#ثار الدم
#ليوثي المياحي
_14_
..رجعت على حصاني..واغني..زينه..زينه..زينه ..زينه غاليه علينه..الكلب يدك يريد ينهزم من صدري ..ما مصدك راح احضنهه وبموافقتهه..احبهه من كل كلبي..اخاف بس اوصل..اخاف دكلت كلبي توكف بصدري..اتحايل ع الوكت في سبيل اوصل بسرعه..للحب..حبيبتي هي الحب..محلاهه ..مسكين المحرووم وماضاكه..
وصلت..نطيت الحصان لجماعتي..ودخلت ورجلي على راسي..الغرفه جانت تضوي..بوجودهه..كلبي..فرفح من كثر الفرحه واللهفه..الليله..اريد اطلع قهر وضيم ولوعه وحب ..ايام وسنين..
اني حليت شعري..خليته سارح ع ضهري..ولبست يتك مال نوم كصير فوك الركبه.. ابيض ستن..طبعاً كلشي مبين منه ....هههه عرايسي بعد..حمرت الشفايف..ودبغت الخدود..وريحة عطري فايحه..لبست خلخالي الزغير..حتى يرن برجلي..والليله حفلتي ..ناويه اخبله..بس بيني وبينكم بالحقيقه جنت كلش خايفه..هيه ليله تستعد الهه كل عروسه..بفرحه وبخوف بنفس الوقت..من عقدة اسمهه العذريه..افتر بالغرفه..وكل شويه اسأل واحد من رجاله الي مخليه حرس ..اكله ما اجه..يكلي بعده..اني كعدت..شويه..جان ينفتح الباب..دخل وضل صافن يباوع عليه بعيونه اللي مثل عيون الصكر..اني كلبي فز..يمه..اذا عصرني هل رجال الا يكتلني بعصرته..كمت اتخيل روحي بين ذراعاته..وشفايفي بين شفايفه..يمه ..اكيد راح يكطع نفسي..عيونه لمعت ..وهيه صاعدة نازله..تاخذلي سكنر..وبشفايفه بسمه معلكة مالت فرحه وشهوة..نزل ذراعاته..اني عرفت راح يجي عليه..لزمني وحضني وميلني..ماكدرت اتململ..كمت ااشرلهه بايدي.. حتى يرخي عليه ..حتى صوتي ماطلع..كمت اتفاهم وياه بالاشارات..هوة كام يضحك عليه..كالي شبيج حبي..تاشرين شنو خرسيتي..صوتج وينه سمعيني صوتج..كتله شاحجي.. رجلي ويحبني شريد بعد.. ماعندي اي كلام اكوله..سكتت..وبلحظه..ذرعانه القواي حاوطوني.لفهم على ظهري..ايد يمشي بيهه على شعري..والاخرة..على ظهري..ركبي سافن..وكمت ابلع بريجي بالكوة..ما اعرف شاسوي بهيج موقف..كتلكم جنت ناويه اخبله..ههه جذبت عليكم..ترة اني فاهيه..بهيج لحضات..طلع صوتي ..مبحوح..كتله..حبيبي ركبي ما دشيلني..يرحم اهلك خل نكعد..هوة ضحك..لحد ماطلعت دموعه من عيونه..شالني ومشه وكعدني بحضنه..كالي بعد شوفي شراح اسوي بيج..كتله باله لاتزيد خوفي هوة اني كوة مسيطرة ..بدت اديه تفرك بجسمي فوك وجوة..واني احس برعشته..ودكات كلبه..اللي جاي تزيد وجان تتلاكه شفايفنه ..بوسات بدت هادئه..وتطورت وصارت اقوة..يبوس ويحجي بهمس..بصوت رجولي..خشن..احبج زينتي..احبج..يروح الروح..سنين واني اتاني هاي اللحظة..املكج وبرغبتج..
