#ثار الدم
#ليوثي المياحي
_25_
عيون مليانه دمع..وكلوب..حزنانه..فجعه..وحصرة..والم..
عمي حمادي..كاله..ياوليدي احجي..اني ابوك..ركبي بعد ماتكدر اتشيلني كام يريد يوكف وكع جوي يتراكضون عليه شالوه وكفوه ولزموه حتى يصلب طولة..
الطبيب عصر اديه..حسبالك ديتحسر ..نوب زاد بتوترهم ركبهم ارتخت وكامت ترجف..
الطبيب كاللهم والله ما ادري شاكللكم..العمليه صعبة..والضربة خطيرة..الرصاصة طلعناهه..جانت قريبه من الكلب..سوينه اللي نكدر عليه والباقي بيد الله والمريض...اربعه وعشرين ساعة..هية الحاسمة..لو يتجاوز مرحلة الخطر..لو.......الله ويعينه ويعينكم..
عمي حمادي كالة ..وليدي علكيفك وياي..وحدة وحدة..اريد افتهم..شنو معناتهه؟؟يعيش لو لا....؟؟؟؟ولتكول لا...
الطبيب طبطب على جتافات عمي..وكاله..قوي روحك حجي..ادعي لربك..يباوعلة بعين الرحمة..الامر صار بأيدة..
برك عمي حمادي على ركبة..بالصاله..وكام ينوح ويعدد بصوت مبحوح..لزموه الولد بالكوة..وطلعوه برة المستشفى..هدوه وغسلو وجهه بالمي.. بعد ما شربوه كمع مي..وكعدو يتانون رحمه الله ابلال..بدون ما يحطون لكمه بحلوكهم..دخل عليهم ابوية واخوية احمد..اللي ماتهنه بعرسة..وياهم كم رجال من رياجيل الديرة..كلهم جوي..يطمنو على فارسهم..
بعد ما جوي الشرطة..واخذو عبود..ودونو شهادات الحاضرين..
عمي سألهم عني..كالولة خليناهه تولد..وبين دعاء للمصوب..ودعاء..الي ..كلوبهم حزنانة..ودعواتهم الله يفرجهه عن بلال ويسهلي واجيب بخير وسلامة..
اني الوجع كتلني..احس سجاجين اتكطع بلحمي..نسيت امي اللي ولدتني..ونسيت الدنية كلهه..حرارتي ترتفع..وتنزل..اعيط..باعلى صوتي حتى بح..والقابلة كل شوية تكلي اعصري..اعصري..وعاونيني..غاب عقلي مني..وماعندي قوة..حتى ادفع..ولا نفس..تعبت..حتى ما بقه جهد..عندي.العرك يصبصب مني..والقابله اتعيط عليه..ادفعي..ادفعي..راح تموتين طفلج..ادفعي راح يطلع..كمت ابجي..حرارة وروح ..وجع ..وموت..وبلال بين الحياة والموت..كمت ابجي..كتلهم..خلوني اموت اني..وياه..عوفوني..ليش اجيبه..حتى يعيش يتيم..لا..لاه..
امي ..تبجي..وتكول بنيتي..لا تحركين كلوبنه..اكثر..من ماهية محروكة..شنو ذنبة طفلج..يله كملي بنيتي..للاخير وادعي لرجلج..وانتي تولدي..ربي يتقبل منج..يله..بنيتي..
ايدهه اتمسد بيهه على راسي..وتمسح بالعرك..وتقرة ايات من القرآن وتدعي..ودموعهه تصب..الوجع صار اقوة..والدفرات ابطني صارت اقوة..يمكن طفلي يريد يطلع..للدنيا.كام يدفع بروحه..خليت وصلة بحلكي وكمت اساعدة بكل ما املك من قوة..بكل عضلات جسمي..تفسي انكطع..ولحم جسمي حسيته تكطع..سمعت..صراخة..وبجيت بجية..من كل جوارحي ااااااااااااه ..يازينة..كل فرحه عندج ماتكمل كل فرحة ناقصة..مرحبا..بوليدي بهل دنيا..هوة بجة..وامي هلهلت..وتبجي بنفس الوكت..كصت صرته..وحطتله زرقيون..ولفته..وحطته على بطني..اني كمت ابجي وانوح..والحمد لله..
