بغداد

الفصل الرابع

# بغداد
الفصل الرابع
#قصص_اسراءالجميلي

و الله لا جنت احبه و لا اكره ..
رئيسنه و خلص بس ليش طلعه لييييش ؟
عمي هو راد يسويها قبل ميسوها الامريكان عود بلكي يكسب شعبه ..
بس الظاهر احنه واصلين للاخر و تعبنه ما بينه بعد ..
اي والله دمرنه بحروبه ..

دخلت البيتهم كتله خالو كلتلك بيبيتي اني حبقه يمكم ..
اي يابه اهلا بيك ..
اجتي مريمانه دخلت لابسة بجاما نص ردن بنفسجي بيه ميكي و البجاما الجوة سادة حافته سودة و شايله شعره ذيل حصان ..
فاتت اخ يا ريحة الجنه ..
اوووف الهوى الطب وياها ..
شكد حلوة هاي الابنية ..
شلون تدخل للقلب بلا ما تطلب اذن ..

مريم : بابا ماما تكول اسوي باميا مو ؟
هاي شنو كرم يمنه ؟
باوعتلي متفاجاءة كبرت عيونها الحلوات ..
شلونك كرم و عمه شلونها ؟
هلا بـ مريم الحمدلله انتِ شلونج ؟
زينه الحمدلله ..
بعدج اداومين ؟
لا يمعود يا دوام ؟
اي صحيح اذا اني رجال كعدت شلون انتوا بنات ..
اي صح كلامك ..
حتبقه يمنه على الغده ..
اي ليش تريديني اروح ؟
لا يابه مو قصدي هلا بيك ..
بالمهلي تسلمين ..
عجيبه هاي الابنية بكل حرف تنطقه تزيد محبتها بقلبي ..

بابا هاي شنو الجنطة ؟
هاي مال كرم حيبات يمنه كم يوم ..
( اشو هاي صار وجها احمر يجنن )
و عيونها لمعت لمعه غريبه ..
معقولة حاسه بالي بداخلي ناحيتها ..
ها يبات يمنه .. اهلا بيه ..
شكراً مريمانه ..

بابا : ههههه مريمانه شنو ؟
عمو هذا دلع يصيحون مريم بيه ..
بابا : هااا خوش دلع ..
عاشت الاسامي ست مريمانه ..
اني : ههههههه شكراً بابا ..

فرحتي ما وسعتني من عرفت كرم حيبقه يمنه ..
ليش ما ادري ..
بقه يمنه كلش اتونست وياه عبالك بوجوده كل الاحبهم يمي ..
فد يوم واكفه مقابيل المغسله ..
اكو مراية فوگاها غسلت و باوعت على نفسي ..
و اول مرة اشوف نفسي كانثى ..
ظليت اباوع على عيوني و تلمست شعري ..
اكتشفت نفسي حلوة و جميلة و طويله ..
شفت بالمراية وجه كرم ..
كرم : هلو يا حلوووو ..
خجلت و جاوبته بهدوء ..
هههههه شكراً ..
تدرين انتي احلى وحدة شافتها عيني ؟
صرت حمره دم وجهي صار نار عبالك واگفه گدام الطباخ ..
شكرا بس انت ليش هيج تحجي ويايه ؟
عادي بت خالي و احب امدحها ..
امممممم خوش ..

صاحتني امي ..
عبالك جنت مقيده و بصيحتها فتحت القيد ..
بس العجيب القيد حلو و چنت مستمتعه بيه ..
ماما : مريم حبيبتي تعاي ساعديني دنصب الغده ..
اي ماما ..
رحت ركض و قلبي يدك مثل الطبل ..

ماما : هاي شبيج ليش حمره ؟
هيج ماما ماكو شى ..
حبيبتي اريدج تشدين حيلج و ادخلين معهد معلمات ؟
ليش ماما حبابه خليني اكمل و ابطل اريد اساعدج اني انقهر عليج وحدج ..
حبيبتي انتِ ممقصرة و دومج تساعديني ..
بس اني احب بنتي تصير معلمة ميصير تحققيلي هاي الامنية ؟
حاضر ماما صار الي تحبيه و تريديه اسوي ..
نوعيتي حبابه و مطيعه و سديدة الرائ ..
اهلي يحبوني و يثقون بيه لهذا السبب ..