الاولـــى بحياتـــي

الفصل التاسع عشر

#الاولى_بحياتي
الفصل التاسع عشر
#بقلمي_اسراءالجميلي

سمارة :::
رجع اختفى حيدر من حياتي ..
ارتاحيت باختفاءه و صرت احسن ..

بيوم گعدت الصبح على بچي و نواح ..
گمت من فراشي ركض ليبرى ..
شفت ميادة تبچي ..
اتقربت عليها بسرعة ..
وچ شبيچ شكو ؟
تبچي و تگهد : اسكتي سماره عمتي الاحنينة راحت ..

اني انصدمت و دموعي گامت تهل ..
راساً اجه ابالي حال يوسف هسه ..
شلونه ؟
شديسوي ؟
مشاعره شنو ؟
تمنيتني بعدني ممتزوجه حويدر الاگشر ..

چان بقيت يمه و صرتله الاخت و الصديقة ..
لحد ما يطلع من هالشده الصعبه ..
اويلي عليك يالفاگد عزيز ..
جربتها بـ ابوية ..

نطقتها بصوت : اويلي عليك يوسف شلون حالك هسه ؟
رفعت راسها ميادة عليه ..
اي و الله خيتي كلش تعبان ..
و انوب مرة يونس دگت وياهم الناقصة ..
ليش شسوت هالعوبة ؟
وچ عافتهم تگلهم ما اگدر افوت للبيت ..
العيارة و هي گلاص المي مچانت تجيبه الها ..

يلا يمعودة شعليكم بيها ..
زين هسه تالي منو راح يلزم الفاتحة بالبيت ..
باوعتلي و عيونها تترجى بيه ..
اني هسه جيت اگلچ تعاي وياية عاونيني ..
يمعودة من عيوني خالة ام يوسف عزيزة ..
بمعزت ....
و سكتت ردت اگلها بمعزت يوسف ..
اداركت روحي بسرعة ..
بمعزت امچ الله يرحمهم اثنينهم ..

بالبداية امي مرادت خافت عليه ..
بس بعدين قنعتها انو اني ما اشيل اي ثگل ..
و اذا اشوف روحي تعبانه ارد البيتنه ..

رحنا و الله و قمنا بالواجب اثنينه ..
شفت يوسف يا عيني بالطارمة مالتهم ..
يكسر الخاطر صديقي ..
عين على الصفرية الجوه ايدي اطبخ بيها ..
و عين على حاله الاعوج بلا عزيز وحدة ..

فقد الام شعور صعب ..
قلبي يبچي عليه مو عيوني ..
الله يعينه على وجع القلب الي ديحس بيه ..
ماكو شي بالحياة يوجع بعد هذا الشعور ..
ولا شي بالحياة يكدر يكسر الواحد ..
غير فگد الاحباب ..

بعدها بكم يوم جيراني الي بصف بيتي الاجرته ..
اجتي على بيتنه ..
بعد السلام صبينالها چاي ..
و الله خيه ما اعرف شنو اگلچ ..
اني : احچي خيتي خير ان شاء ؟
جيراني : و الله خيتي مو خير ..
ابو البيت الچنتوا گاعدين بيه يريدكم تطلعون ..

نطلع شنو ؟
اني طالعة من البيت صار الي شهرين تقريباً ..
هو اني من سمعته يعيط گدام بابكم ..
طلعت و گتله هيچ ..
گتله ام بنين عايفه البيت صار كومه ..
عاد جوارينه الگدامكم شهد عليه ..
يعني هو مختفي كل هالفتره بالبيت ؟
اي خيه بس احنه ما ممنبهين ..
لان يجي بالليل هو و اصدقاء و نسوان مو زينات ..
و الفجر يطلعون ..

انداريت على امي ..
شفتي حظي النگس ..
هذا الي گتيلي احسن من الاخو ..
لو باقية على مرار اسعد و لا هالضيم ؟
بعدين شبي اخوية بس مرته راحت صار زين ..
بقيت متربعه و ابچي ..