#ثار الدم
#ليوثي المياحي
_24_
رجعت الدنية وزهتلي..وضوت ايامي..بحبة غامرني..وبلهفته عليه مهنيني..بطني دتكبر وهوة مساندني يوم بيوم..يبوس ويحضن كل يوم وماسمعني حجاية مو حلوة..بهل ايام..
القضية..ماشية بالمحكمة..وصدر الحكم على حمّيد..ومحمود..وانسجنو..واخذو جزاءهم..الزرع يزهي والمنتوج هل موسم وافر..شجر الزيتون مليان..ويفرح الكلب..خالتي ام بلال هدت شوية..وية ثكل بطني..اللي جاي يزيد..تجي تباوع عليه شوية وتمشي.. لو نوبات ادز رجاء تكعد وياي..رغم دارنة بالاطراف بس الناس تزورنه..ودارنه مايخلة يوم من الخطار..
العلاقة ويه اهل بلال صارت قوية بعد ما جا احمد يريد يخطب رجاء..الفرحه صارت فرحتين..حددو موعد العرس كبل ما اجيب..حتى احضر وياهم العرس..تحضرنة والناس التمت..من كل مكان ..انريد نعوض اللي ماسويناه بعرسنه..اني وعلياء..حطينه الحنة وحنينه النساوين..ودك وركص..اني ابطل ركص وهنه يجرني..واكوم اركص..ما اصدك واحد يجرني..علياء كالتلي ولج كافي خفة تروحين تجيبين كبل وكتج..تكعدني..واغافلهه..واطب وية البنات بوسط الحلقة..ابرد كلبي..جان اسمع صياح بلال..زززززيينة...
بطلت ورحتله اشوفه شبيه..
كالي وحك ربي اذا شفتج..تتمركصين هيج وهيج..الا ارجعج الدارج واحرمج من العرس..
كتله اني شعلية..لا ذبهه براسي..هذا ابنك اللي جاي يتمركص..
كالي..لا عظامج هية اللي تتمركض..شلوون ويه هل مرة..ماتبطلين سوالفج..
كتله هياتني كعدت..بعد ما اركص..ها اها..
كالي ..اي بعدين تكوليلي..عندي وجع..هوة انتي مرتاحة وكل ليله اضلين تونين..يم راسي وماتخليني انام..وكل شوية اكول راح تجيب..
كتله..اووووه وليدي..لا تحاسبة شكو بيهه اذا تحرك..هوة طلع..ورجعت للحلقه اهز واتمركص..
خلصت الحنه..واخذنة رجاء..على الهودج..والحفلة مشتغلة من دارهم لدارنه..وصلنه للدار..الجو يخبل..غنه..وهلاهل..وبخور وحفلة حلوة..وصلنه للدار اهلي كلهم جانو باستقبالنه..وياهم العريس..بملابسة المزركشة..اوجهه المنور ..فرحتي ما تنوصف..سلام حار واحضان وداخله للحوش مالنه..ركص وهز ..وفرحة مامن وراهه فرحة..والصلاة على النبي حاضرة ..امي تبوس وتحمل غراض.. وتودي للدار مال احمد..رحت اساعدهه وبلال شايل بقيه الاغراض ..حسيت بوجع..من اول ماطلعنه..من الديرة..بس ردت انسي روحي وما اهتم ..وكفت صافنه..من غير ما انبه واحد علي..حسيت بسجاجين تذبح ابطني..
امي كالتلي..شبي وجهج احمر ..مخطوف..يبووو بس لا راح اتسويهه هسة..ولج مو وكتهه..
ابتسمت حتى ما اخوفهه..لا..لا..يمه..لتخافين..هاي هيج لويات تجي وتروح .
سكتت امي جانت تعرف..كل الزين..كالتلي..بس وجهج مايكول لويات..الله اليستر..
