#ثار الدم
#ليوثي المياحي
_17_
محمد دخل.. وعلياء خافت..اول مرة تكون ويه رجال غريب عليهه ولوحدهم بغرفه وحدة....الناس واكفين برة يتانون النتيجة ..لازم تكون قويه..حتى تكدر تساير الوضع اللي خلوهه بيه..كامت ترجف مثل كصبه وهب عليهه الريح..راسهه مدنجته وماتكدر ترفعه من خجلهه ومستحاتهه..محمد يمشي خطوة ويوكف خطوة وحاله مو احسن من حالهه..حاس بروحه جاي يصعد جبل ..بس القضيه مابيهه تراجع..الليله لازم تكون علياء مرته...هوة لا راح عليهه ولاشافهه..وعمرة ما جان مفكر بيهه..من جانت طفله..ماينكر هيه عجبته..من شافهه..وسمع حجيهه..صحيح زغيرة بالعمر..بس جبيرة بالعقل..شرفته ورفعت راسه..من حجت ويه ابوهه واخوهه..وكبرت بنضره..اللي جابهه بذيج الليله ع الحصان وخلاهه يم امه..وبنات عمه..حتى ماتحس بالغربه..هياتهه كدامه كاعدة مثل البدر المنور..مكحله..ومحمرة..ومحنايه والعطر تفحفح ريحته..منهه غمض عيونه وفتحهن..حتى يصدك انو مو بحلم ..تقرب عليهه وكعد بصفهه ..راد يحجي..بس الحجي كله خلص..تنحنح..باوعلهه لكاهه مدخله ايدينهه وحدة بالخ وتعصر بيهن..مد ايدة ولزم ادينهه الزغار..هيه رفت مثل عصفور..وحلوه من القفص..ضغط بادينه على اديهه اكثر..طلع صوت خشن ..يحجي بهمس..عليا..لا تخافين مني..انتي صرتي مرتي..وعرضي..اعرف صعب كل اللي صار..بس هذا مقدر ومكتوب..مانكدر نهرب منه..بلال قنع ابوج علمود يخطف زينة...واني ابويه هوة اللي قنعني اخطفج..واني مانادم ..والله مانادم..ارفعي عيونج وباوعيلي..ماكدرت عليا تحط عينهه بعينه..رفع راسهه..كاللهه ست البنات ..كبرتي بعيني على جوابج وحجيج..اني راح اخليج بكلبي واقفل عليج..لا تخافين مني..راح اضمج بين جفون عيوني حتى مايشوفج احد غيري..وراح احبج واحافظ عليج..وما تشوفين مني ..بس اللي يرضيج..اذا رافضتني ومالج واهس بيه كوليلي..او هزيلي راسج حتى اعرف ..وصدكي ساعتهه مراح اتقرب من يمج ولا حتى اطخج..واني اعرف شلون اتصرف ويه الناس البرة...
بوكتهه عليا حست انو لازم تجاوبه وماتبقه ساكته..وتخلصه من حيرته..كالتله..لا..لا..هذا حقك..وشرع ربي ومو اني اللي تخذلك بوسط اهلك وناسك..اني ما اجذب عليك حاسه بالخوف والرهبه..بس حجيك هدة كل ثورة وبركان جانن ابالي..تقرب منهه زايد..لحد ما لزك بيهه..مد ايدة وشال البركع من على راسهه..وكعن كل الدناديش..والزينه..اخذهه ضمهه على صدرة وكام يفرك بايدة على ضهرهه..وشعرهه..ويهدي بيهه ويكللهه لاتخافين..اني ما اخوف..واني رجل ابن رجال..ما اريد اغصبج ولا اريد اعذبج..اخذي وقتج وشوكت متحسين روحج حاضرة اني موجود...باوعتله عليا بحيرة..كالتلهه وشراح تسوي ويه هاي الناس اللي كاعدة تنتظرك برة..لا..لا..اني ما اقبل عليك...زينة زينت ليلتهه ونورتنه..واني مو اقل منها..اني كدهه..بس انته سايسني وعلى كيفك..اني خيتك..كام يضحك ..لحد ما شبع من الضحك..كاللهه ماكو بعد خيتي..اخذهه بحضنه ..كاللهه اخيتي..وضحك ههههههه بعدج زغيرة .. لعب الكبار يختلف من لعب الزغار..
كالتله بالله لا تخوفني..كافي..كاللهه تعاي نلعب لعبه..وبعدين كوليلي شلون حالج..غطسو بليله عسل..سايسهه محمد حتى اخذ اللي يريدة منهه..وطلع فرحان بليلته..وهوة فخور بمرته..طلع بيهه بوسط اهله..والجفيه ملطخه بالدم العذري.. البنادق ماسكتت هلهلت..والمشاعل والطبول ماسكتت للصبح..اخذ مرته ورجعهه لدارهه..ونومهه بحضنه..فرحان بيهه وفرحانه بيه..في امل انو ينخمد ثار الدم..وتنطفي ناره..ولا تزيد..وتمتد بعد اكثر وتكطع وماتواصل ..وتكتل..ومتحيي..بلكي يختلط الدم..وتنتهي وحدة بوحدة..ولا تشتعل..هل نار وتاكل الاخضر واليابس...