انتي ساكنه مهجتي..بيه نار تحركني ..من تبتعدين..انتي ساكنه جوة بالكلب..انفاسج ترد بيه الروح..وحياتي ماتكمل..الا بيج..
اني ما لكيت اي حجي حتى اكوله..ولا عرفت شلون ابوس..ولا اجاوبه على اسئلته..بس جسمي خايني وياه..الرعشه مالت الخوف..راحت..اجت رعشه حب ورغبه..اهاتي طلعت مني..من غير وعي..لذة شفايفه..وهي تتذوق بجسمي..العذري..انوثتي نفرت بلحضات زيارته عليهه..كام يستكشف كل جزء من جسمي..واني اخذتني الخدرة بلمساته ولحساته..نسيت اني جنت خايفه..لكيت روحي اتجاوب وياه..بعفويه..هوة ورجولته اكتسحني كلياتني من اعلى راسي الى اخمص قدمي.. بحنيه..وبمعزة..وبوحشيه..اديه خلتني..احب لمساته..وكمت ابادله لمساته ولزماته..وما احجيلكم على عرض صدرة..سرحت بشعرات صدرة..اللي اشتهيتهم من اول ما شفتهم..صدرة لافحته الشمس..وقوي..ذرعانه..قويه ومعضله..ايدي اجت على صدره..وغطست بنص شعرة..اني الهث واسمه مانزل من لساني..بلال..بلال..بلال..طبيت بدنيه غير دنيه..لا عمري جنت احلم بيهه او جنت افكر احلم بيهه.. جنت احلم برجال على فرس ابيض..طلع فارس على فرس اسود..غطست..بعالمي..اني وبلال.. وما اعرف شلون وصلت للفراش..ولا شلون اليتك واللي جواه انزعن..عشت ليله ولا بالاحلام...(يمكن اتانون اكللكم شلون نامو..لا لا عيب..رجال ومرته..انتو شدخلكم...ههههههه) ختمتهه بدمي على الجفيه مالت الشرف ..هديته كلبي وعذريتي..ومن كل جوارحي ومن كل كلبي ..ومامتندمه ..تمددنا حتى نرتاح وهوة حاضني..يبوس بيه من كصتي ..كل شويه..كالي مبرووك عليه وعليج زينتي..مرتي.. اكولهه ترس حلكي..ضلينه نضحك وغركنه بالعسل...كمت اشوف الدنيه ..بلون وردي..كلهه حب ورومانسيه..مغركني بحبه..وكلامه العسل..الصبح والنهار والليل..يتريك وياي..من الصبح ويطلع ويه العمال..وللكاع..يروح عليهم والظهر يرجع ينام يمي..ويطلع العصر..ويرجع بالليل بعد ميروح يشوف اهله ويطمن عليهم..ونضل اني وياه نسولف سوالف حب وعشك..مايعوفني لا ليل ولا نهار..يشتغل بكل امانه وهمه..ربي يحفظه وينطيه حيل وقوة..جانن البنات يجن ..يكعدن وياي ساعه نكعد نسولف لو نطلع بالمزرعه نتمشى ..وجانو رجال بلال يلحكونه يأمنون علينه..وبعدين ياخذوهن ويرجعوهن لدارهم..ايام العسل ما دوم هواي..ولازم تخلص..واني اكو حجايه دائما جنت ارددهه من تجي ايام العسل لازم تصير شغله وتفسدهه..والعسل يصير مر..بس جنت اضمهه واكول لا..لا..اني مطمنه منه ومن حبه اليه..ما مخليني اتنفس غيره..كلبي يكلي اكو مصيبه راح اتصير..اهلي مراح يسكتون..ولازم يردون الثار..وخصوصا اني انهزمت واجيت عليه..اعرف مراح يفوتوهه ..راح يضموهه ..
