#ثار الدم
#ليوثي المياحي
_22_
دخلو كلهم على صوت عياط بلال..امي تتعثر وتلاهث..كالتله..شكو وليدي شنو شصار..؟؟ياشر بأيده..كاللهه أسمعي بنتج..شتحجي..تريد تروح وياكم لديرتكم وتخليني..
امي كالتله وليدي طول بالك..ترة هية مريضه وتعبانه..وبالهداوة اخذهه على كد عقلهه..
كتلهم..خبله جدامكم شايفيني..اني ابدار ما مرتاحه بيه..كتله خليني امشي لدارنه..شبيهه هاي؟؟؟
عمي حمادي حجه ..كال مابيهه شي..بنيتي..لا زعلين روحج..
ابوية كال..اني ما اكدر اخذج من دون موافقة رجلج..
بلال كال هذا الحجي المعدل..فهمهه عمي..تدخل عمي حمادي وكاله وليدي اخذهه بالسياسه..خليها ترتاح شويه..يم اهلهه..وترجعلك..لحد ما تنفض هل مشكلة..وينتهي كل شي..
بلال كاله ..صار يابه حجيك على راسي..بس اني ليهسه ما كايللهه شي..دنطلع من مصيبه ونطب بمصيبه ثانية..اريدهه تبقة يمي ..حتى تخلص هاي المشكلة..وبعدهه الله كريم..
عمي حمادي كال ..صلو على النبي.. بنيتي زينه..اني ذبحت الذبايح..لرجوعج سالمة ..والديرة كلهه لميتهه..ابقي هل ليله..والله كريم..
سكتت..طلعو كلهم ..وبقت امي تهدي بيه..بدلت هدومي..هوة راح جابهن من دارنة..طلعت للحوش..كعدت بنص النسوان..والرياجيل كعدوهم ..بعيد علينه ..مدو السفرة ..وصبو العشه..نوب فضحوني ..حسيت الديرة كلهه درت بسالفتي وجاية تتعشى..النساوين مبحلكة وتباوعلي..عبالك نازلة من السما..مفيدة..السمانية ..اتانيهه كل لحضه ترميلي قنبلة..
كالتلي ..شنو خيتي..خطف..وجال..وجروح..ودم..
كتلهه..شلج بهل سوالف..اني اصيله ماينخاف علية..كالت والاصيلة تكتل..كتلهه..الاصيله تكتل كل من يتعدى على شرفهه..سدي حلكج..احسن الج..ماباقية بس انتي علية..(لزمت اذنهه..وشاورتهه..كتلهه..راح اكتلج وراه..اللي يكتل واحد يكتل اثنين..)كامت من يمي وراحت كعدت بأخر سرة مال نساوين..
رجلي..مبطبطة..وجسمي يوجعني..كله..سويت روحي دايخه..وراسي يوجعني..كمت من وسط حلقة النسوان حتى اروح لداري ارتاح..امي اجتني تركض..وبلال..هم اجه..من يم الرجال..
كالي..شبيج زينتي..شنو اليوجعج..شاورته وكتله بس تبتعد انته اني ارتاح..
كام يتلفت ويلعن الشيطان...امي جاوبته..كالتلهه اطلع بره هسة وليدي استرنه الله يسترك الناس ملمومه..خليهه تمدد وترتاح..تمددت على الفراش..وقفلت الباب..بالمفتاح..لا اريد خوفه عليه ولا حنيته الجذابة..شسوي بيهن..تمددت ..كمت افكر بشغله اخليه ينجوي بيهه..ويخليني اروح لاهلي..
بلال...ادري بيهه تعبانه..وموجوعه..واني ما عرفت شلون اتصرف وياهه ..لان اني ماريدهه تفاركني..واذا تعدى عليهه رجال..اتمنى الكفه واكتله.. اني رجال عربي..الشرف عدنه..تاج ع الراس ..تطيح عليه الارواح.. فما بالك مرتي..شنو مخطوفه يم رجال ليلتين واكثر..وجاية..مدماية..شلون يريد عقلي يشيلهه انو ما سوالهه شي..كلبي موجوع..عليهه اني اكتل علمودهه..اكتل وما يرفلي جفن..امشي واعشي بالناس..وعيني عليهه..تتبعهه..التعب مبين على وجها..كلبي نغزني..شفتهه تتعارك هية ومفيدة..وبعدين وكفت..عرفت صارلهه شي..ولوما اني بنص الناس جان كمت وكسرت راسهه..لمفيدة..دخلت هية لدارهه..واني صحت مفيدة ورزلتهه ودزيتهه لدارهم..وتلهيت بالعشى والناس..هذا اجه وهذا راح ..الكل يطمن بيه..مصيبه وتروح..حمد لله على سلامه مرتك..ربي يسترهه وياكم..وهواية كلام وتطييب خاطر..كلام الناس خلاني اندم..على ردة فعلي..اللي ما عرفت شلون..سويتهه..