******
اني جنت نايمه بالعسل عيون بلال كتلتني..وشم اسمي على صدره..كمل على كل اللي باقي بيه من حب وشوك..حبيب كلبي..وروحي..دكات كلبي زادت..ودمي نشف بعروكي..كمت اخاف اموت ناكصه عمر..من كثر الاحساس بالحب..وياه ..يمممممه..راح يدمرني حبه..حابسني بصدره وقافل عليه كلبه..ضامني بين جفونه..نهاري ظلام بدونه..وليلي عز ودلال..امه ماتحبني..ولا تحب تجيني..واني هم لا اروحلهه ولا اوصلهه
..لحد ما فد يوم عمي حمادي ابو بلال كاللهه..كومي حضري روحج يمرة خل انروح نزور ابنج ابداره..باوعتله وكالتله..لاه..ما رايحه..ولدي كل يوم يمي..تريد اني اروحلهه برجليه ولدارهه..لا ما اروح..
كاللهه.. انتي متستحين من روحج..ابنج عازمنه وكال الليله تجون ..
كالتله..اوووي اني ما اكل من ايد مرته..عمي كاللهه..سدي حلكج وراح ترحين وياي..
اني وبلال متفاهمين..كالي عازم اهلي كتله كل الهلا بيهم ..
حضرت العشه باجة.. بكد راس حماتي.هههه بس اريدهه تشبع وتسكت..اجوي اني فرحت بيهم..سلمت عليهه..شو عبالك لزمتهه رعشه..تكول جايه بالكوة..كعدو.. عمي حمادي..يحجي وهيه..ترد بيه ماعاجبهه شي..حضرنه السفرة وجبنه العشه اني ورجاء..
خليناه ع السفرة..الباجة الحارة ..و المكبعه..عليهه لحم ..وشوربه ...وزلاطة.وطرشي وخضورات....ملينه السفرة اكل وفواكه..كامو ياكلون ومكيفين..ويشكرون ويمدحون بتركيبي ..الا هيه..تاكل وهيه ساكته..كملنا لميت المواعين اني ورجاء..وكعدنه بالربعه..حماتي كامت تحجي..اني ورمت من يمي..حجياتهه تكول قنبله..تريد تكتلني..كالت.. يله نريد نفرح بجهالكم..خاف ناوين اطولون..او ماتردون جهال..عمي حمادي ردهه وكاللهه انتي شدخلج يامرة..رجال ويه مرته وهمه حرين..شنو جاي تحسبيلهم..ايام..
بلال باوعلي ..ميعرف شيكول..اني جتني كلمتهه مثل الطلقه بكلبي..رديتهه وكلتلهه..لا..لا.هلهلي خالتي..ترة اني حامل..حتى بلال بعدة مايعرف..حماتي طلعت من الربعه..ومارجعت..رجاء كامت تهلهل..عمي حمادي..كالي الف مبرووك بنيتي ربي يكملج بخير وسلامه..
بلال كعد ويفر بعيونه ما مفتهم شي..يباوعلي..وميكدر يسوي شي..ولا يكول اي شي..من راحو..واني اباوعلة..من جوة ليجوة ..وصلهم للباب ورجعلي يركض..كالي زينة تحجين صدك..لو ردتي بس تردين امي..ترة اني افهمج..
اني ضحكت.. واتدلع عليه..كتله..لا اني جذبت عليهه حتى تسكت..جيب ايدك خليهه على بطني ..وجريت ايدة وخليتهه على بطني..كتله هاي زرعت ثمرة..منك ان شاء الله تكمل بخير وسلامه..كام يفرك ابطني ..وما مصدك روحة عيونه كامت تضحك..وخشمه..وحلكه..
كالي الله عليج كولي لا جذبين عليه اني رجلج وحبيبج صدك انتي حامل..اذا صدك..اذبح ذبايح وافرقهه ع الديرة..
كتله اي والله صحيح..اتاخرت عندي ..اني شكيت..دزيت..رجاء على قابله هنا ..نادتهه وانت بالشغل..جت وشافتني..وبشرتني..حبيت اكلك كدام الكل وافرحك..
شالني..بحضنه..ويفتر بيه..الدار كله..راد يدوخني..واني اعيط..بس اريدة ينزلني..وهوة غركان بالفرحة..
كالي مبرووووووك زينتي..مبروووك علية وعليج..وعلينة .حبيبتي زينة..بعد ما اخليج وحدج.. هسة شسوي..اهلهل..لو اركص..لو شاسوي.
كتله ..مو وكت الفرح هسه..لان بعدني يا الله..خل تروح الايام الاولى ويثبت وافرح بكيفك..
اخذني بحضنه..وكالي الله يخليج اليه زينة..حبيبتي..فرحتي بهل دنية..اشوفج فرحانه..مليتي عمري عليه..الدنيه كلهه انتي بفرحهه وحزنهه..احبج زينتي..
