#ثار الدم..
#ليوثي المياحي
_15_
وصلنه وجه الصبح والرجال عطشانه وجوعانه..لا عشه ولا ريوك..وجوهم ازركت..وابويه يلهث.وهوة يمشي ورانه..مثل ما اجونه احنه لحكناهم..احنه سبقناهم وخطفنه بنتهم..وهمه ختموهه وخطفو بنتنه..مثل ما حركنه كلوبهم ابنتهم..حركو كلوبنه ابنتنه..نار مشتعله..نار الثار..ولهبهه..حركنه وحركهم..هيه دنيه وحدة..واحنا من عشيرة وحدة..اني اخذت زينه عروسه معززة بعزهه ودلالهه..من دار عمي..والله لو جايني برجله على علياء ..الا انطيهه اله..صحيح زينه عندي..بس علياء شلون بيهه..ما اعرف ليش احس روحي ما غضبان ولا زعلان..يمكن لخاطر الحجي مال زينه..حسيته كله صحيح..وماعليه غبار.. الدنيه دوارة...احنه نعرف عاداتنا واصولنا ...وتقاليدنه..
.وصلنه مثل ماتوقعت..الساحه تلعب بيهااا الناس..والطبول دطبل..عرس اختي علياء..على اخو زينه..بس ياهو منهم ماندري..الدنيه..كشفت..والغبار عالي..صحيح ثار..بيناتنه بس عمرنه ماسوينه غلط..جابوهه عروس لولدهم..
الحفله سكتت من دخلنا بيناتهم..باوعت على ابويه لكيت وجهه اسود..من القهر..والغل..خليته يحجي لان هوة الجبير مالتنه..كاللهم..غدرتونه يا ابن عمي..وبيمن ابنتي..تخطفوهه من فراشهه..؟؟رد عليه ابو زينه..كاله انته سبقت وغدرتني..اخذتو بنتي من غرفتهه..وضربتو ولدي..محمد بطلقه بجتفه..وخليتو دمه بطوله..بنتي رجعتلي ..رجعتو واخذتوهه مرة الخ ..هيج خلصت..واللي ضربتوه وانطه دمه الاخته..هوة اللي راح ياخذ بنتكم ..هذا حقه..وبنتكم جبناهه معززة لا ذليناهه ولا جوعناهه..عروسه معززة مكرمه..احنه ما بدينا العيب..انتو بديتو..
ابويه كاله..ثارنه ع الكاع..شنو جاي نفدي الكاع ابناتنه...ردله ابو زينه وكاله..انته جاي تحاسبني شنو...ابويه كاله ...اي لعد ليش جاي..ابو زينه كالي حاسب روحك ..قبل متحاسبني...اني ماكدرت اسكت..كتله ..اني زينه احبهه..وحافظهه بكلبي..وبين رموش عيوني..اني لا يهمني كاع ..ولا شي ..ويه زينة..اني حضرتلهه..دار..وفرشته كله الهه..قبل ما اخذهه....واني ما ناوي افدي الثار بيهه..ولو اني جاي وطالبهه منك ماجان انطيتهه..بس علياء لا تعرفكم..ولا تعرفوهه..
محمد.. العريس اخو زينه كام يحجي كال..لا..لا..اني هم احفضهه وما اعاملهه الا بالحسنى..احنه ولد اصل ونفهم بالاصول..رجوع..ماكو..توني عقدت عليهه مرتي كدام الله ورسوله وعباده..ديرو وجهكم وروحو..كبل ما نوجه بنادقنه عليكم..
