#ثار الدم
#ليوثي المياحي
_3_
جانت عينه مبحلكه بعيني اني جنت اباوعله من ورة النقاب اللي ع وجهي..اتقرب عليه وكالي..زينه اريد اعرفج ع نفسي.. اني رجلج او ابن عمامج واسمي بلال.. انتي بعد شويه راح اتشيلين اسمي..وراح اتصيرين ملكي.. اني جازفت بالموت ع مودج.. جازفت بعشيرتي واهلي لخاطرج.. اني فارس اهلي وعشيرتي.. وكلمتي تمشي ع الزغير والجبير...
فديري بالج تنشفين راسج وياي..بعد شويه راح يجي الشيخ ونكتب الكتاب .. واريدج توقعين ومتكولين لا..لان هاي الكلمه محد كالهه الي.. كبل..ولا راح تنكال اليه..راح اروح اشويه واخليج ترتاحين.. زين...غمزلي بتك عين.. وفتح الباب وراح وسدة وراه...
اني كرصت خدودي ..ردت اعرف اني بحلم لو علم..كعدت وكمت ابجي وانوح.. رفعت النقاب حتى اشوف زين..ستوني تنفست..جان يدخلون امه وخواته.. عليه..وياهم نسوان من الديرة.. كامن يهلهلن ويطشن جكليت..وجابن صينيه ..بيهه حنه وياس وشموع..وباكات ورد..وحطنهه كدامي..امه كعدت بصفي..بعد ما رجعت النقاب ع وجهي...لاخليتهم يشوفون وجهي ولا اني شفت وجوهن ..كالتلي وهيه تشاورني..زينه..انتي تعرفين راح يكتبون المقدم مالتج والمؤخر... وانتي تعرفين شراح يصير وراهه ..بنيتي ما اوصيج ...اعرف انتي مخطوفه...ومغصوبه ع هل زواج... بس ابني زينه رياجيل الديرة.. حقه ياخذة باديه.. بس كلبه طيب.. هذا اللي اكدر اكوله الج..وانتي بنت اصل وفصل وتعرفين....
اني مكدرت الزم روحي.. وكمت ابجي..وكتلهه خاله..خطفني لا برضاتي ولا برضاة اهلي..ويريد يعقد عليه ويزوجني واكله تفضل هذا حقك...
لزمت ايدي باديها ..وبحنيه كالتلي..بنيتي هاي قسمتج..انتي مكتوبه اله وهوة مكتوب الج..ارفعي راسج وشيلي النقاب عن وجهج..خلنه نشوفج.. وانتي تعرفين وليدي رجال.. وحقه مايعوفه بسهوله.. وهوة كلبه مايل الج.. وشويه شويه ويه الايام وبمرور الوكت راح تتعودين عليه..من تعرفين اطباعه ..وكلبه الطيب... مدي اديج واقري الفاتحه مالتج..
اني بقيت مبهوته وما اعرف شاحجي وشاكول.. دخل بلال وكعد كبالي هوة وابوه اللي وكل نفسه ولي عليه..وجانت جنسيتي بايدة ..شلون جابهه ما اعرف...نطوني العقد ..اخذته بايدي اللي جانت ترجف.. حتى اوقع على حياتي الجايه..ومصيري المستقبلي...زين هيه من اولهه غصب ..تاليتهه شلون..الاول ابويه اختارة اليه.. وهذا هو اختارني..وبالحالتين مختاريت احد ..ما اكدر انكر انو شغله العروسه المخطوفه جانت عاجبتني.. هيه مثل اللعبه.. ولو تنفيذهه صعب بالحقيقه.. باوع عليه..واني جنت صافنه واتمتم ويه روحي.. كالي..وقعي.. ايدي كامت ترجف.. اجه كعد بصفي.. ولزم ايدي وسحبني عليه وشاورني.. وكالي..وقعي.ولا تتندمين..اخذتي رجال يحميج برموش عيونه.. "كلمتين كالي ..سحروني ..وخدروني.."
وقعت..ابتسملي بفرحه..وكاللهم هلهلوووو يل نساوين... زينه صارت مرتي..وحلالي..كلهه فرحانه..واني صرت ضايعه.. هاي اني شسويت.. بحالي..اكلت الجكليت وشربت شربت عرسي واني ما مفتهمه.. فرحانه لو لا ..
امه جابت ذهب ولبستني.. الخواتم..والسوارات والكلايد.. بس الحلقه.. خلتهه حتى يجي بلال يلبسهه الي.. طلعو كلهم بس بقت اخته الجبيرة.. علياء.. اتقربت من يمي.. وكفتني وكادتني.. مثل الطفل لغرفه النوم.. جان الاثاث مال الغرفه منصوب جديد..مفروش..بفرشه بيضه مالت عرس قماشهه ستن يلمع...عجبتني كلش حيل حسيتهه مالت ملوك.. ومخلين مخاد مثل الجكليته هم من قماش الستن بس لونهه احمر مو ابيض.. كلشي جان موجود بالغرفه.. لان همه محسبين ان العروسه موافقه بكل الاحوال... خلتني بالغرفه وطلعت وردت الباب وراهه..يعني معناتهه لازم ابدل ملابسي وارتب روحي واكعد اتانيه..ومن يجي ابتسم بوجهه واكله مبروك عليك اني... كلبي اشتعل نار وكمت افور.. كعدت بطارف السرير. ورجليه ترجف..اتاني يدخل عليه العريس...
