الاولـــى بحياتـــي

الفصل الخامس

الاولى_بحياتي
الفصل الخامس
#بقلمي_اسراءالجميلي

(( رغمّ بشاعة الحب من طرف واحد
و رغم روح المُحب المُعذبه
و رغم عقلهُ الرافض لهكذا نوع من الحب
الا ان القلب يبقى يسير بنا بأتجاه الحبيب الذي لا يدري و لا يدري انهُ لا يدري ))

حسيت عبالك بنتي و خايف لا يكون مأذيها ..
عادل : و الله و روح جدي مسويتلها شئ ..
اتقربت عليها هستوني دا ابوسها خربت بيدي ..
اصحيها متصحى ..
دفعته من گدامي : دوخر خبل ..
طفرنا كلنا الغرفتي ..
جديتي تعيط من مكانه ..
خطية ما تگدر تگوم رجلها متعينها ابد ..
والچن خير شصار بالبت يالمعزايات ؟

طبينا شفناها امدده على فرشتي لا ايد و لا رجل ..
امي : عادل هي متريگه ؟
لا عمه ما اكلت ..
لعد هاي اكيد عدها انخفاض ساحبين دم منها و بلا اكل ..
روح يو...
اي يمه ادري لبن و ملح ..
عفية بوليدي ..
وصلت للباب رديت انداريت عليهم ..
عدي ميز صغير گبال چربايتي حاط عليه عطوري ..
شلت عطر بيدي ..
عادل ؟
اندار عليه بساع ..
الگف ..
شمرت العطر عليه ..
حطها جوه خشمها حتى شوي تصحى ..

رحت للمطبخ بطريقي طمنت جديتي ..
خليت گلاص بيه نص لبن و ملح كومة مثل ما اسوي الامي من ينخفض ضغطها ..
حمدت ربي و شكرته مليون مره ممسويلها شئ ..
شفته بالهول مليون فكره سودة صارت براسي ..

رحت وديتها الهم ..
هاك خوية شربها ..
لگيته گاعد يم راسها ما يعرف شيسوي عيونه مليانه خوف عليها ..
هي بدت تصحى ..
امي و مرة خالي يفركن برجلها و اديها ..

اخذها و سند راسها شربها ..
بقت مدنگره من خجلها ..
شعرها مغطي كل وجها هالگد ما نازل راسها ..
يوخر بشعرها و يشربها ..
صارت احسن شوية ..
امي : سلامتچ يوم عين الما صلت على النبي و آله ..
مرة خالي : خيه عيارة نسوان يا حسد ..
تعرفين عندچ تحليل اتريگي ..

رفع عادل عيونه عليها خزرها ..
بس و لا چنها شافتها ..
خالتي مچانت تريدها لان رادتله بت اختها آيه ..
هي كل عمرها ١٣ ادري ياخذها يرضعها ..

عليت صوتي و حچيت حتى تبطل امه لغوه ..
يلا عادل گوم اخذ الابنية يروح يصير بيها شئ و نبتلي ..
هااا اي زين ..
بس جديتي شلون ؟
دعدلها بين ما اگول الجده ..
رحت قنعت جديتي دقايق و طلعوا ..
راحت سماره و اخذت حلمي الوردي وياها ..

بدت رحلت عذاب جديده بحياتي ..
فوگ يتمي و امي الارمله التعبانه ..
دفعت عمرها ثمن العشگها ..
اني بگماطي لحمه حمرا جابوا ابوية شهيد ..
ممرود كله من اللغم الدايس عليه باقيه اشلاء صغار ..
بحيث دافنيه بتابوته ..

وعيت اشوفها تلف صدرها بقطعة قماش مستطيله ..
و تخلي مصقوله بحلگها و تلثم وجها ..
تذبنه يم جيرانها ..
تروح للمسطر تنتظر الي يجي يريد عمال ..
تشتغل وياهم علساس هي رجال ..