شي اقوة مني ..هاي طبيعة الرجال العربي يغار على عرضه..
حكمت عليهه بدون ما اسمع منهه ..ويا ليتني ضميت زينتي..ومسحت دمهه ..وبوست جروحهه..انوب اني قسيت عليهه وزيدت الهم اللي هيه بيه..اتاني من تروح الناس ..وادخل يمهه وارضيهه باي طريقه..
الوكت صار نص الليل..الحوش فرغ من الناس..والنساوين لمو المواعين والسفرات..اني ماكدرت اصبر..عفتهم..رحت لدار زينه..لكيت الباب مقفول من جوة..دكيت الباب..كتلهه افتحي الباب زينتي..افتحي..خل نتفاهم.. لا تعذبيني..ما جاوبت..رجعت ادك وهم ماكو جواب..رجعت ورا..دفرت الباب..وكسرته..لكيت دارهه فارغ..والشباك مفتوح وزينه ما موجودة... ولا موجودة ريحتهه باوعت على الحايط وين معلك بندقيتي..ما لكيتهه..كلبي كام يدك ع السريع يريد يطلع من مكانه..هية هددتني تكتل روحهه..اذا بقت ومراحت لبيت اهلهه..اوووويلي..يا نار كلبي..اذا صدك سوتهه..لهل درجة روحهه طالعه..مني؟؟؟لهل درجه..وجعتهه..اكلني الندم..ضيعت مرتي بأيدي..طلعت اركض..واعيط..زينة..زينة..زينه ماكو عمي علي ..وخالتي نجاة..جوي يركضون والتمو بالحوش..
ابوية..كالي شبيك تعيط مثل الجاهل الواحد ميكدر يرتاح بهل دار..شبيك ثبرتنه بصياحك شصاير وهيج خبلك..
كتله يابه..زينه مالكيتهه بدارهه..
خالتي نجاة..
كالتلي..شبيك وليدي..على كيفك وياهه نفسيتهه تعبانه..مثل ميكولون الالمان..كتلهه مو وكت ضحك وشقه خالتي نجاة..
عمي علي..كال شبيهم الالمان وشبيهه النفسية..
خالتي كالت .. زينة هسة نلكاهه برة..
ترة عذبتني وشيبت راسي وين تريد تروح..هية حتى ماتندل بالديرة..
كتلهه..خالتي البندقية ..اخذتهه ..خايف تسوي بروحهه شغلة مو زينه..
كالت لا تخاف وليدي..وهية دا تحجي..جان الزناد يطك..الطلقه طلعت..صوتهه قريب من الدار..
خالتي نجاة جانت تحجي..ضربت راسهه بأيدهه..يبووووووووه وليدي..سوتهه المخبلة..اوووويلي ربي..من دم لدم..
طلعنه نركض..كلنه..رجلينه كبل روسنه..نتبع الصوت..منين اجا..نركض وكلبي..اكلني عليهه..يريد ينفجر من الهلع..شلون لو حبيبة كلبي ضربت روحهه..حركتلي كلبي..دايخ بحبهه من يوم شفتهه..ادعي من كل كلبي تكون بخير..النبض والروح هية..وشتسوة الدنيه بدونهه..كلت بس تكون بخير..خلهه تروح وياهم..خليهه ترتاح وتغير جو يم اهلهه..بلكي الله يهديهه..وترجعلي
طلعت برو الدار.. واشوفهه واكفة برة الحوش.. ورجليهه ثابته بين باب الحوش..والصريفه مال الحصونة..البندقية..بايدهه..ضربت طلقه بالسما حتى يطلعون..من طلعنه..وجهت البندقية..بوجوهنة..
ابوهه كال..بنيتي..ليش هيج اتسوين..ركبنة وكعن ..شسوينالج....
عيونهه تجدح صايرة جمرة..وجهه احمر..ينكط دم..لابسة هدوم..مالت رجلهه..
كالت ..كلتلكم ومتردون تفهمون..اكللكم اريد اروح لدارنة..
وهسة حكمت بعد مابيهه مجال..ورحمه ربي..
عمي حمادي كال..بلال..اني ما ردت اكسر كلمتك..بس هسة اريد منك تخليهه تجي ويانة..حتى روح لدارنه.. امي..كالتلي اعقلي بنيتي..خجلتينة ويه الناس.. هاي من كثر الدلال..بنيتي شلون نروح مطرودين..
كتلهه يمه تردين تبقين ابقي..اني لو اروح لدارنة لو افرغ رصاص البندقية براسي..
امي كالتلي..وووووه بنيتي..الله يسترنا..ومشت تريد اتقرب مني..كتلهه يمه لا تقربين الا اذا كلتيلي روحي..
بلال جان ساكت ويتفرج.. كال معناهه المرة وصلت لاخر درجات الزعل..والهم..ماتريد تبقى وتهدد تضرب روحهه.....
