#ثار الدم
#ليوثي المياحي
_18_
اركض واسابق الريح..حتى الفرس مالتي يمكن حست بيه لان كامت تركض بكل سرعتهه..العجه بعلو السمه ورانه من طربكة الخيل..وسلاحنه..جاهز..اذا ماخذينهه اله اخليهه مجزرة..خل اوصل واشوف اذا طلعو همه الا اكتلهم كلهم وابرد نار كلبي..الليله مرتي متبات بحضني..هاي السالفه ما اقبلهه ابد..طول عليه الطريق..وهذا كله واحنه ساكتين..كلهم يعرفون حالتي..وما تكلم ولا واحد منهم..وصلنا لاطراف الديرة مالتهم..اني كبل هديت على ديارهم لا خايف..واعيط وصيح وخبصت الجو..باعلى صوتي..
محمد ..احمد...علي...اطلعو اذا انتم زلم ..شوفوني شكولكم..مو تعملون عملتكم..وتختلون..كلهم جوي يتراكضون..ام زينة..تتعثر بفوطتهه ..علياء اختي وجهه منور وحلوت هواي..لو الوكت غير وكت..جان نزلت بوستهه وضميتهه على صدري..وعمي علي ابو زينه.. اجة يركض من صريفة الهوايش...
علياء كالتلي مرحبه اخوية ..شبيك..شنو شصار..
ام زينة..كالت ..وليدي شكو خير شبيك عصبي وصيح..شكو..
ابو زينه كالي شبيك بلال تعيط من فوك الفرس مالتك..شنو شصار..
كتلهم شنو تريدون تجلطوني..تردون تموتوني لا تسوون روحكم متدرون..ولا مسوين شي..
كتله عمي قدرك جبير وعالي فوك راسي..بس من اولادك يضربون رجالنه.واختي رجاء وياخذون زينة ..هاي ما اقبلهه ...
ام زينة وكعت على ركبتهه وتلطم بخدودهه.. يمه..بنيتي ..وكامت تضرب راسهه بديهه..علياء لزمت اديهه وكامت تصبر بيهه وعمي علي لزم حلكه وكالي بس اولاد عمك بالكاع من الصبح..اجوي تريكو ورجعو لشغلهم..مو احنه اللي انسوي هيج طايحات..احنه كلوبنه بردت..من دخلت علياء علينه..وبعد ماوصلنه ديرتكم..واولادي مايكسروون كلمتي ابد..
فكري تخربط..شنو معناهه...زين مرتي وين..ومنو اللي يعمل عمله جبيرة مثل هاي العمله..
خالتي نجاة ام زينه..كامت تضرب وجهه باديهه ..حبيبتي بنيتي..ماتهنيتي يومين..جتج هل مصيبه..وج يمه وينج.هسه..
نوب خالتي زيدت همي وحيرتي..كالتلي ..وليدي اللي عمل هل عمله اريدة يتعلك من رجلينه..اووف بنيتي..
اخذني تفكيري ..لعريس زينة الاولي..كتلهم اخذوني عليه..كالو عمي علي ابو زينه..دز جماعه علية هوة والولد..اخوان زينة..كمت اتانيه ع الجمر ..الحوش طركته طرك رايح جاي..اول ما دخل..رحتله وجريته..من ياخته..ردت اضربه بس الولد وكفو بيني وبينه وماخلوني اضربه..بعد ما فهموه الموظوع..لزمناه وبقينه نحقق وياه..حلف بالله اذا جان شايفهه..او يعرف منو خطفهه..هددناه كناله اذا نعرف انته ورة هاي السالفه راح نكتلك..وماتلوم اله نفسك..
