فتحت عيوني بصدمه وتلفتت طوول لي حوش عمي ... دورت بعيوني بس مافيش ولا واحد واقف .. اصلا المربوعه من الخلف ... من وين يشوف فيا ... وقطع تفكيري صوت مسج
"نزلي عيونك وخشي تو يشوفك حد "
خديت فوني واتصلت بيه
اني: من وين تشوف فيا
سكر عيونه وتنهد : استاحشت صوتك 💓
رعشت بما فيا .. اااخ واني استاحشته ... سكتت
محمد: زعلانه ؟
اني: من الخطبه ؟
محمد: اي
اني: طول اليوم كنت نحاول نكون عاديه ... بس لما شفتها ولما قالو هو بيخش .. شعور غريب انتابني وماحبيتش نشوفهم مع بعض
محمد: قعده تفكري فيه ؟
اني: أبدا
محمد: نسيتيه ؟
اني: ومستغربه كيف نسيته بالسرعه هده
محمد: انحبك ياشيماء وحبك لي غيري يقتل فيا
سكرت عيوني وتنهدت: بس اني معش نحبه
محمد: واني شن بالنسبه ليك
اني: حاجه حلوة تعودت علاها .. تعودت كل يوم نتصبح علي كلام حلو منك ... لما نضايق انت الوحيد الي تهديني ... بس نسيانك ليا السبوع الي فات ...
محمد قص عليا : عمري مانسيتك في كل تانيه وكل دقيقه انتي في بالي وفي تفكيري
اني: والأيامات الي فاتو
محمد: كنت مجبور
اني: شن الي جابرك باهي ؟
محمد : التقه الي عاطيهالي زكريا ... مش قادر كل مانكون معاك نخون في تقه صاحبي ... وو نموت الف موته لما نكون بعيد
اني: محمد
محمد: ياعيونه
اني: تعودت علي وجودك الأيامات الي فاتو حاسه بفرااغ كبير في حياتي
ابتسم وقعد مركز في ملامحي : بالرغم من بساطه كلماتك ... بس لو تعرفي كميه الفرحه الي في قلبي حاليا
اني: نبي نشوفك
محمد: قيمي عيونك
قمت عيوني واصطدمو بعيونه .. نظراته .. اااه ... نظراته هي المضاد بالنسبه ليا ... بنظرة من عيونه .. يسحرني وينسيني في العالم كله ... نظراته وكلماته هي البلسم لي قلبي ... لوو .. لو غابو غليا .. مستحيل مش متخيلا محمد مايكونش في حياتي .... الأحاسيس الي محاوطتني الفتره الي فاتت ... تفكيري فيه .. وغيابه شن دار فيا ... وعاني علي هلبا حاجات كنت متجاهلتهم ... او اني نتعمد نسيانهم .. ومن اهمهم .. انه ملك قلبي بالكامل 💓... اها نعترف انه حبيته ومن غير مانحس بروحي ... حبيته ومش متخيلا حياتي من غيره ... حبيته ومستحيل نخفي حبي اكتر من هكي .... وعاني من تفكيري ومن االنظر لي عيونه ... كلماته وهو مبتسملي 💓
