#ثار الدم
#ليوثي المياحي
_26_والاخير
رجعو الجماعة..يباوعون على بلال..لكو البشارة بالباب..كل الناس تريد تطب وتشوفة..الممرضين والممرضات يباركولهم..على سلامة بلبل..اوووو قصدي بلال..منظر الرياجيل اللي بايته يمه..للصبح..ما تنسي..ما خلوهم كلهم يطبون..لان الزيارة جانت ممنوعه..لازم واحد يدخل وهم بالبوكة..ومن يطلع يدخل الثاني وهكذا..والاولويه اكيد جانت لعمي حمادي..دخل ورجلينه ترجف..اول مفتح الباب..عيونه تعلكت..ببلال..جان مغمض عيونه ..وجهه تعبان..دنج وباسه من كصته..ولزم ايدة..باصابيعه..اللي دماهه الزمان وخدمه الكاع..والسلاح..ايدة ترعش..ماجان عارف.. رعشه فرحه بسلامه بلال..لو رعشه خوف من المجهول اللي يتانيهم..
كاله ..الحمد لله على سلامتك وليدي..الحمد لله..بلال بالكوة دار راسة..وحجة لسانه جان ثكيل..دموع ابوه تكطر على ايدة..
كاله..لاتبجي يابه..اني زين...زينة..يابة..زيييين...ماكمل..وعمي رد عليه بلهفة كاله زينه والحمد لله..ولدت..وجابتلنا بلال زغيروني..ماسميناه نتاني بيك..وليدي..ومرتك تخبلت باكت حصانك..وهي نفسة..وشالت الطفل على صدرهه وغافلتنه وجت حتى تشوفك..ورجعناهه للدار..ابتسم بلال..وكال هية هاي..زينتي..ماتخلص خبالاتهه..هاي الخبالات هية اللي احبهه بيهه..لان اذا متسوي هاي الخبالات هاي مو زينة..
يعني يابة بخير هية والزغير ومامعلولين..
كاله اي زينه..لادير بال بس انته اهتم بصحتك..
دخلت الممرضه..وطلعت عمي....اللي طلع وهوة فرحان والدنية ما تلمه..
كاللهم وليدي راح الخطر منه..روحو زفو الخبر لجماعتنه خل يفرحون..
اجت الشرطة..واخذو اقوال..بلال..وسجلو حالته....بقه ياخذ العلاج فترة واهلة وناسة يجون يطمنوون عليه ويرحون.
اني جانو مانعيني اتحرك..لا اني ولا الطفل..بلال اشتاقيتله..هواي..اريد اروح اشوفه واطمن عليه واملي عيوني منه..الكلب..يريد يطلع من مكانه..من كثر الشوك..كام يرفرف..عشوفه حبيب كلبي..الاذانات يهفهف صوته عليهن ..كل شي بيه ينادي على فارسهه..احتاجيته.وما بعد بيه صبر اتاني..بس شلون انهزم وروح عليه..امي ما تفاركني دقيقة..والزغير لازك بيه..يرضع وما اكدر اعوفه او اخذة وياي..اوووف ماكو فايدة راح ابقه اتاني بالكوة واصبر بروحي..هاي اذا لكيت صبر..
بلال ديتحسن يوم عن يوم..الجرح كام يطيب..وكلبه يدك على زينتة..يتاني شوكت تجي العين بالعين..ويسمع نبضهه وانفاسهه ادغدغ..صدرة..وشعرهه الاسود ليل يسرح على جتافهه..احتاجهه..ومن الشوك كام يموت عليهه..يصبر بروحة..حتى شوية يشد حيله..ويرجعلهه..
ونبه عليهم مايخلوني اجي..كام يسأل على ابنه ..شلونه وشنهي معانيه..يشبهه لو يشبه امه..وكل ميجيب طاريهه يحس بكلبه يرفرف..