بعد ما راح كلنه نرجع لديرتنه احسن بلكي نسمع خبر ..منا منا..الولد لمو غراضهم وخلينا رجال تحرس دارهم وطلعنا كلنه..خالتي نجاة..وعلياء جابو غراضهم واخذناهن ويانه..رحت وحدي ورجعت بثنين..وزينة مو وياهم..واني كلبي يريد يطلع..وين رحتي يابعد عمري ..شبعانه..جوعانه..متغطيه لو عريانه..؟؟نفضت راسي ..ماحبيت افكر باحتمالات موزينه..اكيد مرتي بخير..وراح الكاهه..واكتل اللي سواهه..كلبي وجعني..جانت مشتهيه بطيخ..وستوني ارد اروح اجيبه اللهه..حسيت دموعي بطارف عيوني..مخليتهن ينزلن..اني اللي مادمعي نزل فديوم..رميت كل الافكار الموزينه ورا ظهري..الكل غركان بهمه..عيون مدمعه..وكلوب مكدرة..وزفرات حارة ..آ آ آه ياويليييي..وينج زينه ..وين اخذوج..ياكلبي..اخذوج وخلوني هايم..بدمعي..ما اكدر على فراكج..حبيبة كلبي انتي..زينة..
اول ليله.. زينة تبات مفاركتني..حاس روحي..دا اموت..مشاكلي كثرت..والمصايب زادت علية..بس هاي المصيبة..كسرت ظهري..الليله زينة بايتة يم ناس ثانيه..اخذهه نهار..وطلع عليهه نهار جديد..اريد اضرب راسي بالحايط..حتى اصدك اللي صار..عبالك حلم موزين..بس هاي حقيقة..امي وابويه ورجاء..واهلي الكل بالحوش كطعت الرجا من كل اللي جنت شاك بيهم..من اهلهه..حتى عريسهه القديم اللي جنت متصورة هوة طلع موهوة لان نكر كدام عمي علي واولادة..
المهم تلاكو العائلتين..تلاكو اولاد العم..بعد كطيعة وثار سنين..بوكت مامحدد انجمعو..ابويه اخذ عمي علي بالاحضان..ويبجي من فراك سنين..ما عرفت يبجون من حلاوة اللمه لو من كبر مصيبتي..امي وخالتي نجاة ..وعلياء ورجاء..تلاكت العيون والكلوب..بحيرة..وكت بدل متكون فرحة ..لمه كطيعه صارلهه سنين..وسنين..حسيته جبل جان جاثم على صدري..ماخلاني اتنفس..ضاك صدري وكمت كوة اجر النفس رحت اركض للداخل بللت وجهي..بالمي بدون ما احد يشوفني..امي حست بيه لحكتني..خلت ايدهه على جتفي..
وليدي..هسه تلكاهه..اصبر وشد حيلك..رميت روحي بحضنهه ولو ان البجي عيب ع الرجال..هيج ربوني اهلي من الزغر ..مرغت راسي بصدرهه..وبجيت حتى صخنت..ردت اصرخ صوتي ماطلع..شلون حالهه هسة مرتي ..نوب شايله ابطنهه وليدي..اووووف كلبي كام يعصرني عصر..امي كامت تبجي ..كالتلي..على كيفك على روحك يانضر عيني..لتخاف عليهه ..منو يتجرأ ويمس شعرة من شعر راسهه..وانته ابن شيوخ..
ما ادري شلون تذكرت..امي ومعاملتهه لزينة..فتحت عيوني مثل الفناجين..كتلهه يمه..اخاف اطلعين انتي ورة هل شغله..امي رجعت خطوتين..وباوعتلي وهيه مدمعه..مسحت عيونهه وخشمهه بطرف فوطتهه..وكالت..لا..يمه لا..يبن بطني..تريد تلزك بيه التهمة..شايفني مشتغله ويه عصابات كبل..لا يوليدي تطمن ما اسويهه..كتلهه حشاج يمه..بس انتي جنتي ماتحبينهه..
كالتلي اي صحيح ماحبيتهه بس مو معناتهه اضرهه اي صدك اني وياهه مامصالحين بس حجي لسان نسوان..بس مال اخطفهه ..وراسك ما اسويهه..ونوب فوكاهه حامل..مهما يصير اني هم ام واحس بغلاوة الضنه..
كتلهه لعد منووو..يمه..منو راح اتخبل..مخليت فكرة براسي ما كلبتهه..راسي راح يطك..كالتلي..لا..لا..وليدي بعيد الشر عليك..هدي روحك لازم نلكاهه ..