علياء حاجزينهه بالداخل مايخلونه حتى نشوفهه..البنادق توجهت علينه وماعاد بيهه مجال..لو ضاغطين عل زناد جان صارت مذبحه..والدم يسيل للرجاب..ابويه اجه يريد يحجي..جريته وسكته..كتله..يله يابه..اللي سووه نرجعه ثاني ومثلث..ابويه ماكدر يتململ ..كاللهم زين بس اريد اشوف بنتي...ونروح
ومبروك عليكم ..احنه بدينه وانتم كملتم..كافي اللي صار..شوفونياهه واخذ روحي وامشي..محمد باوع على ابوه ..ابوه صاحه وشاورة ..كاله وليدي حقه يطمن عليهه جيبهه برة ..دخل محمد ..شويه وطلعهه لازمهه من ايدهه لابسه دشداشه مطرزة وعليهه صايه..هم مطرزة بخيوط الذهب ..مزينه وخاله الحمرة ومدبغه خدودهه وخلخالهه يرن..وشالهه مدندش بالخيوط وسبع عيون ..تبارك الرحمن ..طلعت وهيه مبتسمه..لا بجت ولا عيطت..فتحولهه الطريق..وصلت يم ابويه..جان ينزل من فوك السرج..وحضنهه ويبجي.وهيه تبوس باديه..وراسه وتكله..لاتبجي يابه..هذا كله مكتوب..اني راضيه..لتخاف..عليه..اني بامانه اهلي وناسي..دمنه واحد..عمرهم مراح يأذوني..مثل ما زينة عدنه..لتبجي..يابه..اطمن عليه..اني رباية ايدك..ان شاء الله هاي اخر المشاكل..ولدم عمرة مايصير مي..وباسته وردت لمحمد..التفتتلي وكالتلي..بلال سلملي على زينة..انت بديت وان شاء الله اني كملت..كافي دم وثار..احنه اهل..فهم ابويه وامي خل يجون ويلتمون ويصفون كلوبهم..ويتصالحون..الدنيه بيهه الموت ..لا الدين ولا الكاع ولا كنوزهه..تسوة العرض.زين.. خما اني الزغيرة اعلمكم..
ابو زينه اتقرب منهه..وباسهه من كصتهه وكللهه..ربي يكملج بعقلج بنيتي..خذينه وربحنه..مبروكه علينه انتي..
اشرتلنه وباوعت بعيونهه واحنه نمشي ابويه يبجي وما يسكت..حفلتهم اشتغلت طبول ودك وركص..فرحانين بوردة البنات زغيرة بعمرهه بس جبيرة بعقلهه..حجت حجي.. الشيوخ ماتحجيه..وعرفتنه بقدرنه..ان شاء الله هاي اخر المشاكل..والمصايب..مثل ماكالت..عفتهه واني مطمن عليهه.. بس ما مطمن من امي ولسانهه وكلبي يكلي ماكو خير من هاي السالفه..
زينتي....اووووف من كلبي..
دخل الليل علينه..واحنه وصلنه لديرتنه..بالباب جانت واكفه ع نار امي واختي رجاء..دا يتاننه..من شافنه جني يركضن..امي تركض وترتب بجرغدهه..وريجهه موغف ويابس..تضرب باديهه وتكول..شنو..اشو مثل ما رحتو مثل ما اجيتو..شنهي..عفتولهم بنتي..واجيتو بوحدكم..اووووف يانار كلبي..على بنيتي..
ابويه سكتهه بعيطة كاللهه اسكتي وسدي حلكج..الله يهنيهه..
امي ضربت ايدهه على صدرهه..وكالتلهه... خليتهه ورجعت.. شلون عقول عقولكم..تعوفهه يم خصومنه..وتجي تكلي الله يهنيهه..وهذا وليدك..شسوة..لو هوة هم عاجبه حال اخته..اي ليش لا حتى تفرح ست الحسن...ابويه بذيج الساعه عيونه صارت بكصته..نزل من حصانه..ولزمهه من ايدهه وخلا هه تسحل بالتراب..اني جيت اركض افازع بيناتهم.. ابويه لحد لان عضمة قوي..وبعدهه روحه خضرة ...ضربهه دفرة راديقسم ضهرهه نصين..مديت ايدي لزمت ايد امي حتى اجرهه من جواه..وهيه تعيط وصرخ..وتكول..كسرتلي ضهري حمادي.. هوة انته ما كادر بس عليه..جاي وشايل قوتك عليه..ساعة السودة اللي دخلتلي بيهه زينة وخربت الدنيه..
هد عليهه ابويه واني واكف بيناتهم..حاجز بينه وبينهه..وهيه ماسكتت ضلت تحجي..ابويه كاللهه ..اذا ماسكتي ..متباتين ابيتج..انتي طالك.. وبنتج تتهنه وفرحانه..بنتج طلع عقلهه اكبر من عقلج..خرفتي وماكمتي اتميزين الصح من الغلط ...اخذهه بلال لدارهه لروح ارتكب جريمه بيهه الليله..كتله يابه ليش انته متعرف امي..لو جديدة عليك..كتلهه ياله يمه كومي..وياي اوديج لداري يم زينة ترا هيه تحبج وتريد خاطرجكالتلي .. لا ..لا..وليدي..ما اطلع من داري الوحدة من عدنه ما الهه غير دارهه ورجلهه...دارت على ابويه وكالتله سامحني يا خيي..لان لساني مايغلط..سامحني اللي اتسويه انته هوة الصحيح...ودخلت تتعكز بالكوة لدارهه..وابويه ورهه يمشي ..كال شفنه علياء واطمنا عليهه...