مشت الايام..وبلال ديتحسن اكثر واكثر..يعد بالايام والليالي حتى يرجع لزينة..ووليدة..الزيارة قلت.صارت كل يومين..لان ميكدرون يومية يجون..
خالتي ام بلال تطبخ انواع الطبيخ ودزة الابنهه حتى يطيب بساع وتجبر عضامه..وهية مكيفه بسلامة وليدهه..عمي حمادي ماخلاهه تجي..وعصب عليهه وخنزر..كاللهه لا تصيرين عثرة بطريق وليدي..هيه سكتت بس كلب الام يرجف على وليدهه..تصبر بروحهه..بلكي ياخذونهه عليه..لحد ما جابولهه الخبر السعيد..ورة ما راحو زاروه..كايليلهم عكب باجر تعالو طلعوه..كامت تهلهل وتركص..وبين عليهه الفرح..امي.. والبنات جني ركض بشرني..كمزت من مكاني..واني اكمز..امي فاهمتني..كمت اركض ما اعرف شاسوي..رحت اركض..للحمام اتدوش لو اروح ادور ع الكحل..والسواك..والديرم..طارن كلهن مرود الكحل..
مالكيتهه ..كلت خل اطب اسبح وبعدين اداورهن..
امي كالتلي..ولج هدي روحج..واكرصي..بعدج ليهسة نفسة..وجرحج اخضر..لا تتقربين ع الرجال..وتشهينه..سمعتي..لان هوة الله يعلم..بحالته شكد تعبانه..وانتي تتمركصين..
كتلهه شنو يمه مانفرح..بجيت رجلي..
كالتلي..الله يكسر رجليج..ويعقلج..فارج يلعب بالزبيب..ليش عبالج اني مافاهمتج..اكعدي راحة..وخلينه انام يمج..
عيوني طلعت من الصدمه..ونوب جتني الضحكة..بلبل يجي ويخليني ابات بحضن امي....مسكينه..ههههههه
اتاني وكلبي على نار..اتاني الجماعه يروحو يجيبوه..وصلو للمستشفى..وقعو اوراق الخروج..
دخلو على بلبل حتى يلبسوه بس ما لكوه بدارة فزعو وكامو يدورون بالمستشفى عليه..من دار لدار..وماكو..سألو عليه كلهم كالو ماشفناه..من الليل..اااااااااه يابلبل..من مصيبه لمصيبة لخرة..
اتخبلو..طلعو يركضون منا ومنا..وما كو اثر..عمي حمادي..تخبل..اوووف من هل ولد من يوم منولد..حضة اسود من مصيبه لمصيبه..وين راح..ومنو اخذه..وهوة بعد جرحة اخضر..كلبه كام يرجف من الخوف عليه..شلون نرجع للديرة وادينه فارغه..زين امه اللي دتاني على نار ومرته اوولده..شكللهم..مصيبه جبيرة..رجعو بعد ما صار علم للمستشفى بغياب المريض.. ومو اي مريض..مريض مضروب بطلقه..وما زالت القضية ماشيه..يجرجرون برواحهم..بالكوة..والهم والحزن راكبهم تقربو على ديرتهم..
الغبار معجج..وحس حوافر الخيل يضرب بالكاع..النسوان كلهن..برة الدور..والهلاهل مشتغلة..والناس تتراكض.. والطبول شغاله.. والبخور معجولة دخانتهه خوف من الحسد.من تقربوا ماشافو بلال وياهم..سكتو..وصارت صنطة..اني اول من سألت..كتلهم..وينه بلال..عمي حمادي..وينه بلال..شبيكم ..ماجايبينه وياكم..؟؟؟يمة اخاف صارتله مصيبه..
