#ثآر ألدَمْ
#ليوثي المياحي
_1_
عروستنه تشبه الكمر.. حلوة هواي حلوة بنت شيوخ.. وبنت ارجال .. امي تهلهل.. وتصلي ع النبي.. وشايله المبخرة.. وتدور بيهه وراي.. ويمشن وراهه بنات عمامي وبنات خوالي.. كاعدة بالربعه.. كبل ما اطلع..الجهال جانو مكيفين ويتمركصون... جنت فرحانه وما فرحانه.. فرحت لان الليله عرسي.. ومافرحت..لان راح اروح لرجال.. ما اعرفه ولا شايفته..ولا اعرف اطباعه..راح اطلع من بيتنه لبيت غريب عليه... راح اعرفه بعد العرس لان ابويه انطاهم كلمه..واني انفذ بدون اي اعتراض..ابويه جان شيخ عشيرة..وكلمته مثل السيف..مو بس عليه..على كل واحد من العشيرة..اذا جان زغير اوجبير...واني بنته الوحيدة اكيد انفذ كل اللي يريدة مني... الرجال المعرس يكون ابن عمي.. واحنه البنات..ما النه دخله او خرجه..قبل الزواج..حتى كتب الكتاب والموخر والمقدم .. كله بيوم العرس.. وما عدنه النسوان تختلط بالزلم.. النسوان وحد والزلم وحد... سالفتي بدت من رادو يزفوني بالهودج لبن عمي.. والهودج عبارة عن غرفه زغيرة.. من القماش حاطيهه فوك البعير.. ومثبتيهه زين.. خاصة بالنسوان ..من يصير تنقل من قريه لقريه..امي شايله السيف..وبطرفه تخليه ع جتافاتي..وتمتم..الله يحرسج من كل عين..مرة ع جتفي اليمين ومرة ع اليسار...
ابويه دخل. جان هوة عزي وفخري ودلالي..وظهري..بالدنيا...وراه تلث رجال يسندوني همه عزوتي اخوتي محمد واحمد وعلي... ابويه باسني من كصتي.. اني عيني رغرغت من الدموع...شاورني وكال بنيتي الزينه شمحلاها الليله.. بكد ما ضويتيلي دنيتي.. اني فرحان بيج.. وراسي دومج رافعته.. عاملتج مثل ما حبيتي..وادري تربيتي مراح اضيع..ديري بالج ع رجلج وبيتج.. الهودج برة ينتضرج وهسه يكملون الرجال اللي راح يوصلونج لبيت رجلج.. اني ابتسمت وبسته.. وحضنته..وكتله ماقصرت وياي يابه.. حققتلي كل اللي اريدة وعيشتني احله عيشه..وحتى بالزواج ..عرفت شلون تختار... اني جنت طول عمري احلم.. اصعد بالهودج ..وبزفه من النسوان والرياجيل وجهال تصفك وتركص...وتهلهل النسوان... لان جنت احب ديرتنه العربيه.. لان اني جنت بنت عرب..واحب الجو مال ديرتنه احب الزرع واحب كل شبر بكاعنه...جنت ادرس بالمدرسه وجنت متفوقه...بس دائما جان اكو احساس بداخلنه احنه بنات القريه انو البنت نهايتهه زواج ورجال وبيت وجهال ... واني من ذاك الصيف ابويه قرر يزوجني بس اجل الموظوع ..ع السنه هاي...ع الصيف.. رحت للغرفه وتزينت وتمكيجت ..ولبست لبس العروس..العربي.. وخليت خلخال يرن..وزينت اديه ورجليه بزخارف الحنه.. والبخور مالي جو الغرفه.. ورة ما لبست ملابس العرس خلو فوكاي حرمه ..مثل العبايه تنذب فوك العروس حتى محد يشوفهه.. طلعت من الغرفه..وريحة المي ورد تعط وراي... وكف البعير..وفوكاه الهودج.. كلت خل اجربه حتى اتعود عليه.. صعدت فوك البعير بالهودج... ومن راد يوكف كام يتمايل وردت اوكع كلبي وكف...ونزلت ورحت لغرفتي.. بيتنه جان داير جبير وحواليه غرف .. والربعه ... وبنص الحوش شجرة توث يمكن عمرهه بالميت سنه..ليلتي الاولى معروفه مثل كل ليله تمر بيهه العروس...يودوني لبيت العريس.. ويدخلوني ويكتبون كتابي والمؤخر والمقدم..واوقع او ابصم.. تكوم النسوان تهلهل.. وريحت البخور تفوح.. ودك بالدفوف ..يدخلون العروس ع العريس..وبعدين العريس ياخذ العروس..بعد ما يلطخ جفيه بلون ابيض بالدم دلاله ع عفه البنيه.. بس جانت عندي صعبه لان شلون راح انام وياه واني لاشايفته ولا عندي اي مشاعر اتجاهه.. بالرغم من انو ابن عمي...عفت كل هاي الافكار وتلهيت بالدك والغنى والركص.. همه يغنون واني اندمجت وكمت اغني وياهم...وكل شويه اكوم اخذلي خبه ركص...واهلهل واصفك..لروحي...غير فرحانه بعرسي...وما احس اله اسمع اصوات اطلاقات نار..رحت اركض مديت راسي من الشباك ردت اشوف شكو ..ومنو يتجرأ على بنت غازي السليمان..؟؟؟سبع رجال ملثمين باليشماغ..على حصونتهم..النسوان كامن يعيطن.. ويصيحن.. اني جنت بعدني بالحوش مال البيت.. وجان اكو حايط واكع ويطل ع المزارع ..جان يصيح واحد منهم يمكن الريس مالتهم... كال اسكتو اذا سمعنه صوت مرا وحدة منكم نكتلها...احنه ما رايدين شي منكم..رايدين العروسه بس... اخويه محمد جان هوة مسؤل ع حمايه البيت مالتنه.. لان الزلم راحو لاعمالهم وبقن بس النسوان.. صاح وكال على كص اركبتي اللي يريد اختي العروسه يكابلني رجل الرجل..جان يحجي ويصك سنونه من الغضب... كاللهم جايز من روحه اللي يضن انو يكدر يتقرب ع العروسه...جان يتقدم واحد منهم ويشهر تفكته على محمد ويضربه بجتفه...الدم كام يجري منه...وجان يوكع بالكاع.. وهوة لازم جرحه بايدة.. النسوان كامت تعيط واني رحت اركض لغرفتي واني ابجي واعيط..والطم وجهي باديه..الناس كلهه كامت تصيح ..اخويه اخذه الدم ..وماكام يكدر حتى يدافع عليه...اجه واحد منهم عليه وكام يريد يشيلني واني اتملص منه واضربه بجموع اديه..عيونه جانت تجدح مثل عيون الصكر...اخر كلمتين سمعتهن من عندة كالي انتي اليه... ضربني بضهر الخنجر اللي شايله وياه.. اني دخت اوووكعت وغبت عن الوعي....وللحكايه بقيه..
تنويه سيتم النشر كل يوم جزء...مع تحياتي