ابويه وامي يتراضون..بس اني شراح يفضهه ويه زينه ...زينتي ماخذة بخاطرها مني..صعب ارضيهه..خل اروح واسوي الفكرة اللي ابالي..وكبل ما اروحلهه رحت على رجال يدك وشم بديرتنه ..انسميه الوشام..كعدته من النوم..وكتله..اريد توشملي اسم زينه على صدري...يتثاوب سلوم ابو الوشم..كالي اكو واحد يوشم بهل ليل..تعال باجر الصبح على ضوة الله ..اصبر شوي ..عيطت عليه..كتله..شنو سلووم..؟كتلك هسه يعني هسه..جيب العدة مالتك والحكني...تانيته برة كعدنه على ضوة الكمر...وشعل فانوسه..طلعت صدري..جرحي ودمي فدوة يروحن الهه..لازم اشوف وجع اقوة من وجع الراشدي اللي ضربتهه بي..ما يغلى عليهه شي..بدة سلووم يشتغل وهوة يغني.. يمه يمه يمه ..
اطك روحي واجيك..
واريد اغفه باديك..وادك اسمك وشم على كل الجسم.يمه يمه يمه..
..هوة يغني واني سارح..في زينتي..علمودهه كلشي يهون..رسمت اسمج بكلبي..بدمي..وفي جسمي..اموت بحبج..زينه..ان شاء الله ترحمين كلبي..اني ويه الرياجيل فارس صنديد..او وياج حتى كلبي..يصير ضعيف..كلشي بيه ينادي بمحبتهه..الدم اللي يجري بعروكي يكول زينة مابين النفس والنفس زينة زينة ..عمري ومهجة كلبي امشي واغني سكران بحبهه..جرح الوشم يحركني لخاطر حبهه..خلص سلووم كتله خل اشوفهه..شلون صارت..باوعت كتله اي حلوة..
اني عيطت بعلو صوتي..كدام المرايه..تحنيت..وسبحت وتعطرت الليلة كلت ادوخه..يباوع وما اخليه يلمسني..يتمنى ولا اخليه يبوس..عرووس لبست ملابس فاضحة..خلخالي يرن..برجلي ..نسى يجي عليه..هوة بدة ..وبحرب الحب..كل واحد يطلع اقوة ما عندة..كل الاسلحة مرخوصه..واني كلياتني سلاح موقوت بوجهه..واني اعرف نقطه ضعفه..اخذني النوم واني اتاني بيه..حسيته.. دخل ويمشي على كيفه ونام على الفراش..مدد بصفي انفاسه ادغدغني..كلت بس لا جسمي يخوني..لا..لا ما اخليه يخون..ما اريد افوت الراشدي بالسهوله..ليش اني شنو كطعه حبل وجارهه وراه..حسيت ايدة تريد تسلل على جسمي..اتانيه اذا حطهه الا اكسرهه واعلكهه بركبته..
بلال كام يحجي ويه روحه..اشو حنه ومحنايه..وخاله عطر ياخذ العقل..ولابسه ولاجنهه لابسه..شعرهه فالته ومسرحته..جسمهه مسبحته جنه مرمر..اخذلي عقلي..حبيبتي نشفتلي دمي..مددة على الفراش.. راح تجلطني..لا اشبع منهه ولا امل..احب اكحل عيوني بشوفتهه..كلبي يريد يطلع .احب امسهه اتمتع بيهه..قربتلهه شاورتهه باذنهه ..زينتي..ما ردت ..اني حاس بيهه متوترة..ادري مانايمه..مديت ايدي..وخرتهه وشمرتهه بعيد..كتلهه زينتي ..ادري بيج زعلانه..عليه..ما اعرف اطلب اتسامحيني..وعمري ما طلبت السماح من احد...زينه باوعيلي..ردت اديورهه عليه ماقبلت..اتخلي وجهه بوجهي..جان تعضني بزندي..اني عطت فرد عيطة..
وكفت وشعلت الضوة ..وعينها اجت بعيني..وهي باحلى صورة..نسيت العركه..حاجبهه طالع مثل السيف..
كلتله..البارحه تضربني والليله تجي تتدحس..؟؟روح برة العب يم داركم..
ضحكت..وشبعت ضحك..كتلهه بنيتي اني بداري..واحب العب بداري
اني كتله..لا..لا..يفالح..هاي داري..والايد اللي هفتني براشدي..ما تلمسني بعد..وللحكايه بقيه..