عمي كاللهه..لا..لا..بنتي خليناه..وصحته زينه..بس من رحناله اليوم ما لكيناه...ام بلال..كالتله شنو مالكيتوه..هوة هذا حجي..؟؟كاللهه..كلبنه المستشفى كلب..وماكو.. تكولين بلعته بلاعه..بالليل كلشي مابيه ونايم بسريرة..وجه الصبح..جوي ينطوه الدوة..يتانون جيت الطبيب حتى يكتبله خروج من المشفى..بعد ما يمرله ويجيكه..مالكوه تكولين فص ملح وذاب..
حطت اديهه على خدهه وكامت تندب..اني بركت على ركبي..كالت..المصايب لفتنه وما عاد تعوفنة..
جان ..ابن عم عمي حمادي..ابو مفيدة ..وخال محمود..وعبود اجه راكب فرسه..
كاللهه..لاتندبين ولا تولولين ام بلال...بلال عندي..اني خسرت..جنت اتمنى بلال يعرس ع مفيدة..بس مصارت وكلشي قسمة ونصيب..واني حرضت محمود وعبود.. مايموتو..على اي شي..ردتهم يموتون ع الكاع..حسيت حقي يضيع لان رديتو وتصالحتو..اني ما تكلمت قبل ولا تدخلت..هسة اجة الوكت..الكاع تنكتب باسمي..والحجة تجيني..وتنختم بشهود..جدام الكل..ولدكم يرجعلكم..غير شي ..نكتله..وندخل الحبس..علمودة..حمادي..عقلك براسك..فكر وردلي خبر...
الناس كلهه واكفه فاتحة حلكهه ومبهوته..بس عمي حمادي...حجة كاله..
بيني وبينك اني جنت اتاني تبين على حقيقتك..اكول شوكت يحجي.. سعد ويرد علينه..ما تغير طبعك..تبقه حيوان..
كاله هذا الحيوان روح ابنك باديه
عمي حمادي كاله..هسة اخلي رجال الديرة يلزموك هنا..ويكسروك تكسر..شتكول...
ضحك ههههههه ..كاله محسبلهه يبن عمي.. ابنك بادين ماترحم..اذا مارجعت..مايرجعلكم..الكاع هية الحل..اني بداري..منا لليل..تجوني ونكتب كدام الكل..
ديور حصانه..ورد..وخلى الكلوك مفتوحة..
كتلكم..ثار الدم..الارض..تنخاذ بالدم..والعرض..بالدم..وروايتي.. ارض وعرض..والدم سايل..هنا..وهناك..
النسوان تلطم وتندب وتنوح..والرياجيل بحيرة..الارض عرض..اذا سلموهه كانما مسلمين عرضهم...شلون ومنو يفضهه..منا نار تجوي..ومنا نار تحرك..
ابوية حسمهه ..كال لعمي حمادي..امشي ارضنة مو اهم من ابنك..وسبب عركتنه وفراكنه....خل نطيهه اله..عمي حمادي كاله شتكول انته..معناتهه انطيه مرتي..
خالتي ام بلال ضربت ايدهه على صدرهه..
كالتله..اشلون رجال ..هيج بساع تبيعني..هانت عليك العشرة..صاح بوجهه اسكتي يابومه..اخي علي شلون تريد اسلمة كاعنه..
ابوية كاله بلال اهم..تروح كاع انجيب غير كاع..
ولدنه ما يتعوضون ..الكاع تتعوض..يله نروحله امشي..
خالتي ام بلال كالتله الله ينور طريقك خوية علي..تروح الكاع ولا يروح وليدي..صرخ بيهه عمي حمادي كاللهه سدي حلكج..يامرة..اروح اني ورجالي نكتله ونجيب وليدي..وما ننطيه حفنه تراب من كاعي..ابويه فز..كاله..يااايابه لا..لا..تريد عائلتنه تموت علمود الكاع..الله يهديك حمادي..هدي روحك..ترة روح ابنك بجفه..والكاع بحفه ثانية..
عمي كاله شلون انطية كاعي..يعني سلمت شرفي..وهيبتي ورجولتي..اروح اكتله..وارجع ولدي..
