الاولـــى بحياتـــي

الفصل الاول

السلام عليكم ورداتي جميلاتي ..
كل عام و انتوا بالف خير ..
ربي يحقق كل ما في بالكم و قلوبكم و يجعله سهلاً يسيرا ..

اتاخرت عليكم هواية لظروف يعلمها ربي و المقربين فرجه القريب لي و لكم ..
و راح نبتدي اليوم بالفصل الاول من (( الاولى بحياتي ))

سيداتي آنساتي ..
عدت اليكم من جديد بقصة جديدة واحداث مشوقة ..
تتحدث عن حب العمر الي هواية مرات تجبرنا الظروف ان نتركه او ما نفصح عنه بس يبقى مزروع بالقلب و ماخذ كل خلية بالعقل ..
قصتنا هالمرة مثل قصصي السابقة حقيقية واقعية وبحكم الامانة القصصية فضفت الها شئ من الاثارة والخيال وحتى ما تشبه احداث لاشخاص تعرفوهم فكان لازم اغير بعض الشئ بيها ..
يمكن سامعين بهيج حب بالافلام والمسلسلات وبقصص سمعناها من اهلنا وكنا نتصور بانها شئ من الخيال ..
لكن هذي القصة راح توضحلكم انو الي سمعتوه ممكن ان يكون حقيقة وممكن ان تمرون بي وان تعيشوه ما دامت مشيئة الله ..
راح تعجبكم بكل تأكيد ..
انتظر تفاعلكم وياية مثل ما عودتوني الي يشجعني اقدم افضل واحسن عن كل ما سبق واتحدى نفسي من اجلكم .

احبكم في الله ❤

#الاولى_بحياتي
الفصل الاول
#بقلمي_اسراءالجميلي

 المراءة لو كان وراها فوج من الرجال ..
من تحب واحد تتلافاهم كلهم و تشوفه بس هو السند ..
هو الاب و الاخ و الابن و الحبيب ..
يكون هو اساس سعادتها و راحتها و ملاذها الآمن ..

دخلنه البيت خالتي اني و ميادة ..
بعد ما وصلنه عروستنا البيت زوجها ..
بزفة حلوة بسيطة مرتبة تزينها نداوي احلى عروس شفتها ..
كلش تونسنه و چنه طالعين احلى اثنين ..
العيون كلها علينه ..

ميادة بت عمتها الـ ندى الي صارت صديقتي كلش هالگد ما التقينه طول هاي الفترة ..
بقراية الفاتحة مال ندى و خطوبتها و مهرها و حنتها و اليوم الاخير ..
الي هو اليوم الي تم بيه زواجها ..
اليوم الي راح تنصهر بيه روحها وي الانسان الي اختاره قلبها ..

مياده : اووووف الف هنيالها شفتيهم شلون واحد يباوع على الثاني ..
اني : اي عيني شفتهم بالعافية عليهم ..
كملي دراستچ و داومي كليه و حتلگين الواحد الي يباوع عليچ هيچ ..
الله كون اليوم گبل باچر الگاه ..
عزه بعينچ شگد عجوله !!!
ههههههه يابه اول و تالي نتزوج شراح تسوينه الشهادة ..
تاخذيها و بعدين تعرفين شنو راح تسويلچ ..
خوش عيني ديلا خلي انقدم للناس تروح تاكل راسنه مرة خالي ..

ندى هي البنت الوحيدة الخالتي فكضت الوكت كله بچي عليها ..
النسوان الكبار حايرات يسكتوها ..
و احنه بدينه نقدم مي و عصير و كيك الاهلنا الباقين ..
اني : وچ كافي مو رجلينه انهرت تعاي نگعد ..
ميادة : اي نگعد و اصيح ابوية يغسل المواعين ..
اني : اوووف يعني اثنين يتزوجون و ١٠٠ يگمزون و ينخبصون ..