#ثار الدم
#ليوثي المياحي
_13_
اجه الليل وراحو يسهرون..واني اتاني دقيقه دقيقه..اتانيهم شوكت ينامون..اهم شي اروح اشوفه ..وما اهتم وراهه شيصير خلي يصير..اهم شي املي عيوني منه..وما اهتميت ولا فكرت امه اذا شافتني شراح اتسوي..لو ذيج الحسودة الحقودة بنت عمه مفيدة..الا لا يوفقهه..كعدت وفتحت شباك الغرفه وكمت اشتم هوة..الدنيه ضلمه..هندس..والحوش مالتنه كلش جبير ..ومقابيله ..الزريبه مالت الهوايش والنعجات..واني شباكي مقابل الساحه اللي ورة دارنه..اكبالي اكو..شجر مال زيتون..وهاذ العالي..يكولوله قلنطوز..مدري شسمه..
جنت صافنه..واتاني النوم يمر بيهم..ويرحون بسابع نومه..اي لازم السابعه لان القبل السابعه تخوف..حتى اطلع واني مأمنه منهم..ومابيهه مجال الليله طالعه طالعه..حتى لو يكتلوني..ركزت بعيوني ..يمكن شفت شي اسود تحرك ...جذبت عيوني ..ومااهتميت كلت يجوز يتهيئلي من التوتر اللي جنت بيه..فركت عيوني.. ركزت زين.. عيوني جت بعيونه....لا..لا..لا..مستحيل.اكيد هذا حلم..اي حلم هلكد ما افكر بيه.. تهيئلي..رجعت فركت عيوني مرة الخ..ركزت وفتحت عيوني باديه الثنتين..اي والله..هوة..هوة..مديت ايدي اتلمسه..حتى اصدك..اشلون..عبر منهم وشلون دخل بالديرة ..وشلون وصل للدار والحوش والغرفه..؟؟؟كرصت خدودي حتى اتاكد اني بحلم لو علم..حط سبابته على حلكه وكالب اشششش.. اجيت اريد احجي وياج..جان ياشرلي كالي تعالي اطلعي..اني اتخربط ومعرفت شاسوي..كلت خل اطلع واخليهه على الله واليصير يصير..اشرتله كتله حتى يوخر..من يم الشباك..هوة ابتعد شويه.. اني كمزت.. جنت حافيه..ولابسه دشداشه مالت نوم..من كمزت لكفني اوجان نوكع بالكاع ..كمنه ورميت روحي بحضنه..الله ويا محله..ريحته..ويا
محله..الفارس الخيال..ويا محله..الادين اللي لكفتني..طلعنه من يم شجر الزيتون القلنطوز..نتمشى والايد بالايد..لا حجينه ولا سلمينه..امشي وراه..وصوت جفصة التراب جوة رجلي تنسمع..اني ليهسه ما مصدكة انو اني وياه..عشرين الف سؤال كام يدور ابالي..شلون وصل ؟ شلون دخل بالديرة واجاني والديرة ..رجالهه كاعدين يحرسون..لا جلاب نبحت..ولا واحد شافه من الحراس..اني مشيت هل مرة واعاد بيهه رجعه..اختاريت وانتهى..اني اختاريته بكلبي وعقلي..حبيته من كل كلبي وجوارحي..ما اعرف شلون وشوكت حبيته..احنه مانعرف قيمه الشخص الا من نبعد عليه..واني جواني البعد مالته..وكلاني تكلاه..اذا انكتبلي عمر طويل اعيشه وياه..لو اموت بدونه..؟؟
يمشي ويلهث..واني باقيه امشي وراه..وكل شويه يشد الضماد مال صدرة لحد ما وصلنه لمربط حصانه..صعدني وصعد ورايه..وعس حصانه برجليه..الحصان عبالك جان يحس بصاحبه..طار فد طيرة.. الحصان يركض واني لابدة..مكيفه ..الدنيه جبيرة بوسط صدرة..ريحته كلش طيبه..دفنت روحي ولميت نفسي وختلت بحضنه..جنت كلش فرحانه برجلي..الغالي ..ماحجينه ولا كلمه..سمعنه صوت حوافر الحصونه ورانه وهي تضرب بالكاع..التفتت طلعو جماعه من رجاله ورانه اني افتهمت.. مرتب امورة بيهم حتى يوصلني رجاله شغلو رجال ديرتي وهوة اجه عليه..ماحجينه ولا حجايه واني ثكلت..واستجنيت..وصلنا ديرته وجان نبقه وحدنه رجاله انتشرو ع الاطراف مالت الديرة..احنه عبرنه دارهم..ما افتهمت وين ماخذني عبر بيوت الديرة..لحد ما وصل لدار كلش جبيرة..بوسط مزرعه بطارف الديرة..الدار وحدهه وماكو يمهه بيوت..رجاله التمو يمه وزعهم نصهم ع اطراف المزرعه ونصهم يم الدار احنه دخلنه انطاهم حصانه..الدنيه بدت تكشف..ايدة بايدي..غراض غرفتي ناقلهه بيدة الهنا..شال شماغه وكعد وكعدني بحضنه..يمه..شكد ارتاحيت..كلبي يدك..يدك..يريد يطلع من مكانه..حبيبي يمي..آآه يازينه..واخيرا انجمعتي بحبيبج وراح اتعيشين الحب كله...