كمز وهوة عازم..والرجال وراه..كامو يتراكضون يتجهزون بالسلاح والحصونه..
النار تعله السنتهه..وتخمد..وترجع..تشتعل وتلهب اقوة من الاول..والسنة اللهب..عالية..وراح تحرك الاخضر واليابس بين العائلتين..محد يكدر يطفيهه..وهاي توابع..ثارات الدم...
بلال جان نايم بعز النوم..الفجر جانت ماكو حركة بالمستشفى..كل مرة جان يجي..ممرض او ممرضه ..تتفقده..حس بروحة وحدة بالمستشفى..فتح عيونه..شاف نفسة بغرفة مقفولة..مثل مخزن مال حبوب..بلال يعرفة كل الزين..مخزن دار عمة..اتفاجأ اشجابة هنا..وشلون..حتى دخل عمه عليه..وياه رياجيل اثنين مسلحين..
كاله حمد الله على سلامتك ..زعطوط..
كالة اشجابني هنا عمي.. وشلون جبتني..
كاله.. رشيت ممرض..ضربك ابرة مخدر..واخذتك وجبتك..الهنا..بس انته سمعت اللي سويته..وية اهلك..
كاله..شنو عمي شسويت..
كاله..حاجتي كاعي تردلي..وساومتك بالكاع..بلال.تفاجأ اخر شي جان يتوقعة..ان عمه يخطفه..ويساوم اهله بالكاع..
كاله عمي تحجي صدك..ليش هيج اسوي...
كاله..تانيتك..تفهم وحدك..ردتك تاخذ مفيدة وما اخذتهه اخذت زينه.كلت ميخالف قسمة ونصيب ..ما احسبهه..كلت دهنه بطحينه..وديت اولاد اختي..للحبس بسببك..وخليتهه لا رجال ولا اولاد..اريد ارد الكاع حتى لو بالقوة..او التهديد..اني هسة اريد ارد الثار..
وطلع..وبلال ما مصدك..هذا عمه..ابن عم ابوه..ونفس الدم..مربوطة اديه..ورجليه..وجرحة بعدة اخضر ما شفه..مايكدر يتململ..لا منا ولا منا..كعد يتاني.يشوف شيصير واعصابة مشدودة..
مفيدة..فزت من الفجرشافت خيال ماشي لدار الحبووب..وخيال واحد شايلة حاجة..مو فارغ..استغربت..وسكتت..راحت على امهه تسألهه..
كالتلهه يمه ابوية وينه.. كالتلهه يمه بالليل طلع وما ادري وين راح وانتي تعرفين من اسأله..مايرد ويجاوب...
جان هوة يتنحنح ويدخل..كالتله صبحك الله بالخير..كاللهه حضريلي الريوك..حضرو الريوك وتريكو..هوة كام طلع..وكاللهم..اسمعو..دار الحبوب محد يوصلهه مفهوم..ما اعيد ..محد يوصلهه..
مفيدة تاكدت انو اكو شي بدار الحبوب..تانته يطلع..وما طلعت حس..تريد تلكة فرصه حتى تشوف..شنو بدار الحبوب..اكو شغله ضلت تنبش بداخلهه ولازم تعرف..
ابوهه رايح جاي ماكدرت تطلع وتشوف شكو..اتاني الليل بلكي ماكو احد ..وتروح تتطقص..
الليل اجة..وجماعة بلال..جوي والحوش انمله ناس..العيون تجدح نار..مفيدة سلتت نفسهه سلت وراحت لدار الحبوب..فتحت الباب..عينهه اجت بعين بلال..وهوة مربوط دايخ..ويون..ضربت ايدهه بصدرهه..كالتلهه ..بلال..اشجابك هنا..حجالهه على سالفته..اتقربت منه وحلت الحبل..وكالتلهه تعال وراي..خلي اطلعك من الباب الخلفي..خل تخلص هاي السالفه على خير..طلعت وهوة يمشي وراهه..وهوة يترنح..من التعب ..لكو الناس ملتمه..وهوسة وعركه طلقة منا وطلقة منا..