عافتني وتلهت بالركص..والعريس..اللي ركصوه..وشالوه ونفضوه نفض..وداسو عليه برجليهم..وهاو رفعوه هاو..وهاو نزلوه هاو
وهاو عوفوه هاو..بعد ما طبطبوه..وخربطو احواله...كام يعدل بروحة..وجاكيته وهدومه..تقدم لعروسته..حتى ينزلهه من الهودج..برك البعير..ومد ايدة..حتى ينزل عروسته..الهلاهل علت..وحس الطلق..بالسمة..الدنيه دارت بيه والوكت وكف..ركبي صارن خيوط..وكلبي وكع بين ضلوعي..التفتت الناس كلهه..تتبع الصوت..واكف على حصانه..وبندقيته موجهه علينه..
كال ..مكيفين بالفرح..ونسيتو..اخذتو مرت اخوية ودخلتوه..للحبس..وتناسبتو..مرة الخ.. صايرين ..دهن ودبس..والكاع الكم..واحنه رحنه بين الرجلين..تحلمون اعوف حق اخويه..الا اخذة منكم ثاني ومثلث..وضغط ع الزناد..الطلقة الاولى..وراهه الثانيه..عياط وصراخ..الدم تطشر..ما عرفت شنو شصار..حرارة نزلت عليه..مادريت دم لو شي ثاني..بقيت واكفة بطولي..عيني غمضت وحسيت بوجع قوي يريد يكتلني..
ماحسيت بروحي..صوت الطلقة مراح من اذني..حسيت بحرارة.. وصخنت وعركت.. هذا اخر شي اتذكرة..
بلال..عرس والدنيه مشتعلة..فرح..ولمة ومودة..بعد طول الكطيعه..اني ماجنت غافل عزينتي.. متابعهه واباوع عليهه..عيوني تدور عليهه بكل لحظة..وجهه مصفر ماعاجبني..ولابدة..وهية مكيفة وفرحانه ..اعرف بيهه شي..وبنص اللمة..طلع اخو محمود..يهدد وموجه بندقيته..ما عرفت منو يقصد..هوة ما جان محدد احد ..اني بساع حضرت سلاحي..من يوم خطفو زينه وسلاحي مايفاركني..خوفي على زينه..لتتصوب..هوة يحجي..واني اوخر الناس الكدامهه..حتى اغطي عليهه. وما اخلي يأذيهه..وسحبت وحضرت الزناد..هوة ضرب..واني ضربت بنفس اللحظة.. نزل واني نزلت..ابن الحرام مثل ما افتهمت جان قاصد زينتي...
عيط...بعلو صوته...زيييييينة...هاي الج..ولطفلج.. ضرب طلقه وضربت طلقه..
طلقته حسيتهه استقرت..بلحمي..دمي تطشر..وهوة وكع من فوك حصانه..ضربته اوكعت..شفت زينة واكعه..وعيونهه مغمضه..ماكدرت اغمض عيوني..وزينتي واكعه..كمت اصيح زييييينه..زيييينه..وعيوني غمضن..بالكوة..عليه
تفلش العرس.اني دخت من الصدمه..ونزل عليه مي الراس..بس ماشافت شي..بلال انضرب طلقة بصدرة..وعبود..اخو محمود اتصوب ..خالتي رصاصة تايهه ..شخطت جتفهه..جرت عبود وكعته من حصانه..حتى بلال طلقته تخطة..ومايجيبهه بيه ويبتلي
..تحول العرس لعزة وتحولن الهلاهل لعياط..وبجي..ام بلال تركض لولدهه..امي..تحرك بية وترش وجهي بالمي حتى اكعد..لان على وجه ولادة..ورجل بنتهه مضروب..خالتي نست بنتهه العروسه..ونست العرس..وكامت على بلال وتبجي وتعيط..كلبي على وليدي..يا حبيبي اريد اروح لوليدي..خاف يموت..ياوليدي منو النه..افتح عيونك وليدي..