كتلهه يمة زين اخاف مفيدة بنت عمي..
كالتلي لاتضلم احد وليدي.. ولا تتهم اذا ما عندك دليل..تحب اجيبهه واستجوبهه..جدامك..جان تطلع..وجيبهه اجرجر من اديهه..
كتلهه ..احجي افتحي حلكج..تعرفين وين زينة..؟والله اذا جانت عندج او جان الج ايد بالشغله..الا اسويج نصين..كالت الامي..واني شنو عمتي..وشدخلني اني ..ومنيلي رجال حتى ادزهم ويخطفون زينة..ومنو يخلينه اصلا نحجي ويه الرجال..كلبي يمك ابن عمي..صحيح اني اكرهه وانته تعرف السبب..بس متوصل لدرجه انو اني ااذيهه..ربي يهديكم..ومصمصت شفايفهه وطلعت..
امي كالتلي ..وليدي..هدي روحك واطلع لعمامك..دخلهم بالدار خل نفرح بيهم..بعد فراك سنين..وارمي حملك على الله ..
طلعنه ودخلنه عائلة زينه بالدار..ابوية كال نذبح الذبايح..على رجعت لمتنه..ونسيان الثار..عمي علي ابو زينه حلف مايسيل الدم الا برجعة زينة..
اني عفتهم..الكاع ماتوسعني بعد..اخذت روحي ورجعت للمكان اللي ضربو زينه بيه..لكيت ..دناديشهه وقطع من زينتهه ع الكاع..شلتهن وكمت اشتم بيهن..كلبي احترك بنار..اللي اذاج زينه..حر ويشتم الهوة ويتفرج شيصير بيه..دمي فار..رحت للدار..ظلمة تكتل من الوحشة..طلعت منهه هارب لا سايعتني كاع..ولا طايلتني سمه..
رجعت لدارنة..ناس طابه وناس طالعة..والناس تحجي..على مرت بلال فارس ديرتنه..خطفوهه ..واني عقلي طاير مني..احس الناس بس تتشاور علية..ابويه كالي بلال ترة اني دزيت وبلغت الشرطة..انوب خله النار ازيد بكلبي يعني حقي ..يجيبه غيري...لا..لا..حسيت برجفة تسري بجسمي..واعصابي.. وكوة شايل روحي...دخل سلوووم الوشام وشاور ابوية باذنه..وراح..
ابوية ..العيون كلهه تباوع عليه..وتنتضر يحجي..ابوية حاول ما يرتبك ويخلي روحه طبيعي ...محمد اخو زينه..افتهمهه..وعمي علي وكف وكال الابويه احجي شسمعت ..
ابوية كال..كال..عمي كاله احجي ولا اضم علينه..ترة كلوبنه خلصت..
باوع عليه وعيونه موجوعه..رمى حجايته..مثل القنبلة..كالي..وليدي..شد حيلك..وما اريد اسمع بالحوش لا عياط ولا لطم..ولانديب..سمعتو.
اني ركبي وكعن بركت بالكاع..ابوية شالني اوكفني..كالي انته رجال ..شد روحك..ميصير توكع..وانته فارس العشيرة...الشرطة.. دزو علينه..جاهم خبر لكو مرة ذابيهه بالبير..مذبوحة.ويردون نروح انشوفهه.. ونتعرف عليهه..
رجليه ما كدرن يشيلني...وكعت..وماكدرت اكوم مرة الخ..العياط طلع من كل مكان..ابويه صاح صيحة بعلو صوته...
