بغداد

الفصل الثالث عشر

#بغداد
الفصل الثالث عشر
#بقلمي_اسراءالجميلي

قبل ما نصعد طلع كرم من جيبه علبه ..
لبسنه كلايد مسويها من الفضة بيها اسمائنه و عنوان امه ابغداد بالانكليزي و حتى رقم تلفونها ..
باوعتله باستغراب و عجب ..
هاي شوكت سويتها كرم ؟
حبيبتي من اول مقررت اروح بطريق التهريب ..
حتى اذا صار شى بينه لا سامح الله يعرفونه منو و ما نضيع ..
اسم الله علينه حبيبي ..
يا رب هذا الطريق الصعب الوحيد بحياتنه ..
امين حبيبة روحي ..

لبسونه نجادات عود حتى تحمينه ..
صعدنا بالزورق و اني تعهدت بـ ايلين و كرم بـ مهند ..
شلون زورق عيني نفخ جنه مسبح الجهال الي انفخه الهم بالبيت ابدنبوس ربطة يطك و نروح كلنه ..
يمكن خمسين واحد صعد ويانه بزورق ميستوعب هيج عدد بس الحجي ميفيد ..

احنه بالزورق كامت تمطر قوي مع انو احنه بشهر السابع ..
دخل مي بنصه ..
و الدنيا ليل و كلشي ما انشوف بس نسمع اصوات بعض ..
بده الخوف يسري بينه مسرى الدم ..
الخوف من النهاية المره الصعبه ..

ما كمنه نسمع غير بس صريخ الاطفال و النسوان و حتى الرياجيل ..
كلها تدعي بصوت عالي كله حزن ..

يا رب يا الهي نجينه ..

يا ربي نجيني و بعد ما اشرب ..

ربي نجيني اريد ارجع اشوف امي ..

ربي بجاه حبيبك و سبطيه و الامام علي و بنيه نجيني الولدي ربي ..

ربي احفظني بحق مريم العذراء البتول ..

دخيلك يا الله شو هيدا ..
ربي انقزني منشان ولادي و اُمُن ..

ربي نجيني بحق محمد و شيوخي ابو حنيفه و الكيلاني بقيني الخاطر امي اني وحيدة ..

امي يا امي وين تركتيني ..
تركتيني هون لحوت البحر ..

يمممممممه ربي بحق اولاياك الصالحين خليني انجوا و التقي بزوجي ..

ياااااابه صوجك عفتني بعد ما ماتت امي خطيتي بركبتك ياااااابه ١٦ سنة و تهربني حتى تفضه المرتك و جهالك منها ..

بخوفنه و عذابنه و شدتنه توحدت كل الصفوف من اجتي النهاية ..
مع الاسف ..
الا الضيم يجمعنه يلا نحس ابعضنه احنه البشر ..

ناس كومة كل واحد ضيمه شكل و يحجي و يدعي شكل و بصوت يرج موج البحر و يعليه ..

اني و كرم نتشاهد و حاضنين جهالنه و مرعوبين ..
اسمع صوت كرم يحچي بعياط و الم ..

وج مريمانه اذا نجيتي ديربالج على نفسج و الجهال ..
لا توگفين امشي بطريقنه نفسه صيري اقوى مريمانتي ..
تزوجي ترى المره العربية ما تكدر بلا رجال ياكلوها الذيابه ..
رديتله بعياط و بچي ..
لا عفية كرم لا تكول هيج من عمري الك ..
ربي انقذنه ..
ربي تعبنه ..
اريد نرتاح ربي ..