تبجي وتلطم...العروسة انخبط كحلهه بالدموع ..وتخربط مكياجهه..الدنية انكلبت..صياح وبجي..والفرحة ما كملت..
عمي حمادي وابوية..يوخرون بالنسوان..وبهدوء بدون ماينفعلون..عمي كعد يم بلال قاس النبض..كاللهم بعده حي..بس نبضة ضعيف..كالو للشيخ اعقد.انته..لاحمد ورجاء..لا تعطلهم..انته وكيلنه..بغيابنه..والبنية احسبهه بنتك ..عمي كال ام بلال انتي ونجاة..اهتمو بزينة..حتى تولد..بخير..واني ومحمد نودي بلال لل مستوصف..ضربته..خطرة هواي.. والبقية روحو جيبو الشرطة ..لعبود..خلي يلحك اخيه..
عيطت خالتي..ام بلال..والدموع على خديهه
كالت اااااه حبيبي .. تردوني ابقة بالعرس ووليدي بين الحياة والموت..اخذوني وياكم..
عمي حمادي..كاللهه..لزمي روحج يامرة..لا تخبليني..الفرح ماشي..واني وهل رجال..رايحين وياه..ابقي وية مرية ابنج..واوكفيلهه..
سكتت وما حجت. اخذو بلال ..وشكو جاكيته ..والدشداشة ولفو جرحة وركبوه على الحصان..وطارو بيه وياهم جم رجال..من وجوه الديرة..
الشيخ..كتب كتاب..رجاء واحمد..النسوان كعدت اتاني ..وهية ملمومة بنص الحوش..اي خبر عن جرح بلال..وجيابتي..
دخلوني..حتى احضر روحي للولادة..ولو اني جنت محضرة روحي للعرس..فما يحتاج احضر..الليله شكد صعبة..وشكد مرة..اني اتوجع وعلى وجه ولادة..وبلال..بين الحيا والموت..والعرس انكلب حزن..
عمي حمادي..يركض بوليده والرجال وراه..الجرح ينزف ..ميريد يوكف..وهوة يعس بحصانه كلما وكف..يبجي ودموعه تجري..ساعة يحجي شوية شوية..
لو موعيب التولول..جان عددت مثل النسوان..وليدي لاتعوفني وتروح..وتموتني بالحياة..ياوليدي..انت اللي طلعت بيه من الدنية..فارس اهلك وديرتك وزين الرجال..وليدي ..افتح عيونك..اني ابوك..لا تفجعني ..شكد مرة دمعه الرجال..وبجي الرجال..وصلو للمدينه..وبلال بدنيه ثانيه..لا فتح عيونه..ولا حجة كلمة..وجهه اصفر ونشف الدم بجسمه..وعيونه ابيضت..
عمي حمادي..ايد لازم بيهه لجام الحصان وايد لازم بيهه جرح بلال..
ويحجي ويكول يا ريتهه الضربه بيه ولا بيك..يا ريت يا وليدي..والرجال..يسكتون بيه..وما يسكت..ولا يخلي احد غيرة يداريه..محمد كاله عمي خليني اركبه وياي..ولا تبجي.. اني اوصله..
كاله لا..لا ما انطيه لاحد ..خله اذا يريد يموت يموت بين اديه..خليني احس بحرارته..قبل ما صاحب الامانه ياخذ امانته..
عمي حمادي كاللهم اريد اصلي واني الحككم..كالوله ماشي..صلى ولحكهم..بهذيج الحظة اكو بيكب مالت زرع مطرطعه مرت من يمهم وكفوهه وتوسلو بصاحبهه بس يوصلهم للمستوصف..وكفهه محمد كاله خالي عدنه مريض متصوب ودينا للمستوصف تكسب اجرنه..
كاله اي اخي جيبه ركبه..وانتو هم اركبو وياه..
كاله الله يباركلك..باولادك..