اريد وحدة تفك حلكهه حتى ابتلي بيهه ..سمعتو لو لا.. تردون تموتون المرة كبل وكتهه..ما اريد احد يفتح حلكة..جان يلتفت علية وكالي اوكف ترة المرة ماماتت..خل نروح نمشي ونشوف منو يكول هية.. اجة علية..يكوم بيه بس ما اكدر اكوم..جسمي تيبس مثل العصا..وكثر النوح والتولول..امي تكول.. اويلي يوليدي..وخالتي نجاة تكول..حبيبتي يبنيتي..جابولي..مي حتى اشرب واغسل وجهي ما كدرت اجرع المي..حسيته نار وزهر..كمت بالكوة امشي ما جنت اشوف احد بس خيال الناس جدامي..ابالي بس صورة زينة..امشي واتخيلهه مذبوحه وتستنجد بيه..والدم سايل من ركبتهه ومغمضة عيونهه..وابني اللي ابطنهه مات..ماكمت اعرف اكعد كمت اهذري..حرارتي ارتفعت..وكمت احجي شيش بيش..وما احس الا براشدي كعدني..فتحت عيوني..شي اقوة مني..كمت اجرجر برجليه بالكوة وصلت لحصاني..ابويه وعمي والولد كلنه مشينه..همة لكدام..واني وراهم همة يمشون خطوة جدام واني امشي خطوة ليورة..عمي سكت وما حجه ولا كلمة..حتى الدمع بعيونهم يلمع وساكت..كلوبنه ترف..امشي واني ما مسيطر على روحي.. سجاجين وتكطع بلحمي ..وصلنه للشرطة..ومن بعيد اخذونه..ودونه مشي للبير..بمنطقة خالية..واحد من الشرطة كال..هية مرة متوسطة بالعمر..شعرهه اسود..وثوبهه مشكك..ويمكن فاعلين بيهه كبل مايذبحوهه..
كتله بس انريد انشوفهه لان حبال كلبي كلهه تكطعت..اذا طلعت هية امووت..كلبي كام يرف ونبضي كام يدك ع السريع..دمي صار نار..يا ربي ماتطلع هية..كمت الهث..فقت على روحي لكيت ابوية لازمني ويجر بالحصان وراه..وصلنة..لحد البير..لكينة الشرطة محاوطين على شكل دائرة..والجثة ممدودة..بوسطهم ومغطية..
كالو خل يجي ابوهه رجلهه حتى يشوفهه ويتعرف عليهه..
اني مكدرت اتقرب ولا عمي ..كدر يتقرب محمد اخوهه هوة وخر الغطى اللي مغطينهه بي..اني انهزمت ورجعت كعدت وراهم والدموع غركتهه لعيوني..لا فارس.. بعد..ولا خيرة رجال الديرة...كدام زينة ..اني ما اسوة شي..كمت اموت بخوفي وبحسرتي..رفع الغطا شوية الشعر الكحلي..بين شوية واني ضميت وجهي بين ادية..وكلبي يدك ..جان محمد يعيط..لا..لا..مو هية..موهية..هوة يصيح بفرحة..واني وكعت على ركبي بجيت..وبجيت..حتى ماعاد..صوت البجي يطلع..كلهم جوي علية ويسكتون بيه..والدموع مثل الوديان تجري..غصة كطعت كلوبنة..والحمد لله خلصنة منهه رجعنة مكيفين.. وفرحانين رغم انو احنه مانعرف مصير زينة..صعبة انك تتعرف على جثة حبيبك..من صدك دمار يهد الحيل..
وصلنة لكينة امي وامهه مسويين مناحة بالحوش..والنسوان داير مدايرهم يسكتون بيهم..وماصدكو بينه الا بطلعان الروح..خليتهم ورحت لداري اشتم ريحة زينة..احب اشوف هدومهه..واتخيلهه كدامي تفتر بالدار..اتخيل ضحكتهه تجلجل وصوت لخلخال يرن..ادور وعباتهه بايدي..مرة احضنهه ومرة اشتم ريحتهه ..ضليت كاعد للصبح..منين يجي النوم وزينتي بعيدة علية..؟؟آ آه يا كلبي..اتاني الفجر حتى اطلع ادور عليج..بس وين الكاج..كلبي صاير نار عليج..اريدة يبرد..لان الموت قليل ومايوفي حبج..وللحكاية بقية..
بس المرة..وين..؟؟ترة اني ضيعتهه..وما ادري وين الكاهه..تاهت علية ترة؟؟؟هههههه
