ابتزاز اودى بحياتي

بارت 1

بارت 1

من اول ما نوعى عالدنيا نشوف حياتنا عبارة عن مطبات وعوائق ونواجه الكثير من الصعوبات بس احنا كبشر نختلف من شخص الى اخر ،واحدنا من يعثر ويلكي ايد ترفعه وضهر يستند عليه يختلف عن الي ماعنده سند رغم وجود اهله وناسه يمه ،تعرفون شنو يعني من اني طفلة اذا وكعت بمشكلة احلها وحدي ،اذا واجهت مطب بحياتي اسعى واتعب حتى اعبره بدون مساعدة احد ،

والسبب شنو ....؟
السبب هو اني انولدت بعائلة تمشي ورا العيب وتخاف من كلام الناس اكثر من خوفهم من رب الناس ،انولدت بعائلة عدهم البنت هي عار وهمّ الى ان تموت ،والولد هو عز ورفعة راس بكل افعاله مهما كانت ،

اششش وعيب واسكتي وميصير والناس شتكول،،هذه الكلمات الي خلقت بيه رعب من هذا المجتمع كوني فتاة يعني اني عبارة عن زجاجة رقيقة ،والزجاجة ما تتحمل الخدوش اي خدش او وعكة بسيطة راح يسبب تشوة بهالزجاجة والي راح تضل طول عمرها بهالتشوة ،وماترجع لصفائها ونقائها ،هيج اتعلمت وعلى هيج ربيت ،هالشي هو بي ناحية ايجابيه وناحية سلبية وراح تشوفون تأثيرهم على مسار حياتي .

مهى البنت الوحيدة لعائلتي ويا ثنين اخوان منتصر وعمار ،يمكن تسمعون البنت الوحيدة يجي على بالكم البنت المدللة والمحبوبة بس اني مو هيج ابداً.

امي تفضل اخواني عليه وجانت ومازالت تنتقص مني كوني بنية ماعرف السبب ولحد الان اجهله
اما ابوية فجان انسان متقلب بين القاسي والحنون مرات،
اخويه منتصر اكبر مني ب٥ سنوات وعمار صغير اول متوسط ،
عدهم مننوع عليه كلشي يسوو البنات الي بعمري من لبس واهتمام بالشكل من حفافة او غيرها حتى الدراسه وصلت ثالث متوسط ورادو يبطلوني رغم اني من الطلاب المجتهدين بكل مرحلة دراسية ،بعد عناء وتواسيل وتعب وتدخل من خالاتي حتى يقنعون ابويه حتى ارجع اداوم واكمل اعدادي
قبل اكمل بشرط يريد معدلي بكل سنه ميقل عن ال٩٠ كانما حطلي شرط تعجيزي حتى يبطلني ،بس ميعرف اني كدها والحمد لله كدرت اكمل السادس اعدادي وبمعدل جداً عالي وكفت بوجه اهلي بي حتى ادخل للجامعة الي احلم بيها .
جنت متاكده من المعارضات خصوصاً منتصر الي جان يسعى بكل الطرق حتى يخلي بابا يبطلني من الدوام حتى ابقى تحت رحمته وذله ،بس مكدر بابا يمنعني بعدما تعبت وحققت هيج معدل وافق ادخل الجامعة ايضاً بشروطه من لبس الجبة الاسلامية الطويلة وممنوع اي زينه او مكياج على وجهي طبعاً مستعدة وموافقة على كل شروطه اهم شي مستقبلي ،وافق ودخلت كليه هندسة.

مهى :ياربي معقولة راح اعيش اجواء الجامعة واشوف الجامعة وطلابها واحقق حلمي ،الف حمد وشكر الك يارب من هديتهم عليه وخليتهم يوافقون .
-ماما شوكت نروح نشتري ملابس لدوامي

الام :وجع امي شبيج مصروعة عالدوام ياخوفي من حماسج هذا

-انقهرت من كلامها بس شسوي متعلمه عليها
ماما قابل شعندي ،غير فرحانه بكليتي وراح اصير مهندسة
-دكومي كومي صبي غده وخل يجي اخوج نكله ونروح للسوك