حطيت ايدي ع الجرح وكتله هسه انته زين..تنهد وكالي..اني موزين مادام انتي بعيدة عليه..ابد ماصير زين ..شلون اجيتني ومنين عرفت..انو اني وخدي بالدار.. وهاي الدار مالتمن ...
ضحك وكلي..على كيفج وياي شويه..وحدة وحدة.. اولا هاي الدار مالت اجدادي..نطونياهه وكتبوهه باسمي..جبت بيهه حتى تبتعدين من يم دوخه وهوسه دارنا..وهنا رجالي يحرسوج واني مأمن عليج..وانتي هم اطلعين براحتج..ثانيا..عرفت كل شي واني مريض نايم بالفراش..من الرجال مالتي..واهلي اني بعدتج عنهم ادري بيج مامرتاحه يمهم..واني ما اكدر اعوفهم ابويه واله حك عليه..وانتي مرتي وضوة عيني..اني ما اكدر اعيش بدونج..وهاذة الوضع خير الج والهم واليه..ثالثا.. طبيت الديرتكم برجالي ..الجلاب نطوهم لحم بيه مخدر وخدروهم..ورجالي شاغلو رجالكم..في سبيل اوصلج..كتله اي خاف المرة السابقه جانت كتله بس المرة الجايه اكيد يكتلوني..سكتني..بصبعه على حلكي..كالي اموت وما اخلي واحد يمسج..اكسرله اصابيعه..جان يخلي ايدة بنص شعرب وكام يمسد بيه..ويشمه..كال..امممم شكد اشتاقيت لهاي الريحة.. الطيبه..وجان يشيلني ويحضني قوي ..كالي اشتاقيتلج يا بعد كلبي..ما شبعت من شوفتج.. يا كمر يضوي كل ايامي ولياليي..اني ذبت بين اديه..كلبي كام يركص من الفرحه..الله شكد حلو الحجي ماله..وشكد حلو حبه..لساعني مامصدكه..اني بين اديه..تلاكت عيوني بعيونه..وتشابكت الادين..ضمني عليه وقرب راسه من راسي..شفايفه ترعش..اول لمسه..منه لشفايفي..باسني بوسه رجفتني..دوختني..بوسه وحش..بوسه الم..وفرحه..دخت هوة ابتعد عليه..ويلهث بنفسه..حط كصته على كصتي..وتنهد كالي كتلتيني..شكد جنت متمني اضوك شفايفج العسل..وانتي تنهزمين مني..شكد تمنيت احضنج..وانتي نافرتني ..شكد..وشكد..واني حافضج بكلبي وبين رموش عيني..ساكنه بنبضي..تدرين شكد كبرتي بعيني وجنتي عد كلمتج ورديتيني لاهلي..خليتي اهلج وناسج وراج وجيتي وياي..دمي لو ترديه فدوة الج مو حرامات ..
اني من فرحتي كمزت بحضنه ..هوة عيط كالي على كيفج وياي لان لسه جرحي مخيط..كتله شنوهاي شبساع بدلت ستوك اتكول دمي موخسارة بيج....كمنه نضحك..شكد حلوة فرحتنه عيونه تلمع مليانه حب..وفرحانه بجمعتنه..كلوبنه ادك وماخايفه..دتشوف صورة كل واحد من عدنه بالاخر..ضميت راسي على صدرة اكثر ردت احس بالامان ردت اتمتع بدكات كلبه..هوة حضني حيل ..وكالي زينه شوكت اتصيرين اليه وحلالي..انتي تقبلين اتصيرين مرتي..اني مكدر اعوفج..ترة اني محتاج الج..حسي بكلبي ..اووويلي عبالك السعت..كلامه جان حلوو ..بس تذكرت حجايه الثار وحجي امه..كتله اوكف صدك دا اكلك..امك كالتلي..حجيتله السالفه مثل ماسولفتهه امه..وكملت..كالي باعي حجايه الثار.. وكتلج..وخطفج واتحبلين..ونرجعج هاي كلهه صحيحة..وهاي اقدم من سالفه الكاع..بس اني من شفتج حبيتج..ومن وكتهه ماعاد يهمني لاثار ولا كاع..واني قنعتهم حتى اخطفج..بيوم عرسج..حتى نوفي الثار بيج..بس امي الله يهديهه..
وغمزلي..
