أماني ♧

بارت ٥

مسائكم ورد حبايبي ...

.....أماني ♧.....

بقلم :Aseel🌷
...البارت٥
...

_اماني :
من رجعت لفراشي ضليت اتذكر امي وابوية وشلون جانو يعاملوني وشكد جانو مدلليني ...

من اجة على بالي عبودي اتذكرت شلون اخر مرة شفتة ...

جان راسة مزروف وعيونة مفتوحة .. وامي نايمة فوكاه وحاضنتة ...

منظرهم ميروح من بالي ابد...
مادري بروحي غفيت ..

بس حسيت روحي عبالك صدك ابوية وامي واخوية عبد الرحمن ..

اجوي لبيت جدي واني رحت اركض عليهم مامصدكة ..

اكلهة يمة عبالي صدك عفتوني ...
ادري بيكم تحبوني وميهون عليكم اعيش بدونكم ...

فدوة اخذوني وياكم    ....

بس ضلو ساكتين ..  

بعدين اجة عبودي باسني وانوب امي باستني ..

اخر شي ابوية من باسني كال ...

_بنيتي صيري سباعية احنة جينة نسلم عليج ونروح لان مسافرين بعيد كلش ...

ومنريد ناخذج ويانة انتي ابقي يم بيت جدج واتحملي لخاطري ...

_اماني: ضليت ابجي واسمع ابوية شيحجي ..
كتلة ..
بابا انت متدري شيسون بية بس صارلي يوم واحد ..
وهيج يسون شلون ابقة بعد ....

مجاوبني اخذ عبودي .. ومشة هوة وامي ...

واني اصيح وراهم اوكفو بس البس حذائي واجي وراكم ...

ضليت ادور على حذائي ماكو ..
اخر شي طلعت حافية لكيتهم راكبين السيارة وماشين ...

ظليت اركض ورة السيارة والحصو مال الشارع طب برجلي عبالك الوجع صدك ادوس عليه ...

واني اصيح فدوة بابا لتعوفي باااابا
لتعوفوني هنا ماريدهم ...اوكفوو ..

ضليت اصيح لحد ما اختفت السيارة ...
وكعدت بنص الشارع ابجي ....

اخر شي رجعت لبيت جدي لان ماكو بيوت بالطريق غيره ...

واني طبيت ....

فزيت من نومي على صوت صياح .. وعياط قوي ..
طلعت اركض طلعو جايبين توابيت اهلي...

لان هستوهم مكملين اجراءات النقل والتحقيق ...

وعماتي من شايفات التوابيت كايمات يعيطن  . 
لان مشايفاتة صار كومة ...
ومالحكن يشوفنة  ..

اني من شفت التوابيت ماعرف عليمن ابجي لو عليمن اركض واحضن ...

ثلاث توابيت بيهن اعز ما املك ...
ابوية ...
امي ...
اخوية ...
منو بيهم اروحلة اول واحضنة ... ضليت بمكاني ..