وبليله من الليالي بعد ماسهرنا..ونمنه..الباب اتكسر من الدك..فزينه اني وبلال ع صوت الدك والصياح..بلال طلع يركض حتى يشوف شكو.. واني اعرف ماكو غيرهه امه..اي ليش اكو غيرهه..لما لبست ملابسي ..اسمع بيهه تولول..وتلطم بوجهه..بايدهه..كالتلهه يبوووو يابلال وليدي اختك علياء..ما لكيناهه بفراشهه..جوي لدارنا واخذوها..من عدنا..ياوويلي ع الرجال اللي خليتهم يحمونه..ياويلي ع روحي..وعلى بنيتي ..وعلى عرضي..انته نايم وتتهنى بدارك ويه مريتك..واني ياخذون بنتي . .. اوووف ربي النار ماتبرد بصدري الا ترجع علياء..تحجي وتلطم على صدرهه..وبلال يهدي بيهه..اني اجيت اريد اطيب خاطرهه بكلمتين..وياريتني ما اجيت..رزلتني ذيج الرزاله وكالتلي وخري من يمي كله منج ..يا بومه..يا وجه الشوم..ماكو غير اهلج ورة خطفان بنتي..رديت عليهه بدون وعي كتلهه مثل ما انتو خطفتولهم بنتهم...مو..حرام علينه وحلال عليكم..ما اعرف شلون كلتهه وما اقصد وحدة بوحدة اني حبيت ارد عمتي ام بلال.. بس ومن غير قصد ضوجت بلال..باوعلي بعيونه بنضرة موت وكالي..شلون زينه..انتي تدرين اني خطفتج ..لان احبج..وهمه خطفوهه حتى يذلوهه ويذلونه..حتى يباوعولنه بعين مكسورة..ومن كلامه حسيته ضاج..وتندمت على كلامي..
امه كالتله..اي عيني انته ابقه العب وياهه وتونس وحب..واختك ما يعلم بيهه الا الله..ادعي ربي هوة ياخذلي حقي منكم..
بلال كاللهه يمه اهدي اني ارجعهه حتى لو اموت ماكو واحد يتجرأ ويتعدى على عرضي..واللي يرشنه بالمي انرشه بالدم...اني كام يفور الدم بعروكي..معناهه يقصد اني..ويريد يتعدى على اهلي..ما سال امه واهله..ما كاللهم اللي يصير علناس لازم يصير علينا..واكيد اللي يتعدة على زرع الناس يتعدون على زرعه..وانته بديت والبادي اظلم...انته مو احسن منهم بس اللي اعوج..اعوج..عمرة ماينعدل...اني حاسبيني مثل الجلبه..بس بنتكم بنت شيوخ ...استاهل اجوة بالنار...
بلال عيط بعلو صوته..بغضب وصوته طلع مثل الرعد...زيييييينه..ورفع ايدة حتى يضربني..وامه لكتهه فرصه حتى تشفى بيه ..كالتله..ونوب شامته بينه..اي لان دمهه مثل دمهم يمشي بعروكهه..هاي زينتك..اللي وكفت بوجوهنه..علمودهه..اشبع بيهه..
جان يهفني راشدي .بايدة..ايدة اللي ما شوفتني بس المحبه والحنيه..وبلساني فتحت بيبان..على روحي..ما جنت محسبتلها حساب..بالراشدي مالته نسيت ايام حبه ..الشياطين ركبتني..والدنيه الورديه صارت سودة مضبضبه..