كتله هاا وين نروح..كال اني اريد ندخل لغرفه النوم...كتله..شتكووووول..كال ندخل للغرفه مالتنه اشوفج شلون رتبتهه..وغمزلي مرة الخ اني افتهمت واستحيت..وجهي كام ينطي الوان..جرني من ايدي ومشه خطوتين ..جان الباب يندك...ضحك ..وكالي نكيتي بيهه هياتهه ماصارت...الباب كام يندك ..وكبل ميفتحه..امه كامت تعيط..كالتلهه كسرت كلمتي ..وطلعت عن طوري..بلال..افتح الباب ..ماجزت اله رحت وجبتهه.. افتح الباب وكابلني انته وياهه..ترة والله هاي ماجوز اله توديك للموت..هاي ماترتاح الا اتشوف دمك بطولك..ليش ابني اني احبل واجيب واربي واكبر وتالي تجي وحدة تاخذك مني اتوديك للموت...جانت تضرب بالباب وتعيط بحجيهه..بلال كالي ادخلي حضري روحج ولا يهمج ..جان يغمزلي نفس ذيج الغمزة..اني فهمت..وطلع على امه..اني دخلت للغرفه ..كمت ادور بالملابس شالبسله..واسمعه هوة وامه.. متبالشين بالصياح..اني طفيت الضوة..ولا كاني سمعت شي..ملتهيه باللي راح يجي..مابين فرحه وخوف كلبي كام يرجف..معدتي كامت تكلب..اليوم يكتب اسمه باسمي..اليوم راح اصير مرته من صدك..واني باقيه بافكاري جان يفتح الباب وهوة مفجوع..وكالي..امه اتخربطت..راح اوديها للدار واشوف شنو بيهه..واجيج..اكعدي بغرفتج ولا تتحركين..شويه واجيج..وطلع ...اوووف ولا مكتوبتلنه الفرحه..كل مرة تصير شغله تخربط علينه الغزل..بس مو مهم..ليش جاي افسد فرحتي..خل الهي روحي.. مثل ما اريد الليله ليلتي..الاولى..ولازم تكون ليله مميزة.. وجان تفكيري يشطح بيه..يم امي المسكينه..هسه خطيه شلون حالهه..اكيد كلبهه نار عليه..واكيد هسه خواني ماخلو شي مكالوه عليه..اكيد هسه اكلو راسهه لان مخلتهم يكتلوني.. بس همه كتلوني بالحيا من بعدوني من بلال..اني اخترته وان شاء الله ما اتندم ..خايفه لا يجي يوم لا اني هنا ولا اني هناك..نعلت الشيطان..وكمت ارتب بروحي..خليني اعيش الحب والفرحه حتى لو بس لحضات..ماكو شي مضمون بالدنيه..وحياتي ويه هل رجال..مابيهه شي مستقر..وهاي امه مالكت وكت ادوخ بيه الا هسه..احلف عليهه تمثل..رادت تاخذة واخذته..مشه الوكت..اني حضرت العشه..وهوة ما اجه..الوكت عبر العشه واني احضر بروحي ..زينه الليله ليلتج..غسلت وتزينت ..واتعطرت..ولبست احلى ماعندي..وكعدت افكر بيه شراح يكول من يشوفني مبدلتله..وكاعدة اتانيه..
بلال يحجي ويه روحه كال..فرحتي تليوم وما اريد واحد يخربهه عليه..ولا ينكدهه..امي رافضه زينة..علساس تحميني منهه واني بلاياها ميت..وجودها يمي هيه الحياة..وبعدهه هوة الموت ..بالنسبه الي..جيت احجي واقنع بامي..واهديهه ..ما عرفت شلون اقنعهه ..ضلت اصيح اصيح اتخربطت او وكعت..ما ادري اتخربطت صحيح..لو دا اتمثل..ركضت جبت مي ورشيته ع وجهه..فتحت عيونهه وكالت وديني..تكول حالفه عليه ما افرح بزينه..
شلون ما افرح بيهه وهيه رجعتلي الدنيه كلهه كالت لا قبل وهيه رافضتني..وهسه كالت اي...اهم شي عندي زينه موافقه....امشي كل شي بكيفي والحب مو بالغصب..مو هيه رجعتني لناسي..واني مصوب..اكو شي ينبض بكلبي اكبر من الكلمه واكبر من الوعد..ومدام اكو قبول وحب لازم اضرب الحديد وهوة ساخن..لازم ارجعها واخطف كلبهه مهما يكون.
..واني مجروح وممدود شفت شلون امي متفاهمه ويه ابويه..
اني شديت روحي وكمت على رجليه..من عرفت منو رد زينه لديرتهه..لزمته واكلت كلبه من الحجي..مرغلته بالتراب..وبهذلت حاله..اني مرتي حرمتي يسحل بيهه ومربوطه اديهه..على الحصان..انفيه من على وجه الكاع..ومثل ما اخذهه ..مربوطه..جبته وربطته وخليته يسحل ورة الحصان..وسويته ضحكه للي يسوة واللي مايسوة..وخليته عبرة لكل من يحاول يتعدى ..علي.. او يمسني اني او زينتي..رديت امي لدارنا ..وطيبت خاطرهه بكلمتين..مالي غيرهه هيه اللي جابتني وكبرتني..ميصي اخليهه تغضب..مني..هيه عينهه على ربي وعليه..هديتها وبستها..من كصتهه..ما عفتهه الاوهيه راضيه..وطلعت كلت فد مرة اضبط اموري..واروح..
رحت تفقدت العمال والكاع..الدنيه جانت حلوة..عبرت العشيه..كلت خل اروح لزينه نور العين..الليله سهرة لحد الصبح...وللحكايه بقيه
