الاولـــى بحياتـــي

الفصل الثامن

#الاولى_بحياتي
الفصل الثامن
#قصص_اسراءالجميلي

جده انا اعاينلكم كلكم و اداهر وي هاي و ذيچ ..
اعرفني من ساكته آنا دا افكر بسر يخص واحد منكم ..
بقيت فاتح عيني و اباوع عليها بعجب ..

فيا احبيب سرك بنص قلبي مثل ما هو بنص قلبك ..
وليدي سرك يجيب دموم ..
لازم مو يبقه بنصنه لازم ننساه ..
جده اني ناسيها ..
جده تنساها مو كلام تنساها فعل اشوفن بعيوني يلا اصدگنك ..
وخرت عيني منها ..
جده انت خوش وليد لا تضيع زينيتك بشغله ما تصير و ما ترهم ..
جده اليزرع طيب يحصد للجنازة اچتاف ..

صح جده صح ..
ان شاء كل الي تريدو يجرالكم ..
كل الي انريده كلنه مو بس احنه انت ويانه جده ..

بست ايدها و گمت رحت للمطبخ اخذت صينية العشة من امي و تشكرت منها على تعبها ..
ان شاء تريحچ رقية يمه ..
كون تريحك الك انا ما اريد غير راحتكم انت و اخيك ..
الله يخليچ النه يا بعد كل اهلي يمه ..
بستها من راسها و صعدت ..

دگيت الباب برجلي انفتح راساً عبالك واگفه ابراه ..
خليت الصينية بالگاع ..
يلا تعاي تعشي ..
حاضر خوية ..
اتقربت گعدنه ناكل خلصت بسرعة ..
اني اللگمة ابقه الوچ بيها ساعة ..
بس اريد ااخر الموضوع ..
اباوع عليها و متندم ..
استغفر ربي بداخلي : شورطني شجابني على هالهبيه ؟
شگد غبي اني ..
اگعد و استچن و گلها لامك اكون نفسي ..
ليش تكسر بنات العالم ؟

كل هذا الحچي مفاد ..
كملتي اودي الصينية ؟
لا عوفني اني اوديها ..
ماكو داعي اني انزلها ..
اخذت الصينية و امشي على كيف ..
نزلت جوه كلها نايمه ..

خليتها على الكاونتر و گعدت بالمطبخ بالظلمة ..
فتحت باكيتي و ادخن ..
بقيت ادخن لحد ما خلصت اخر چگاره ..
فكره توديني و عشره تجيبني ..

الزمن ويايه غلط غلطة چبيره ..
مو انا الاخير اوياها بس بقت هي الاخيره ..

گامت دموعي تنزل و العبره خنگتني اريد ابچي بعد ..
بچيت على نفسي و على المگرودة الفوگ الكسرت بختها ..
اتعوذت من بليسي و گمت صعدت ..

بس فتحت الباب گامت من فراشها واضح نايمه من صوتها ..
ها عيني جيت ؟
نامي نامي اثنينه تعبانين الايام جايه هواية ..
هااا يعنيي........
اي نامي ماكو شئ اليوم ..

اجيت اتمددت يمها اريد انام ما اگدر ..
احجاره و محطوطة على قلبي ..
كافي يا قلبي ..
اوووف اتخيلني مثل الحمام المكسور جنحه ..
لا يگدر يسافر وي السرب ..
و لا يظل ينتظر البزون التاكله ..
انداريت اباوع عليها غافية ..
شكلها عادي و بسيط كلش سمينه و قصيره ..

حاولت اتقربله او المسه ما گدرت رديت اردود المكاني ..
گعدت ثاني يوم الصبح قبلها ..
اصلاً اني ما نمت بس اتگلب ..
فزت باعتلي گامت على حيلها ..
ها عيني گعدت ؟
اي گاعد من زمان ..
اگوم اسويلك ريوگ ..