الحمد لله..سألت القابلة كتلهه كامل..اديه ارجيلاته....كالت كامل مكمل..اللهم صلي ع النبي...ولد كامل وحليو..الحمد لله على سلامتج..
قربته مني وبسته..فرحت طبعا..ورجعت بيه الروح..حبيبي ما احله ريحته..وهوة يبجي..بجية الجيه للدنيه كملت الولادة..بخير صحيح تعبتني لان اول بطن..تعذبت بيهه..الحركة صعبة..بالنسبه الي..غسلو الطفل..ولبسوه وجابولياه حتى ارضعه..جنت تعبانه ومابيه حيل..دخلت خالتي ام بلال وشالته..وباسته وبجت..وحضنتني وكالتلي مبرووك بنيتي..ان شاء الله جيته..خير ورزق لابوه..دموعهه تصب..ربي يرجع ابوه سالم..كالتلي شسميه..
ضوجتني..او وجعتني..دموعهه..ميكسر الام اله وليدهه..واني توني عرفت وفهمت قيمتهه..هوة ولد واحد واني اخذته منهه..عدهه حق تكرهني..دموعي تسببت حتى اذكرة..وكلبي رعش وحن لبو كلب الطيب حبيبي بلبل..
كتلهه ما اسميه..حتى يرجع ابوه..سميه انتي لحد مايرد بلال..بخير..
كامت تبجي..والغصه بدموعهه..غسلت وجه وليدي..وحاضنته..كل قوتهه وتبوس بيهوتبجي..
كالتلي ..يابنيتي..هم اشوف وليدي يرجع بخير..هم اشوفه يرجع لدويرته..ويشوف ابنه..
ياوليدي جيت للدنيه وابوك ماحاضر..ان شاء الله جيتك تردة سالم..النه..ويسميك ابوك..حبيبي وليدي..شكد طيبه ريحتك تشبه ريخة الغالي...ااااااااه كلبي على وليدي...
كتلهه خالتي..لا تبجين..بلال رجال..وسيد الرجال..لا تخافين..هسه يكوم سالم..ويرجعلنه..بخير اطمن بيهه واني كلكي مليان مرارة..وكلبي يرجف..من الخوف..على بلال..
الجماعه باتو بالمستشفى..ولاواحد تحرك..ولا تحلحز..بلال مخلينه ع الانعاش..ومخليله صوندات ومغذيات بجسمة ورابطينه ع جهاز القلب..وما يخلون واحد يشوفه او يطبله...حالهم تعبان هوايه..طلعو الولد راحو جابو اكل وشرب..بس محد تقرب وخله لكمه بحلكة..عمي حمادي..يبلل ريكة..بين لحظة ولحظة..ولا من غمض عينه ونام ولا من كعد وياهم..الرجال واكفين اخذ بيهم التعب..وكلوبهم خايفة ..
الصبح تنفس ..عمي حمادي جمعهم وصلو صلاة جماعه..ودعو ربهم يكوم بلال بالسلامه..كعدو يتانون الطبيب..يجي بلكي يكللهم خبر يفرح كلوبهم..بلكي بشارة خير ترد الروح..وتبلل العروك العطشانه..
صبح الصبح والحركة كثرت بالمستشفى..اطباء وممرضين..واللي يشوفهم ملمومين ..يجي يطمنهم ويمشي ..جابولهم كهوة..الصبح.. لان حالهم..تعب..وياهو اللي يفوت من يمهم يسأل عليهم..يدعيلهم يشفى مريضهم ويمشي..حتى الوكت مشى وتعدى...ملو الانتضار وكلوبهم طلعت..ماكدرو يسألون لا طبيب ولا ممرض يخافون من الرد..كلوبهم ترجف..من لو..لو..بلال مايعيش..احتمال تصير حرب..وكتل ودم..تهد ديرة بحالهه..رجال لا من فرح ولا من شاف..صبرو..وصبرو..لحد ما عاد بيهه مجال..عمي حمادي قوة كلبه وشد حيله..وكام راح يسأل..والكل كامو وراه..شايب يمكن يروح بيهه ويموت لو سمع خبر ..مو زين..اتبعوه الكل مشه راح لرئيس القسم..حتى يسأل عن حاله بلال..دك الباب..رد صوت من داخل الغرفه.. اتفضل...دخل عمي حمادي..وابوية..