عمي حمادي..كاله..جيب بلال..كبالنه..خل انشوفه وبعدين نتفاهم..
كاله..لا..لا..تريد تاخذ ابنك وتضربنه وتنهزم..
نكتب ونوقع العقد وبعدين نتفاوض...
اجه واحد شاورة كاله بنتك هربت بلال....راح يركض.. ومسدس بايدة..يركض ورة بلال ومفيدة..
اوكفو..ما وكفو..مفيدة تكل البلال فدوة اخذني وياك..ترة ابوية يكتلني.. بلال كاللهه لا تخافين انتي بامانتي...مفيدة جانت تحب بلال جانت تعتبرة فارس احلامهه..من هوة زغير وهية عينهه عليه..حبته هواية ..وخفت حبهه اله..بس هوة ماجان يميل الهه جان يحسهه متكبرة وخشمهه عالي..ركضو ثنيناتهم..بلال التعب نال منه.ماكدر يركض..ابو مفيدة لحك بيهم..وجان يصيح بعلو صوته..مفيييييييدة..يا بنت الجلب ارجعي..للدار لو اكتلج..وكفت وهية متحزمه..لا..لا..بوية..لا تكتل بلال..كاللهه..وشيهمج انتي..وخري بلال.سحبهه حتى يوخرهه من جدامة..ابوهه وجه المسدس على بلال..وحط اصبعه على الزناد..ضغط..طلعت الطلقه..مفيدة رمت روحهه جدام بلال..جتي الطلقه بكلب مفيدة....لزمهه بلال وخلهه ايدة على كلبهه..وهوة يبجي ويصيح مفيدة مفيدة..لاتموتين..كالتلهه وهي تمتمت بحجيهه والدم يجري من حلكهه..فدوة الك بلاااااااال..ردت بس اكلك شي..واحد..كاللهه شنو كولي..كولي..كامت تنازع الموت..وروحهه تطلع..كالتلهه اااااححححبببك..جسمهه برد عيونهه بيضت وشخصت للسما...بلال صاح مفيييييييييييدةة....ابوهه رمى السلاح وكام يشيل بالرمل ويذب على راسه..ويصيح بنتي اني كتلتهه..مرة يبجي ومرة يضحك..ومرة يضرب على راسه..باديه..عمي حمادي.. اخذ ابنه..ورجعو لديرتهم..
ثار بدة بالدم.. ينتهي بالدم..
رجع بلال.من شفته من بعيد رحت اركض عليه حضنته..وبسته..وعيوني تبجي ..باسني من راسي وغمزلي..كالي.. زينتي بلبل شمسوي بيح..
كالتله..بلبل كاتلني كتل..مدمرني بحبه وكلبه الطيب..
كاللهه ياله خل نروح لدارنه..وهناك نقفل بابنه علينه..وما نطلع..
اجتي امي وخالتي..متحزمين وكالن..واحنه..ماالنه بوسة حضنه..زين والطفل غير ينام يمنه...
بلال جدحت عينة..وكللهم ..كافي..ما انام الا بداري وية مرتي وطفلي..اريد شهر ما نطلع على احد احنه بس..
ضحكو الناس..وانتهى ثار الدم...وانتهت روايتي...
#تنوية....مضمون الرواية حقيقي..تم اضافه الكثير من الاحداث للرواية كي تخرج بهذا الشكل...اتمنى ان اسمع ارائكم حول الرواية..وطريقة كتابتي لها...واخيرا شكرا لكم لمتابعتي..وشكرا لصبركم الجميل.واعتذر منكم للاطالة
انتضروني في رواية جديدة.
الكاتب ليوثي المياحي
