#ثار الدم
#ليوثي المياحي
_9_
احس برجليه..يبسن.وما بيه اتحرك..وضهري كام يوجعني حيل.. احسه انكطم صار نصين..حاولت اتحرك بس ما كدرت.. زحزحت روحي.. سويت نفسي بلال ..وثخنت صوتي.. كمت اسب واشتم بيه كتله انته منو.. ومتعرفني .. جان..اسمعه يضحك .. كتله اووووف منك ..الله ما ياخذك.. كالي .. الله ياخذني ..ومنهزمه مني..اجه عليه وجرني كالي تردين تنهزمين وتخليني..عبالج نايم وماكاعد..اني احس بخطواتج حتى لو ماتمشين.. وجان يضحك وكالي بس صوتج كلش حلو ...هههه يشبه صوتي..وملابسي لايكاتلج..كتله مو وكتك تقشمر عليه..ماناقصني بس انته..وحجيك الماصخ..ردت امشي خطوة مكدرت كمت اصرخ من الوجع..كالي شبيج...كتله يمكن انكسرت..من الجرة مالتك..كافي عاد عوفني صايرلي مثل ضلي..يرحم والديك عوفني..
كالي انتي تحجين من عقلج..اني ما اعوفج.. ياله كومي خل ارجعج لغرفتج..كتله بجاه محمد عوفني اعتقني لوجه الله..درت وجهي عليه حتى اشوفه..كمت على رجلي حتى اتحرك..كمت اصرخ من الوجع وابجي ودموعي عشرة عشرة..من الوجع ومن حضي الاغبر..
هوة جان يتابعني بعينه..اجه يركض عليه اخذني وشالني..بحضنه..كالي كافي تعاندين وتكابرين..راسج مثل الحجر..لازم اكسرة الج..حتى تخافين.. اني حلتلي الشيله والحضنه..ضمني على صدرة..كلبي كام يفرفح..يريد يطير من مكانه..اني لبدت بحضنه حسيت بالوجع خف..خليت اذني يم كلبه حتى استمتع بسماع دكاته..حسيته هوة هم يرجف بداخله..اي حاسه بيه..ابتسمت..الله انطاني كلب ثاني ينبض اليه..حتى اعيش اجمل احساس..
دخلني لغرفه النوم نزعلي الكالوشه من رجليه.. ..
رجلي ورمت..وازركت..من شافهه كالي لاتخافين رجلج مفصوخه..جان كام وجاب مي ثلج وسوالهه كمادات..واني اتالم واتاوه..وبغفله مني جان..يسحبهه ويفرهه بقوة..اني عطت عيطه وصلت حتى يمكن لديرتي..فززت بيهه الدار..بس رجعت لمكانهه جان يدهنهه بدهن زيت الزيتون ويلفهه...
كتله..شكالك كلبك من كسرت رجلي..كال اني اكسر كلبي وما افكر حتى ااذيج..كام يباوع عليه وعيونه بيهن نضرات لوم ..مرتي بس متحجي وياي..مرتي..بس متسألني تعبان..مرتاح..اكلت ..لو جوعان..مرتي اللي عايشه وياي غريبه..بغرفتي..مرتي اللي تتجنبني وتتجاهلني..مرتي اللي جانت تريد تنهزم كبل شويه..؟؟؟خليني ساكت..وضام القهر بكلبي..وتنهد تنهيدة من كل كلبه..حسيته..يلوم بيه.. بس الله كاتبلنه هيج..شي مو بيدنه..
كتله بله تعال نحجي بالعقل..ليش ماترجعني ..وتنتهي حجايه الثار..ويادار مادخلج شر..
كالي ..باعي زينه..ركزي بعيوني تلكين انتي ساكنتهه..شوفي كلبي..تلكين انتي نبضاته..اسمعي انفاسي ..تلكينهه انتي..تصنطي..لدكات كلبي..تلكيهه انتي..شلون ابتعد عليج..وارجعج..الهم..انتي روحي اللي بجسمي..شلون تردين اعيش بلايه نبض..ولا نفس ولا نضر عيوني..بالمختصر..ومن غير ما اتعبين روحج..روحتج الاهلج..يعني نهايتي..وافتهمي وحدج ..الباقي ...
رفرف كلبي ...ساعة يحن وعشرة يجن..حجيه مثل السحر..وصوته من يحجي عليه..بيه بحة حنيه..تسحر..يحجي ويباوعلي..بعيونه..نضرته تذبح..يخليني محبوسه بيهم..انهار من الحب تنبع من عيونه..لكيت روحي اغرك..اغرك..بعسل حبه..الي...فزيت من الحلم ع كرصة وجع..
كالي انتي حسيتي بيه..اكو شي تحرك بداخلج..كلبج ما لجمج..ليش تنهزمين مني زينه..وين تلكين كلب مثل كلبي..
الحجي ماله كلش حلو.. احس حبه راح يجلطني..بس كل ما اريد اتقربله يبعد عليه..سكتت والسكوت اضمن وياه..اووووف دخلت بمتاهة الحب وبديت اغرك شويه شويه..
