عَشِقتُ مُعذبي

١٠

رجعت نادين للبيت لگت بس ريتاج راجعة من المدرسة وابوهة وامهة بعدهم مراجعين غسلت واتغدت وگعدت اتسولف لريتاج عالصار وياهة وريتاج فرحتلهة وگالتلهة : اي واخيراً راح نخلص من دوختج وهسة هو حيتورط بيج المسكين، خطية جنة على نفسة.
نادين : لا والله هسة اني طلعت امدوختكم امشي ولي لعد بعد لطلبين مني شي ومااخليج تاخذين من المكياج الجديد الجبتة ولتجين ا...
ريتاج : شنو شنو لحظة ، لحظة لتحجين اشگلتي عيدي سمعت مكياج جديد جايبة مكياج اختي حبيبتي فديتج والله انتِ ماكو منج وهنيالة الياخذج اصلاً انتِ ماكو منج والله.
نادين : اهااا هسة شو اتغير كلامج من شميتي ريحة المكياج اووف اعرفج نذلة.
ريتاج : واني اعرفج قلبج طيب وراح تنطيني منهن اكيد مو؟ وبقت ريتاج اتباوع ابنظرات حزينة لنادين وتقهرهة وبعدين گامت نادين وجابتلهة الاشياء لشترتهن وطلعت اصلاً جايبتهن الهة.
نادين : هاج كلبة هاي اصلاً جبتهن الج عجبني وگلت اجيبلج بس متستاهلين.
ريتاج : ادري بيج حقيرة بس شكراً.
نادين : والله رجعيهن لعد. ريتاج : لا لا جذب اشاقة وياج اففف اشبيج متتحملين شقة، لا والله صدگ شكراً حبيبتي ربي ليحرمني منج يا اغلى اخت بالدنيا.
نادين : تدللين عمري ولا يحرمني منج تتهنين بيهم يارب.
ريتاج : احبج. نادين: واني احبج ياقلبي.
بعدهة اجوي اهل نادين واتغدوا وگعدوا سولفوا وابو نادين گاللهم : بابا اني وامكم راح نطلع وية الشركة ابرحلة اتسافرون ويانة حضروا نفسكم لأن باجر احنة طالعين ، ريتاج بدون تفكير : اي بابا اي اروح وياكم اني. أم نادين : وانتِ ماما نادين تجين ويانة مو. نادين : ماادري ماما اني مااگدر اسافر هسة عندي امتحانات ومااگدر أجل اريد اخلص وارتاح .
ابو نادين : بابا احنة منطول بس اسبوع ، عشرة ايام بالزايد ونرجع امشي ويانة غيري جو.
نادين : مااگدر بابا اني مااروح اريد اخلص امتحاناتي انتوا روحوا اني اظل يم خالة وية البنات مرة يمهم ومرة همة ايباتون وياية.
ام نادين : لعد ريتاج انتِ ظلي وية اختج ومرة ثانية ناخذكم اثنينكم.
ريتاج : افف ماما شنو هاي اني اريد ارووح نادين حبابة اشبيج تعالي ويانة مااريد ابقة امشي انروح وياهم.
نادين : ماما اخذيهة اني ابقة وية البنات خطية خل تتونس وياكم هي ماعدهة شي وهم اتغير جو وترتاح نفسيتهة قبل الامتحانات.
ام نادين : هاهي بس انتِ تبقين يم خالتج ودزي عالبنات اذا اجيتي اهنا لتبقين وحدج ماما.
نادين : اكيد ماما وبعدين هياتهم يمي كلهة خطوتين اذا اصيحهم يسمعوني.
ابو نادين : ميخالف بابا غير نطمن عليج.
نادين : ليظل بالك بابا اني بنتك.
ابو نادين : الله ايخليج الي. نادين : وايخليك الي يارب.
ريتاج: واني بابا لو اني بنت البطة السودة يعني.
ابو نادين وام نادين ونادين ضحكوا ورد ابوهة عليهة : لاحبيبتي طبعاً الله ايحفظج الي هو اني اشعندي غيركم بناتي الغاليات.
ريتاج : يوومة بابا حبيبي ولا يحرمنة منك يارب.
ريتاج : اني حروح احضر غراضي حتى مااتأخر يلة ماما انتِ هم گومي حضري غراضكم حتى انام وماعدنة شي.
ابو نادين : اني حگوم ارتاح باجر وراية گعدة من الصبح.
نادين : اني حروح للغرفة.
ورة نص ساعة اجتي ريتاج تاخذ من نادين ملابس واشياء وياهة وبعدين رجعت لغرفتهة وبقت نادين لوحدهة ، جانت گاعدة دتقرة كتاب قبل متنام اجتهة رسالة عالتليفون !!
أمير : هلوو غاليتي اشلونج اشدسوين گاعدة لو نمتي اسف داازعجج ابهالوكت بس اشتاقيتلج وردت اطمن عليج.
انتظرت نادين دقايق وجاوبتة : هلوو امير الحمدلله ابخير بعدني گاعدة دااقرة كتاب وبالعكس لا ازعاج ولا اي شي لتحجي هيج وشكراً على سؤالك انت اشلونك طمني عنك.
امير طااار من الفرح من جاوبتة نادين ورد عليهة : طمنتيني ، اني الحمدلله ابخير شكو ماكو اشلونهم اهلج.
نادين : والله ابخير باجر حيسافرون وياخذون اختي ريتاج وياهم واني حبقة يم خالتي او وحدي . نادين حجت هيج حتى اتخوفة عليهة.
اتصل امير وجاوبتة : ألوو ،هلوو امير.
أمير : هلوو ، نادين صدگ تحجين حيروحون وانت تبقين وحدج لتظلين وحدج الله ايخليج ابقي يم خالتج اترجاج.
نادين : وشنو يعني وذا مبقيت وحدي اشحيصيرمثلاً.
امير : شنو وذا وشنو اشحيصير دااگلج متبقين وحدج افتهمتي لو لا لتعاندين نادين.
نادين : اوكي هاهي، بس ترة اني حبقة وية خالتي وبعدين مااحب اطول عدهم عيب ارجع والبنات يجون يمي واصلاً بيتهم يمي يعني قريبين علية اذا احتاج شي بس اصيحلهم يجون ركض لتخاف.
أمير : اشلون مااخاف عليج ، ولج اذا انتِ مااخاف عليج على منو اخاف.
نادين ابتسمت وسكتت مجاوبت. بعدين گلتلة أمير اخذ راحتك اني حروح انام تصبح على خير.
امير : احبج نادين.
نادين : شنوو؟؟!!!
امير : گتلج احبج نادين احبج.
نادين : هاا شكراً أمير.
امير : شنو ها شنو شكراً اتحبيني نادين ؟
نادين : امير مو هسة نحجي مااگدر يمكن بابا ايصيحني يلة باي.
طبعاً هي جذبت عليه وسدت التليفون حتى متحجي بس هي طايرة من الفرح ياربي واخيراً حجاهة وگلي احبج. ودزلهة امير رسالة : احبج يا جذابة راح تحجيهة وين اتروحين مني يعني.
ضحكت نادين وبعدين نامت ، صار الصبح وگامت نادين وية اهلهة حتى اتودعهم وسلموا عليهة وطلعوا ورجعت نادين جوة حتى اتحضر نفسهة واتروح للكلية ومن كملت وطلعت انصدمت هو جان ينتظرهة بالباب....