ماجنت اتصور ولا اتوقع..انو بلال ..يمد ايدة عليه ..حتى لو بالجذب..واني ماكلت شي جذب..ولا كلت شي مو صحيح..كلت الحقيقة واكيد الحقيقة مرة..بالاخص من تسمعهه من غيرك..وبوجهك..اني مسيت الوتر الحساس لبلال..ونوب جتي امه شعلت نارة بالزايد..هيه بدت وهوة كمل..واترزلت وانهنت بداري..وجدامهه ..ومنو!!هوة اللي عفت الدنيه كلهه ولحكته..لحظات مرة....حسرة احس بكلبي..بس مابجيت لاكدامه ولا كدامهه..ولا زعلت..بس يمين الله الا اردله الصاع صاعين..واله اخليه يعض اصابيعه ندم..عفتهم ورجعت لغرفتي..بس استاهل لان كله من جوة ايدي..شكد نركض ورة كلوبنه ونترك العقل وبلحضه نرجع ونكول..يا ريتني ماسويت وعملت..بس هوة الغلط وياي..سمعت الباب انفتح..وكفت اتانيه..دخل لبس دشداشته..وما باوعلي داير وجهه..اباوعله..شفته هواي متعصب وايدة ترعش..ودماراته مبينه ..
كالي عندي كلام لازم احجيه..اني احتقرته..وما جاوبته..ولا باوعت عليه..باوعلي كالي هاا زعلانه زينه..وماتردين..مايسوة بعد الحجي.. خله وطلع..اني بكلبي كتله الباب يوسع جمل..اشو دارنه وبعد ما ارجعلهه..واذا اريد اروح اروح وابجي..حتى يسامحوني والدم مايصير مي..بس لا مو اني اللي تزعل من اول مشكله..واطلع من داري..ما اريد اضيع حبه اليه..الا اندمه واخليه يطلب السماح ..مني..عبالكم اسامحه..لا ما اسامحه الا يعتذر مني واخذ حق الراشدي اثنين..مديت ايدي على خدي..اتلمس اثر الراشدي مالته..مو كالو ضرب الحبيب مثل اكل الزبيب..جيت ادعي عليه..بس كلبي مانطاني..انجطلت بالفراش بلكي انام..زين علياء شنو صاير بيهه ما اتمنه يصير بيهه شي ان شاء الله ترجع بالسلامه..مهما يكون هيه بنيه مسكينه..الله يسترهه..بس اخواني رياجيل ولد شيوخ ..مايسوون العيبه..اكيد هسه واحد منهم يزوجهه.
لمعت عيوني..وكلت اي هايهيه..بنتهم عدنه واني عدهم..بلكي يصفى الوضع..والايام تمشي بسلام..اوي واني شيخصني.. لفيت راسي ونمت ..
بلال يحجي وي روحه ويكول... اوووف ياريت ايدي انكصت ولا مديتهه عليهه..شكد تندمت لان كسرت كلبهه..هيه ما كالت شي غلط..اني احبهه وكلبي ذايب بيهه..شلون اخليهه ترضه عليه.. عافت اهلهه وناسهه وكل شي وراهه..واجتي وياي..واني بلحضه غضب زعلتهه ومديت ايدي عليهه..اوووف..خليني اشوف سالفة علياء وبعدين التفت لزينه..
اخذت امي وهي تبجي وكلبهه مثل النار صاير..واني حجيهه يدخل منا ويطلع منا..لميت الرجال وقسمتهم وانطيت لكل واحد مهمه..ومشينه لديرة زينه..آآه يا زينه..وشسويتي بينه..مرة ثار..ومرة خطف.
بس مهما صار تبقه زينه مكرمه ومعززة يمي..بس ما جنت اضن علياء هيج يسوون بيهه مهما كان احنه ولد شيوخ..وديرة وحدة.. ونفهم بالاصول..والعرض عدنه اعز شي..بس ان شاء الله نلحكلهه كبل ميصير اي شي...ورجعت بتفكيري بزينه..لازم اسوي المستحيل وارضيج..وجتي ابالي فكرة..بلكي ضي العين ترضه..كلبي كام يوجعني عليهه..راح اتخليني المسهه مرة الخ لو ماتخليني..بعد ما امد ايدي عليهه..شكد اتندمت..مشينه اني ورجالي حتى نخلص علياء اختي..كلبي بين نارين..نار اختي ونار زينه..لان زينه هم مرت بهاي اللحظة..والدنيه دوارة يوم الك ويوم عليك...وللحكايه بقيه