كتله..الله يخليك الية..ولا يحرمني من دخلتك علية..ونمنه بعسل الحب..والايام تمشي..حب وهيام..وعسل مايخلص..كمت احبه هواي اكثر من الاول..وادلل عليه .. وهوة صابر على خبالي جنه نطلع اني ورجاء بالديرة نتمشه..نوبات انرتب بالدار..حسيت شويه خمدت نار الثار ..واطمنه وكلنه انتهت..
وبيوم من الايام بلال يشتغل بالكاع جان يجي عليه رجال يركض..ويصيح..بلال..بلال..اركض ضربوا رجالك وضربو رجاء واخذو زينة..
بلال يكول جنت دااشتغل بالكاع اسكيهه بعركي..وارعاهه..بدم كلبي..الشمس عاليه..اباوع على مد الكاع اشوف خيال اشوف سراب واوهام تطلع وتختفي..عركي يطفر..على كد محبه الكاع..اللي بيهه نولدت..ومنهه اعيش والهه ارجع..الرجال منتشرين بكل شبر من الديرة وبكل ساعه..اذكر حبيبتي..وابتسم..ونوبات اضحك بكل قوتي..واعض شفتي..من القهر..خبلتني وجننت عقلي..
الصبح..كبل ما اطلع..كامت من الفجر..اني اكللهه ابقي مرتاحة ولاتعبين روحج ..وهيه تهز راسهه وما تقبل الا اتحضر الريوك وزتني لباب الدار..
البارحه ..كعدت وهيه تنادي ..بلال ..بلال..بلال...
كتلهه عيون بلال.. حسبت الولادة قربت كتلهه بعد وكت يمعودة..كالت..لا..لا..ظهري يوجعني..من النوم..يله فز اشتم ريحة ما اعرف شنهيه..كتلهه ريحتيش بهل صباح..كالتلي ريحة ..امممم..ريحة بطيخ الشمام..
كتلهه هاي وين لكيتيهه..خلت خشمهه بصدري وتكلي الله ريحة شمام..هاي الريحه بيك انته..كتلهه هاي وين لكيتيهه..منين تريد تجيني ريحة الشمام....ضحكت وكلت مرتي سوتني بطيخة وتشمشم بيهه..ما ملصت روحي منهه الا..كلتلهه اجيبلج تركتر مال بطيخ..واني كاعد سارح افكر بكل هل سوالف ...ما احس الا جايني رجل من رجالي يركض ويعيط..ويتعثر..عفت كل اللي بايدي ودرتله..كالي اركض بلال اركض..ترة ضربوا رجالك..وضربوا..رجاء..واخذو زينة مرتك..ما افتهمت منه شيكوول..يعني شنو... اخذو مرتي..يعني ارجع لداري وزينة ما كو بيه..شلون..ما مستوعبهه ..عقلي كام ياخذ ويودي.. يعني وين تكون راحت..ومنو يتجرأ علية ويخطف..مرتي..قابل اهلهه..بس اهلهه مو عرسو على علياء وكلنه هدت الدنيه وهدينه..
ما اعرف شلون جريت فرسي..كتله وين..ومنين طلعو..شوفني..دليني.. كال..يم الدور المهجورة باطراف الديرة ..يم مزرعة عمك محمد..اولاد الجلب اختارو منطقه باطراف الديرة متروكة وعرفو بالوكت حتى يهجمون ...بس وحك ربي اللي خلقني..لو يمسوون شعرة من راس مرتي..الا اكتلهم اكتلهم..مشينه لكيت اثنين..من خيرة رجالي مضروبين وملطخين بالدم..ولكينه.. رجاء لافين راسهه ودايخه..اهل الديرة حايرين بيهه..ويغسلون بوجهه..فتحت عيونهه ..مضروبه براسهه..ودمهه سايل....باوعت عليهه كلت هاي العمله مو مالت رجال..لان الرجال ما يضرب مرة هاي عمله مالت جلاب..
كتلهه رجاء اكعدي..شنو شصار..
كامت تحك براسهه وهيه شادته من الوجع..
كالتلي..اخويه جته نتمشى اني وزينه..ونسولف..ما حسينه الا رجالنه ملطخه بالدم..ونوب ضربوني وضربوا زينة..ودوخوهه..واحد ملثم..منهم.. كالي..كوولي لاخوج..مرتك عندي..واذا انته رجال الحك وخلصها..وضربوني براسي وما دريت شصار بعدهه..
من الغضب اخذت حفنه تراب..وشمرتهه بالجو ..والله الا اشدة بالسرج واخليه يسحل لحد ميموت..
زينة وحك ربي اخلصج منه..واخذ حقج ثاني ومثلث..اخذت رجاء ورجعتهه للبيت..واطمنت عليهه..خليت ابويه وامي يمهه..ومشيت اني ورجالي..وتوجهنه لديرة زينة..كلت ماكو غير جابوهه لديرتهه..اخاف ليهسه مابرد..نار ثارهم..واذا همه اليوم افضهه وياهم..لان بعد ما اتحمل..كل اللي ديصير بمرتي..اركض واسابق الريح..ما احب اشوف زينة..تبجي ومضروبه..كلبي كام يوجعني عليهه..الي عمل هل عملة الا اندمه وادفعه الثمن..وللحكايه بقيه..