كاله اتفضل حاج بيش اخدمك..عمي حمادي كاله .اريد اسعل عن وليدي..شلون صارت حالته..شنو صارله..ولدي بلال جبناه من امس متصوب..بطلقة بصدرة..وسويتولة عملية ..طمنه عليه..
كاله..حاج والله شاكلك ما ادري..المريض تعبان هواي..ضربته..خطيرة..من البارحة واحنه انتابع حالته..ليهسه ماتغير شي..مثل ماهوة..وماكو اي دليل تحسن ولا تغيير..بحالته..على كلا..مازال بدينه الوكت..منا لباجر ويبين كلشي..
عمي حمادي ضرب ع رجليه..اوووف حبيبي وليدي..هم ليله الخ..شراح يخلصهه..
كاله..ياحاج..استهدي بالله روحو ارجعو لبيوتكم اليوم ارتاحو..لان اليوم ماتكدرون اشوفوه..ولا تدخلوله..ارتاحو وتعالو باجر وان شاء الله خير..
عمي حمادي..كاله..لا..لا.. اني امشي منا..وهوة يموت منا..ما اتحرك منا حتى اطمن عوليدي..
كاله على راحتم حاج..اني انطيتك رأيي..وانته شلون متحب..بس والله كعدتكم زايده هنا وتعب بس..وحتى لو مات..الله لا يقدر..شتريدون تسووله..
كاله الحك واخذ وليدي وما اخليه مرمي وحدة ..ياربي الطف بوليدي..
كاله الطف عليه ياحاج..ربي يشفيه الك..وترجع بيه..بخير..
قنعهم الطبيب ..لمو ارواحهم ..ورجعو لديرتهم..وعمي حمادي..رجع وياهم جروه بالكوه..رجع..وكلبه عافه يم ولدة..رجعو بعد ما ايسو من نتيجة ولدهم بهل يوم..
رجعو مهمومين وخايفين..ياويلهم من ام بلال وياويلهم من العائله كلهه..اللي يتانون..كلام قليل..ورعشة..وخوف..وصلو بالليل..الاضواء مشتعلة..والحوش نفسة مثل ماعافوه..عيط واحد من الزغار..هياتهم جوي..هياتهم ..طلعت كلهه تركض..خالتي تركض وتتعثر..بعبايتهه..فزت اوكعت..ماحست بحرارة الوكعه..
كالت شو جايين وحدكم..حمادي..وليدي..بيني وبينك وليدي اذا مات وينه لعد..وين خليته؟؟
كاللهه..لا..لا مامات..بس سوله عملية وخليناه بيد ربي العرش..والطبيب دزنه كال ما بيدكم شي تعملولة بس الدعاء..جينه نرتاح وباجر نغبش..بلكي نسمع خبر زين..
خالتي رجعت والنسوان..تصبر بيهه..
دخلو..عمي حمادي والولد..علية..كلبي رف من شفتهم..كتلهم بلهفة وينه بلال..كالولي السالفه كلهه..وشافو الزغيرون وباسوه واذنو باذنه..وطلعو وخلوهه بوسواسهه..ماكدرت تصبر..كلبهه يم زين الرجال..هلال دنيتهه ونور حياتهه..قررت من الفجر تروحلة اذا قبلو او ماقبلو..نامو ليلتهم يتكرضمون كل واحد ونيته..
