وفاتو ايامات عادي جدا ... ومرة كان الجو حلو مقعمزين في الجنان ..ماما كلمت عمي .. اني كنت نهدرز بس لما سمعتهم
ماما : امس كلمتني ام الولد الي خطب امل يبو رد
عمي: تو نكلم رضوان ونسأله شن صار معاه
اني: هه مستعجل
رتاج: شيمو انتي كويسه
اني: بنخش الحمام "ونضت بسرعه خشيت للحمام وسكرت ع روحي ... فتحت الشيشمه وقعدت نشبح لي وجهي في المرايا ... لي لحظه حسيت دمعتي حاتنزل ... بس فجأة وقبل ماننهار ونبكي خطر عليا محمد وكلامه "💔
《 محمد : باهي لو طلبت منك شيء اديريه
اني: لو كنت نقدر انديره ليش لا
محمد: اصلا مافيش حد يقدر يديره غيرك
اني: خلاص معناها اطلب
محمد: معش تبكي .. وحياه اغلا حاجه عندك معش تبكي ... اول ماحبيتك .. حبيتك من صوت ضحكتك ... نبيك ديما الضحكه في وجهك ... خليك ديما واتقه مافيش حاجه تستاهل انك تبكي وادمري روحك علي خاطرها .."سكت شويا وكمل".. صاعب طلبي
اني هزيت راسي بالنفي : نوعدك 》
اني : اني وعدته خلاص .. خديت اميه وقعدت نغسل في وجهي .. قمت شعري فوق سكرت الميه وطلعت ... لقيتهم كلهم واقفين فم الباب
اني: هه خيركم
رتاج: انتي كويسه
اني: كويسه اي علاش فيه حاجه
ردينه: والله كان تقولي باهي نحكي لي ماما كل شيء ونفركش خطبتهم
اني: ردينه بلا هبال .. شن الدوه هده .. خلاص اني عبدو نسيته معش تجيبولي سيرته .. خلاص ربي يهنيهم
مها: شن الي غيرك .. من امت تتكلمي هكي
اني: الدنيا غيرتني .. الواحد مايتعلمش الا من أخطائه .. واني غلطتي الوحيدة في الدنيا هده حبيت واحد زي عبدو
نسيبه : خلاص عاد من غير نكد ليا سبوع مروحه ومدهورتونيش في بلادي
اني: هي علي خاطر عويناتك امشو البسو وعازمتكم ع العشي
سلمى: ووين ناويه تركبينا انشاءلله😂
اني: تي تسد السياره غير هيا البسو
كلهم: هي ع السريع
ومافاتتش نص ساعه الا كنا لابسين وواخدين ادن من عمي ع الطلوع
عمي: لكن المغرب تكونو في الحوش
اني: عابيه نتعشو بره احني
عمي: ادهورو واشرو عشاكم من بره وتعالا تعشو اهني
اني: حتى هدا راي باهي
ماما : امل امشي معاهم خير ماتفعدي مكسده بروحك
امل: لالا ماعنديش نيه