الدم نشف بجسمي.. شي اقوة مني ..اقوة من قدرتي.. اتاني عريس الغفله يدخل.. وليهسه باقي صوت الدك والركص والهلاهل برة.. بس شويه خف عن الاول..الباب انفتح ورد انسد..اني شجعت روحي.. وتحضرت لدخلته..عدلت الزينه مالتي..الخلخال اللي برجليه..وكل حركه اتحركهه يرن بكلبي.. وكفت من دخل.. حليلي.. من طوله ومن عرض جتافاته.. وريحته وهوة داخل جانن سابقاته.. رجله تهز الكاع من يذبهه بشرته سمرة.. ولابس دشداشه بيضه.. عكس ملابسه اللي جان لابسهن من اجه وخطفني... اني جنت اذكر بروحي انو ما انطيه نفسي واتعارك وياه ..وكف وكالي احس اكو كلام بطارف لسانج..احجي رفعت حاجبي..كتله عندي بس ما اكول.. لان اذا حجيت يجوز نتعارك.. واني قبل شويه امك اتوصي بيه..حتى ما اضوجك او انطي بيك.. اكو هواي حجي ما اكدر احجيه الك.. احنه عدنه الحيا يجري بدمنه..اصلا اني ميحقلي احجي واتعارك ويه رجال ما اعرفه ولا شايفته.. البركه بابويه وخواني همه جانو يدافعون عني..ويتعاركون مكاني.. جان اسكت!!!!
كالي كملي ليش سكتي..
اني تخربطت..وارتبكت... لزمت الجفيه البيضه اللي جانو محضريهه حتى يلطخهه بالدم حتى تشهد ع شرفي وعفتي.. من تقرب يمي وكعد بصفي...حط ايدة على جتفي... ورجع وكف جدامي... عيونه جانن يبحثن جوة النقاب عن تفاصيل وجهي... اني عيوني كامت ترمش.. ومتوترة ..حتى ولو ميشوفهه..هوة وجودي اني وياه بغرفه وحدة اتخربط وارتبك واكوم امتمت.....
كالي انتي من عمامي..لحمي ودمي.واني رجال قبل ما اكون زوجج.. ما اغصبج.. وما اخذج الا برضاج وعن قناعه كامله منج.. اما هاي الجفيه.. لزمهه وكام يفر بيهه بايدة... ويشوفنياهه.. لازم تطلع لان هيه شرفي وشرفج.. ورجولتي.. وهي اللي نكطع بيهه امل عائلتج وعشيرتج..في سبيل يرجعوج.. تنهدت من كل كلبي..
وكتله حكمت عليه وعلى اهلي ...بالابتعاد..اريد بس افهم ليش اني بالذات من دون بنات الديرة مالتنه كلهه..وليش ما اجيت وطلبتني من اهلي بدل ما خطفتني وغدرت باهلي... وليش صوبتو اخويه..وخليتو دمه يجري...وما اعرف ميت لو عايش...
هز ايدة وحطهه ع النقاب يريد يوخرة ...اني كلبي يرجف.. وجسمي صار نار من شدة الحرارة.. كتله وخر ايدك...كالي شيلي نقابج خل تجي عيني بعينج..واني اكلج ليش... كتله .. ما اكدر انطيك نفسي..لان هذا حق غيرك وتريد تاخذة انته... عصر اديه بقوة وصك سنونه وكالي ديري بالج تعيدينهه ..كلتلج انتي حقي ومالتي..خليتج تفرحين وتسوين كل هذا اليه مو اله..انتي مرتي وحلالي.. افهميهه عاد... جان يخلي اصبعه.. على راسي وكالي.. ترجيه وخليهه باذنج..
اكلج شيلي نقابج خليني اشوفج.. برضاج احسن ما اني انزعه.. اني عصرت اديه.. رعشه صارت بكل جسمي...واني لازمه النقاب.. اخاف يشوفني مكحله ومحمرة ومزينه..جدامه..ركبي خارت.. لزمت النقاب بايدي وما حجيت ولا كلمه.. حتى ما انطيه مجال يكشف وجهي.. وبلحظه اديه صارت فوك اديه.. كمنه واحد يباوع ع اللاخ.. اني اشوفه بس هوة يمكن يشوفني من فوك النقاب جنت احس بيه... كلبي كام يدك سريع..وكف الوكت...وانحبست الدنيه بهذيج اللحظة. وللحكايه بقيه....