الفجر طلع..والرياجيل لمو رواحهم..حتى يرحون..والنسوان..تودعهم..وناسيني..لبست هدوم بلال..وتحزمت..ولفيت حزامي على كلبي..اني مو اقل من النساوين اللي تولد ومن الغبشة تروح تحصد..لفيت طفلي على صدري..وطلعت من الباب الوراني..بدون ما احد يشوفني..همة طلعو..والنسوان ردت..مشيت للصريفة اخذت حصان الغالي ..وعسيته..وطرت..حتى الحك بعمي وابوية والرجال..حتى ما يبعدون واتيه..الوجع اخذني..واستحملته..طفلي الزغير لابد ودفيان بحضني..اركض واحاجيه..اكله..يا عسلي..هسة نشوف بابا..ونبوس جراحة..حتى يطيب نروح عليه هسه من يسمع بينه جايين عليه يطيب..نام حبيبي انته بكلبي..ركضت سريع..حتى كمت اشوف غبار طربكة الحصونه..بطيت شوية..وكعدت اتبع بيهم..حتى اوصل حبيبي..بلبل..الدنية انكلبت وراي..من طبو لداري وما لكوني..لا اني ولا وليدي..اتفرقو كل واحد يدور بديرة..بس امي عرفت
كالتلهم لا تخافون..عنوديه واني اعرفهه ماكو غير راحت لرجلهه..كلبهه يمه وصاير نار ومايبرد اله تشوفه..وتاكد حجيهه من راحو ومالكو حصان بلال..
الطريق طويل..وهية تعبانه..الزغير جاع..كام يمصمص بصبيعاته..طلعت ديسي..ارضع بيه من جوة الدشداشة..الحصان يركض..بينه..والطفل لاطي بيه..تعبت..وعييت..وصخنت..حتى ماعاد بيه قوة ولا حيل حتى امشي بالحصان..صرخت صرخة جبيرة..باااااااااابااااا..محمممممممد...احممممممد..وصل الصوت ضعيف..وتعبان وكعت من فوك الحصان ..باوعو..لكو فارس وراهم..على حصان بلال..راسا عرفوني..وكفو..والولد رجعو علية... لكوني حالتي حاله ..محمد واحمد شالوني وصعدوني على الحصان..ولحكوا البقية..من لحكنه بيهم عمي حمادي وابوية اكلو راسي من الحجي والرزايل..واني ما هتميت لكل حجيهم..خل يحجون مادام راح اشوف حبيب كلبي..خل اوصل بلال..واشوف عيونه عندي تسوة الدنية..وصلنه للمستشفى..اني نزلت واني اعرج ..وكوة امشي..عمي حمادي راح يركض على الطبيب..يسأله..
بشرني اروحلك فدوة عمي يترجه بالطبيب..ولزمة من ايدة..
الطبيب ابتسم وكالة..حمد لله على سلامته..رجال قوي..بس اليوم متكدرون اطبون اشوفونه..باجر ان شاء الله..لمعت عيوني وفرحت بداخلي..عمي حمادي.يشيلونه ويهنون بيه..وهوة يبجي..ويحمد ربه..اني رحت اركض للطبيب..كتله..الله يخليك اني مرته..وبعدني نفسة..صارلي يومين..وليدي..بحضني..خليني ادخله..
كالي انتي ممكن ..بس الطفل..لا..كتله بجاه النبي خليه يشوفنه اثنينه..بس ندخل وع السريع نطلع..
ابتسم وافتهم فرحتي..كالي تعالي ..كمت اركض وراه..رجليه كامن يخوطن وحدة اطخ بالخ..في سبيل اشوف عيون بلبل..فرحانه..راح اشوفه..حتى لو من بعيد..املي عويناتي..اني ووليدي..منه ..عيونه..اللي محاوطتهه وحاميتهه بكل وكت ومكان..وما اتحمل هاي العيون تغمض..وتنتهي حياتهه..امشي ورة الطبيب..ورجليه ترجف.. الممر حسيته شطوله..وفتح بيبان..وتعداهن..وفات..دور..مسدودة..فتنه شبابيك..يبين منهه..ناس مريضه ممدودة..كلهه مغذيات..وحس الاجهزة يوتر..وهدوء يحسسك بالموت..وكف كدام دار وكاللهه..شوفيه منا شوية واطلعي..لان مو زين عليج وعلى الطفل..