لاحت فرحة الامل بكلوبهم..وعيونهم..ركبو بلال وركب وياه عمي حمادي..ومارضه يعوفه..ومحمد والبقيه لحكوهم بالاحصنه مالتهم..
طار السايق بالسيارة ..لان حس بخطورة حالة بلال..من غير ما يسأل ولا يحجي..مشة بكل سرعته..وسيارته مكسرة تسمع اطكطك الحديد..وبكل طسه اطير السيارة وترجد بالكاع..السايق كام يسابق الزمن..وبلال نبضه..ديضعف..ودمة..ينزف منكطع..ابد...
اني..فتحت عيني..علفراش. امي بصفي..ونسوان داخلة وخارجة..ليهسه مفتهمت امي ليش تبجي..والدموع تجري من عويناتهه..
كتلهه..يمه شكو شصار...
كالتلي ماكو شي بنيتي طلقه تايهه بالهوة..كملنه العرس بخير..بس انتي خوفتينه عليج بنتي..من اجيت وكتلج وجهج مخطوف..ومعاجبني..عرفتج على وجه الولادة..
كتلهه وبلال وينه..شلون اولد وهوة ماموجود..
كالتلي..شنو بنيتي.. عدنة رجال تدخل ويه النسوان بالولادة..عيب بنيتي..
كتلهه وليش تبجين..يمه..
ماكو شي بنيتي كلتلج من الفجعه..كلهه مقهورة عليج..هاي خالتج..ام بلال هم كاعدة هنا بس نريدج تولدين وتكومين بالسلامه..
دخلت رجاء.. وجهه غركان بالدموع..وعلياء..وخالتي..هم يبجن والدموع بوجوهن..
كتلهه يمة كولي الحك..شنو شصار..
كالتلي ماكو شي..كلتلج اشبيج انتي بس حيري بروحج..
كتلهه اي ميخالف..كمت وكمزت من الفراش..وهية لازمتني..ملصت روحي منهه ملص..وطلعت ..لكيت النساوين..تبجي..وخالتي..ام بلال..بنصهم..فتت بنصهم..ومشيت لخالتي..
كتلهه خاله..شكو..شبيكم..ليش تتباجون..؟؟ترة اني جاي اولد مو راح اموت..انوب قوة البجية..وكامت تصرخ..وتصيح...
ااااااه يازينة..بلال كتلوه..رمة بحاله جدامج..وفداج بروحه.. الطلقه كسرتله اعظامة..حبيبي وليدي..ما طلعت بغيرة من الدنية..
اااااااه يمة..وليدي الوحيد..راح يموت..راح يتيتم ابنه..
ما منتبهه شكالت..وشحجت..عقلي نشل..شنو يعني عيون حبيبي بعد ما اشوفهه ..لا..لا..مو صدك..كل اللي كالته خالتي جذب..بلال ميموت..بلال راح يشوف ابنه..
خالتي كالتلي..ياريت بنتي..ضربته جتاله..الله لا يوفقه..ولا يهنيه الموت رحمه بيه ...
ما افتهمت..شاسوي.. شأكول..دموع ..ما لكيت بعيوني حتى اشمرهن..كعدت..وكمت اولول..بلال ميموت..بلال ميموت..حبيب كلبي..
لكيت عقلي..كالي الحكيه..كمت رحت لصريفه الاحصنه..وامي تركض والبنات ورايه يركضن..كوة كوة اذب الخطوة..امي كالتلي وين رايحه..مخبله انتي..
لزموهه جيبوهه..رجعوهه..كتلهم عوفوني..عوفوني اريد الحك على رجلي..بلال يموت واني هنا..
