطر قبل مايشرب القهوة
شروق باستغراب / كل ده حصل وازاى تستحملى دة كله من الزفته اللى اسمها نيرة ده انتى كانت اهم حاجة عندك كرامتك والا كنتى وافقتى ورجعتى لمحمود بعد مسابك
ياسين بص لشروق بغل لانها كده اهانتها من غير ما تقصد
شروق تداركت الموقف وقالتلها انا اسفة يا سلمى بس انا مستغربة انتى ليه مستحمله ما انتى قولتى ان محمد عامر بنفسه قالك لو مستريحتيش امشى
ياسين قبل ما سلمى ترد هو اللى رد وقال بكل ثقة بس هى مستريحة يا شروق
شروق باستغراب / ازاى يعنى مستريحة هو انت متخيل بعد اللى هي حكيته دة هتكون مستريحة دى بتيجى على كرامتها عشان محمد عامر اللى لو كان عايش مكانش هيرضالها كدة
ياسين / ايوة هى مستريحة ومستريحة اوى كمان بس اللى انتى مش فاهماه واللى هى مش عايزة تعترف بيه انها حبيت ادهم وهو كمان حبها
سلمى بصت لياسين وحاولت تنكر انما ياسين شاور بايده انها تسكت ومتكابرش وقالها الحب مفيهوش تكبر يا سلمى وبعدين انا قولتلك احكى بصراحة ومتتكسفيش والا ملهاش لزمة الفضفضة معانا
شروق / طيب ممكن تفهمنى انتى قصدك ايه وايه توقعاتك لو كلامك صح وايه الحل فى نظرك
سلمى بصت لياسين وكانها بتسنجده انه يديها رايه
ياسين / اولا محمد عامر خلى سلمى تدخل بيته لانه عارف ومتاكد انه فى حد من اولاده هيحبها وهتكون من نصيبه دة اذا كان ميقصدش ادهم نفسه اما ثانيا باه فسلمى استحملت نيرة فى الاول عشان خاطر محمد عامر اما كونها استحمليتها اكتر من اللازم فده لانها حبيت ادهم وانا مش هلومها لانها مش جاية على كرامتها اد ماهى عايزة تقرب من اللى بتحبه انما انا ممكن اقول انها جاية على كرامتها اذا كان فى اعتراف من ادهم بحبه هو كمان ومع ذلك سمح لمراته تهينها لان ساعتها مش هيكون عنده مبرر ولازم ياخد خطوة وكون ان نيرة بتعمل كدة فمش لانها غيرانه منها لذاتها لا هى عارفة ان ادهم كمان بيحب سلمى وعشان كدة بتتعمد انها تهينها ادامه واللى عايز اقولهولك يا سلمى ان كان ليكى نصيب مع ادهم فهتكونى مرتاحة جدا لان اللى زى ادهم على حسب ماشوفته وسمعته من محمد عامر ومن بعديها منك انه راجل اوى وغيور اوى وده لان طبيعة تربيته كانت كدة لانه اتربى فى الصعيد ورجاله الصعيد دول لو حبوا واحدة يبقى يا هناها ولو مجرد واحدة عادية دخلت بيته حتى لو كانت شغاله بيحميها ويحافظ عليها وكمان هو ذكى جدا وبيحمى اللى معاه ومش بيقول الكلمة الا لما يكون حاسبها الف مرة وعارف نتايجها وكمان عايزك تخلى بالك انه هيكون حواليكى فى اى مكان وفى كل لحظة بس السؤال دلوقتى الوضع ده هيفضل لحد امتى
سلمى / وضع ايه
ياسين / الوضع اللى انتوا فيه هو انتوا هتقضوها كدة حب من بعيد لبعيد ولا لازم يكون فى اخر للحب ده
شروق / حب ايه اللى انت بتقوله واخر ايه انت عايزها تحب واحد متجوز واللى مستغرباله اكتر ازاى محمد عامر يقولها اوعى تفتكرى انك كدة بتخربى بيته لانهم مش بيحبوا بعض من الاساس وقبل كدة قلها تبعد عن محمود عشان متبقاش خرابة بيوت مع ان الموضوعين زى بعض لان محمود وهالة مش بيحبوا بعض ولا هو ادهم عشان ابنه
ياسين / لا طبعا هو مقصدش كدة والموضوعين مش زى بعض لان موضوع سلمى مع محمود انها هى كانت معاه من البداية و اديته كل حاجة وهو باع وكون ان هالة مش بتحب محمود فيجوز لانها عارفة ان سلمى بينهم من البداية انما لومكانتش سلمى موجوده كان ممكن يحبوا بعض عادى اما مع ادهم فالوضع مختلف لانهم من الاول مش بيحبوا بعض من غير سلمى ما تكون موجودة وكونه حبها فده مش معناه خراب بيوت لان قلوبنا ملناش عليها سيطرة ومحمدعامر وكل اللى فى البيت عارفين كدة دة لو مكانوش اصلا متاكدين ان جواز ادهم ونيرة مش هيستمر بس الموضوع موضوع وقت وسبق وقلتلكوا ادهم فى الاول والاخر تربيته صعيدى والصعيدى ما بيبعش بسهوله ومش بيطلق بسهوله فهمتوا قصدى
سلمى حسيت ان كلام ياسين ريحها وكانها كانت محتاجة تسمع حاجة زى كدة عشان تتمسك بشعورها ناحية ادهم اكتر وماتحسش بالذنب من انها ممكن تفرق بينه وبين مراته
سلمى / طيب انا المفروض اعمل ايه دلوقتى