بدت ايام من نوع ثاني وياه ...من ليلتها..من رجلي كامت توجعني..اني ابجي من الوجع ..وهوة بايت يداري بيه..من يمي ابد مايتحرك..اني باقيه اكتم بالوجع.. لا اكدر اكوم ولا اتحرك ولا حتى انام..هوة اللي يشربني ماي..وهوة اللي يشربني الدوة.. وهوة اللي يدهن رجلي ويبدل الضماد..نبقه كاعدين للصبح.. لحد ما هدء الوجع ..ونمت..جنت نايمه بحضن امه.. من صبح الصبح ..فتحت عيني لكيت روحي نايمه بحضنه..انفاسه منتضمه..وهاديه..وجهه مرتاح ..لكيته لاف ايدة عليه..لاول مرة تتلاشى المسافة بيناتنه..والكه روحي مبحلكه بوجهه من قريب كلش..نفسه جان بوجهي..يدغدغ وينعشني..شعراته منفوشات..وعيوني احولت.من شعر صدرة..يمه.كلبي كام يدك..وايدي كامت ترعش..وهيه تلمسه..شلت ايدي..وكمت اعين بروحي..ماردت اكعدة..شلت ايدة مني شويه شويه..وبعدتهه عن جسمي..حتى اكوم..هلى كيفي حتى لايحس ويكعد..حطيتهه على صفحته..وجيت اكوم من مكاني..نسيت رجلي..جان اعيط فرد عيطه..كام يركض مثل المخبل شبيج شبيج..من شافني اتوجع اجه وكام يفرك برجلي وكالي اوديج للطبيب..كتله لا..لا..شويه وطيب..اني وكفت عليها او وجعتني..
كالي اكعدي ارتاحي..اني اروح اجيبلج اللي تحتاجيه..كتله لا..لا..اني اعرف اتصرف..يحجي ويه روحه ..ويكض على اسنانه بغضب.. راسج الكوي شيلينه....
اجوني خواته..البنات ..والتمينه بحوش الدار.. وتريكنا سوة ..هوة يروح يتفقد..شغلاته..ويجي..يطمن عليه ويرجع..كضه النهار كله رايح جاي..وخواته يضحكن عليه من جوة ليجوة.. امه جانت تحجي وتسمع بكلامهه..تكول..ااااااااه ياناري..ع كلب الرجال.. عاف شغله وحاله وماله وكاعد يخدم بست الحسن .. يريدهه ترتاح..وهوة كلبه معلعل...
سمعهه بلال وعيط بساع ..صوته عالي.. يممممممه... سكتت.. شويه.. وهم كامت تحجي كالتله ..روح كضي اعمالك.. ولا تصفن ع ذراعاتهه.. شبيك وليدي.. سحرتك ...عوفهه خل تروح لديارهه اذا تريد ..بنات الديرة الحلوات يتانن اشارة منك.. وانته كاعد تتوسل بيهه .. ادخلت اخته رجاء كالت ما نعرف كلبهه وياك لو ويه اهلهه.. من اجتنه جابت كل المصايب وياهه..اني انقهرت..هواي ..
هوة راح على اخته رجاء وكاللهه ديري بالج تعيدين هل حجي راسج اكسرة تكسير..افتهمتي وانتي يا يمه..شبيج.. متشوفين رجلهه مفصوخه ..كالتله اي شفتهه بس كافي دلال..خل توكف عليها..وتروح لغرفتهه..كتلهه يمه شني السالفه.. شبيج.. كالت اشبع بيهه.. وخلتنه ومشت ..
اووف اكلت بكلبي وشربت..حجاياتهه..اتوجيت على ذراعاتي..مثل ماكالت هيه.. صحيح اني جنت بت مدارس بس مشتغله كل شغل البيت..البنات عاونوني..مشيت بنص الحوش..جانت ريحه الطبخ ترد الروح.. بلال زعل من حجي امه.. كعد بعد ما سبح ..كتله..تريد اصبلك تاكل..باوع عليه جان يحب يتاكد.. كالي وانتي تعرفين ..تطبخين اصلا..اديج..مالت كتابه بس..عرفته يقشمر ويتمسخر بيه..سكتت ومشيت اجيبله اكل..واني اعرج..باوع .كالي ما تعبين روحج اني اجيب الاكل..بلكوة جبت المواعين وخليتهن ع الطبليه.. كعد كام ياكل..واني رحت احضرله الجاي..بالمطبخ..حضرته وجبته اله..باوعلي وابتسم وكالي تسلم اديج..اني كلت خل استغل الفرصه واتقربله..واسوي اللي ابالي..كتله يسلم راسك..اريد اطلب منك طلب..نفض اديه..ومسحهه وكالي ..احجي ..كولي..اني كمت اعصر باديه خايفه من ردة فعله..كتله اريدك توديني اشوف امي من بعيد وارجع....
هوة غص باللكمه بحلكه ..وكام يضرب كفاه بجمع ايدة.. وبقى يباوع عليه بنضرة تخوف ..الله يستر منهه.. وللحكايه بقيه...