كتله صار دكتور..باوعت..شفت بلال..ممدود ..عيونه..مغمضة..صدرة اللي احبة..واموت عليه..عريان..صدرة..ملفوف بشاش..عليه سماعات..ومغذيات..وشاشه بيهه خط يلمض..مثل النبض..وبالونه التنفس..تنفخ وتفش..ولا هوة حي ولا هوة ميت..الاجهزة تكول حي..بس هوة يغط بالنوم..مديت ايدي على الشباك..حجيت ..سلمت..عليه..بجيت..
كتله..كوم حبيبي..كوم شوف وليدي..كوم زينتك اتانيك..رد بيه الروح واحيي كلبي..اني بعدك ميته..لا تخلي وليدي وحده..وتخليني..افتح عيونك..وشد حيلك..وارجعلنه..الدنية ظلمة بلياك..بلا حبك حياتي..فارغه..لا بيهه حنية ولا بيهه دفو..
كتله..بلبل..هههه ضحكت..لان اذكرت هوة ميحب كلمة بلبل..بعد ما اكولهه الك بلبل..كوم..اوكف..انته رجلي..وسيد الرجال..والحياة تحرم بعدك..نحت وبجيت..مرة احجي ومرة امد ادية..اتلمس طيفة..حسيت بدوخه..وغثت نفسي..اجتي الممرضه وطلعتني..دخت بيد الممرضه..ووليدي..بحضني..شالتني ودتني..حتى اشوفني الطبيبه..مالت النسوان..بعد ما كاللهه ابويه..واخواني..انو اني نفسة..جديد..الخياط انفتح..والدم يجري..ابوية كام يعارك بيهم يكللهم المرة كامت تموت..اخذوني ورجعت الدكتورة خيطت جرحي..ونوموني بدار.. وحدي ابويه ومحمد بقو يمي..وعمي واحمد والرياجيل يم دار بلال..مرت ليله..مرة علينه كلنه..وثاني يوم اجوي علينه..واجرو.. عربانة اليه..حتى اروح..بيهه..باوعت على حبيبي..وسلمت عليه من الشباك..وهوة نايم..كعادته..ورجعت..اكلوني الناس بالعرايك..الكل تلوم وترزل..على شلون تروح تطلع وهي نفسة..بطفلهه للمستشفى..
امي لزمتني وترزل تكلي شلون طلعتي..ما استحيتي..ما خجلتي..ماشية ودمج يكطر..وطفلج..بحضنج..بس حتى اتشوفي..اللي خبلج..وين راح عقلج..اوووف الله يسترنه ..جيبي الطفل خل اكمطه وادفيه..وشوية اخلي بيه رزانه انوب يطلع..مخبل مثل امه..
كتلهه كافي يمة شكد حجيتي..اني زينه والطفل زين..شترديني انام واعوف رجلي..
شفته..وما شفته..يا ريت اني مكانه..بس شوفته ترد الروح..عيوني تلمع..من فرحة شوفته..
يمة ترة هوة بلبلي..وهوة الخطف كلبي..
امي هفتني راشدي..حتى تسكتني..كالتلي سدي حلكج..بلا فضايح لا ارجعلج الراشدي الاول..شنو بلبل..فضحتيه..الرجال طول عمرة..فارس اهله وناسه..هسة انتي تجين تكليله بلبل..سدي حلكج..ولملمي روحج..ترة انتي ليهسه نفسة..حتى لو بالجذب..
اني ضحكت..من كل كلبي..حاسة بلال راح يرجع بخير..ويرجع لعائلته..لان امي كلبهه دليلها..وما يخطي..
بلال ليلتهه فتح عيونة وحس على روحة..(يله حمد لله على سلامة بلبلكم..حرامات يموت..مبروك عليكم..بلبل ورجعلكم ... واني تحت امركم..ههههههه ..تابعو الجزء الاخير من الرواية غدا باذن الله...تحياتي لكم....ليوثي المياحي..)