امي كالتلي..يبنيتي ترة انتي على باب ولادة..ومي الراس طك..وين ترحين ..تردين
طفلج يموت..ابطنج
كتلهه..ميهمني ..بعد بلال شلي بيه..دموعي نزلت..حارة..ابجي والغصة تخنكني..يموت هوة ولا يموت بلال..خلوني الحكة..خلوني اموت كبله..عوفيني يمه..يمه اني مو بنتج..عوفيني لخاطر الله..يمه هوة فداني بروحة..اضرب كلبي بايدي واعيط..يمة كلبي راح يموت..
كلهم كامو يتباجون ويجرون بيه..ردت املص روحي منهم..واني ارفس وانفض بروحي..بوسطهم..الوجع اخذني..وزاد..
ااااه..ااااه..يمه خليني الحكه..يمه شلي بالعيشة من بعدة..يمة بس اطمن عليه..وبعدهه اولد..
كالتلي يمه شتكولين انتي..
انتي بعصرات الولادة..يله يمه ارجعي لدارج..اولدي ورجلج ان شاء الله يكوم بالسلامه ويطيب..انتي بس ادعيله..جرجروني..واني ابجي واعيط..ما اريد اولد..ما احب اجيب وبلال ماكو..يمي..رجعوني لداري..وسدو عليه الباب بالمفتاح..اني والقابله..وامي..كسرت الباب من الضرب..الوجع زاد عندي..كمت امشي رايحة جاية ..ابجي واعيط..مرة من الوجع..مال الولادة..ومرة من وجع الفجعه.. كام يطلع دم مني..ولوجع كتلني كتل..ما كدرت بعد اكابر..تمددت ع الفراش..وبديت رحلة الولادة..بعصراتهه...اتوجع واعيط..واذكر بلال..ادعي يرجعلي بالسلامه..
وصلو بلال للمستوصف ..مدري مستشفى ..جانت بنايه كلش جبيرة..وناس طالعه منهه وناس طابه..بلال جان شبه ميت يشخر شخرات الموت..عمي حمادي..يعيط..اركضولي.. تلاحكولي..تلاحكو لولدي راح يموت بين اديه..
جوي الممرضين يتراكضون واالسدية وياهم اخذوه من بين اديه..وحطوه ع السدية..وطلعو بيه ركض لدار العمليات..دخلوه والجماعه كعدو برة..يدعون رايحين جايين..يتانون رحمه الله يصبرون بعضهم..ويدعون..ساعة وطلع ممرض راد دم..الكل وكفو..كالو نتبرع.. اتبرعو كلهم..وكعدو يتانون..الساعات اللي مرت..جنهه دهر..احمد العريس وصل للمشفى..لكة ابوه بلهفة كاله هاا يابه طمني شلونه بلال..
كاله بعدة بدار العمليات..انطيناه دم..ودنتاني..ربي يفعل الخير..
لتخاف وليدي..بلال رجال قوي راح يطلع منهه بقدرة الله..ادعيله ربي يكومة بالسلامه..
الوكت طول والخوف ملة الكلوب..والدمعه..جفت..بالرموش..والرعشة صارت بالجسم..والنبض..يرجف..وما عاد بيهه مجال..واسو ارواحهم حتى بالحجي..انفتح باب دار العمليات..والطبيب وياه ممرضين تلاثة..طلعو..ووجوهم حمرة..وزركة..وهم ينفخون..ملامحهم ما تفرح..فزو الكل..عمي حمادي..ما كدر يوكف..شد حيلة او وكف جان يوكع..رجعوله شالوه وكفوه..وجروه كعدوه على كرسي الاستراحه..
كال..وليداتي اني ابوكم..طمنوني ..ارحمو شيبتي..وبردو كلبي..
سكتو محد جاوب..وكف الكلام..والدمع تطشر..لا حول ولا قوة الا بالله.....وللحكاية بقية...
#ليوثي المياحي....
ثار الدم.. بدة بالدم ..ونتهى بالدم..الثار يضل ثار..ويجر لولد لولد..شارفت روايتي على النهاية ..
تابعو معي الاجزاء الاخيرة من رواية ثار الدم...تحياتي