خالتي ام بلال تباوعلي ..كالتلي..لا...كافي بنيتي هل دسويه بينه..شنو تكتلين روحج ..اصبري عاد لباجر..ويصير..خييي!!!! ماكملة الحجاية وعمي صيح عليهه..كاللهه..اني شنبهت عليج..اني مو كتلج..متفتحين حلكج..
بنيتي..الله يهديج..ويرضيج..الدنية ليل..اذا طلعتي هسة من داري شراح يحجون علينه الناس..بنيتي ادري عقلج جبير..باتو اليله والصباح رباح..وروحي وياهم..اني اكلج اخذيهه كلمة مني..
هوة مافتح حلكة وياي باي حجاية..
بلال .. سكتت..شاحجي ماكو حجي فوك حجي ابوية..والله وسوت اللي بفكرهه..ماشي زينتي..دنشوف منو اليغلب...
بتت وية امي بدار النسوان ..امه ما نطتني مجال حتى احجي..جانت تباوعلي وعيونهه كلهه حقد..لان كلتلهه ما ابقة يمكم..
هوة اتخبل .. بس راد يحجي وياي ..او يقنعني مخليته ..ريحته اللي جانت معطرة بخشمي..كرهتهه..يمكن من الوحام..مو من المشكله اللي صارت..باقي بس يفتر رايح جاي من يم دار النسوان..
امه كالت..عود بنت شيوخ..عاجبج حاله..حرث الكاع رايح جاي..نايمه بحضن امج..بس مراح يعوضج حضن رجلج..
اني كمت اضحك..لان حسيت بالانتصار عليه..وغلبته.. نمت بحضن امي كتلهه يمه اشتاقيت لريحة صدرج..بس ريحته ما احبهه..
امي كالت اوووو كولي جاي تتوحمين..او وحامج..اجة بريحته..اوووف والله خطيه..وليدي بلال..راح اروح اجيبه خل يكعد واتفاهمي وياه بنتي..
كتلهه لا لا لتجيبينه..ما اريدة..
كالتلي..الله يهديج بنيتي.. كتلهه خل يروح على ابوه..كالتلي بنيتي شبيج الجناني راكباتج..ديري بالج على الرجال ليروح يصير شي بيه..اني خايفه عليه..
حطيت..راسي..بصدرهه محلا ريحتهه..ريحة..دهن العود..ريحه امي عطر وعنبر..اممممم..نمت ..اعز نومة..الفجر اذن..واني جنت مكرفصه.. تريكنه..وحضرنة رواحنه..اني راكبه ورا ابوية..سلمت عليهم كلهم الا هوة ولا عبرته..خليته صافن يفر باذانه..
بلال..كالتلي تريد تنام بحضن امهه صدمتني..اسمعهه تضحك ..وفرحانه يم امهه..واني نايم ع الجمر ..عطشت..رحت اشرب مي.. اني مشيت..وفكرة بعد ما اشوفهه..ذابحتني..عيوني تباوع عليهه..واعصابي صايرة نار..حاضنه امهه وتحجي وياهه وتضحك..كلت كبل متروح احجي وياهه بلكي تحن عليه..ما عافت امهه ابد..خلتني كاعد للصبح..فزيت وكت الفجر..كلت احجي وياهه..لكيتهه لازكة بامهه مثل البكاية..اتريكنه.ولا كلام ولا سلام..لمو رواحهم وغراضهم..حتى يرحون..سلمت ع الناس..كلهم الا اني.. قهرتني حيل..راحو.. وكلبي اخذوه وياهم..شلون ادخل الدار..وهية مابيه..وشلون انام وهية مو وياي..؟؟
اني..رحت فرحانه..برغم ابويه..جان ضايج مني ..امي جانت راكبه وية احمد اخوية..واني ويه ابويه..وعلياء وية محمد ..حقيقة جنت فرحانه..لان راح اروح لداري..وهديماتي..وغرفتي..وحريتي..حتى ولو اتقيد..بدارنه..بس اريحلي..
خليه يفهم..روحه..ويتعذب ويعرف قيمتي..اييييي بس اريد ارتاح منه..تنهدت..حتى كمت ما اعرف..بفرحة..لو بحزن..وصلنا..جني الحبايب من كل مكان بالديرة..اللي يستلطفني..واللي يهني..على رجوعي سالمه..فرحنا بالناس..احنه اهل الخير والكرم..واهلنه همة عزوتنه..بالفرح وبالحزن..وبالمصايب يتكاتفون ايد وحدة..سهرنه الليل..وكملنا ونستنه..دخلت حتى انام ..تعبت وراسي يوجعني..وجسمي كلة يون عليه..من الطريق..ستوني مددت حتى انام..واسمع صوت..طربكة الخيل جاية..وكفت..طلعت حتى نشوف منو الجاي..كتلهم هاي منو جاي تالي الليل ..واذا بلال..كدامي..واكف..على حصانه..راسم البسمه على وجهه..كالي وين تنهزمين مني..لاحكج..لاحكج..وللحكايه بقيه...
