بغداد

الفصل الخامس

#بغداد
الفصل الخامس
#قصص_اسراءالجميلي

لبست امي ثوب نيلي عدل و فوكاه صاية مفتوحة نيلي ..
بيه مربعات بيضة مداخله وحدة بالثانية ..
امي ضعيفة مو سمينه و هيه حنطاوية و عيونها لونهم اسود ..
اجتمعنه كلنه و كل الاقارب جوي ..
سمعت ام كرم تحجي وي هدى مرة علي الي هي تصير اختها طبعاً ..
ام كرم : شوف هاي ابنها ميت مصار اله سنتين و رجعت لبست الوان غير روحها خضره ..
هدى : اي حبيبتي قابل مثلج دفنتي روحج بالحيا و رجلج عدل و متونس اتعلمي منها ..
كلش انقهرت على امي ..
و خفت من ام كرم بنفس الوكت ..
بس ما بينه مشاكل و اريد نفرح شوية تعبنه الحزن ..

رحنه مع انو الاوضاع بدت تصير صگط بس ما اندير بال ..
وصلنا و اول مدخلت العيون عليه بس و عافوا  العروسة ..
اني ملامحي عادية ..
بس كرم دوم يكلي عندج جاذبية مو طبيعية دمج يلعب لعب بيه ..
الظاهر مو بس بيه بكل البشر ..

خطيبة وسام كلش حبابه ابد و لا ضاجت مني و لا شى وردة مال الله ركصنه و ونست نفسي و كلت طز بالدنيا ..
لبسوها ذهب و كلللليييييشششش ..
امي تضحك و تصفك بس اني الوحيدة اشوف الدمع بعيونها و الحزن الي ماليهم ..

هاي جانت ١/١٠/٢٠٠٥ ..
المهم صارت بالسبعة و قررنه نرجع انخاف من الشارع ..
فاجونه الولد اخوتي و دنصعد بالسيارات ..
صاحني خالد : مريم روحي اصعدي بذيج السيارة ..
اباوع سيارة بي ام حلوة سودة رحت لكيت كرم و امه و اخته و خالته منى ..
صعدت وياهم ..

بس يباوع عليه بالمراية و اني كل شوية يوكع شالي و ارجع اصعده و هو يخزرني ..
كلهم كل شوية يسمعوني حجاية على لبسي و شكلي ..
و هو بس ساكت و لا عبالك يمه ...
امه : عسى الماخذ عقلك ما يتهنى بيه و لا لحظة ..
ريم : اي و الله ماما كون يمرضه و يخلي يتركه بحاله ..
منى : ربي يرزقك باحسن زوجه كون دكتورة و راقية و اتكيت و بت ناس ..
شحط السيارة سريع و وكفه راساً كلنا اندفعنه ليكدام و رجعنه ..

امه : هاي شبيك جان متت و موتتنه ؟
كرم : هاي حتى تسكتون دمرتوني مدا اكدر اسوق ..
امه : العفو عيني هاي جزات السهر و عفت الدنيا و اهلها الخاطركم و ضاع عمري بلاش ..
كرم : العفو امي بس و الله ثبرتوتي و مدا اكدر اسوق و اخذ ايدها و باسها ..

اشو اندارت عليه تباوع بطرف عينها من فوك ليجوة سكتت و لا كانوا شفتها ..
رجع شغل السيارة و مشة بطريق بيت اهله ..
ام كرم : هاي وين حبيبي شنو نسيت مريم ويانه ؟
كرم : لا ماما منسيت بس عزموني الولد ابات يمهم ..
هااا اي ودي مريم و ارجع ودينه و ارجعلهم ..
ماما اتعب بالطريق ليش هيج اوديكم افضل ..

المهم رضخت للامر الواقع و وداهم و نزلو و سلموا من وره خشمهم ..
كرم : تعاي ست الحسن اكعدي يمي ..
اني بدون و لا كلمة نزلت و رحت كعدت بصفه ..
حرك السيارة سريع مشينه شويه بعدها وكفنه يم ابو نؤاس ..