الاولـــى بحياتـــي

الفصل الحادي عشر

#الاولى_بحياتي
الفصل الحادي عشر
#قصص_اسراءالجميلي

صار صوت بأذني طرشها ..
بعياط : عادل دخيلك احچي وياية حبيبي ..

بعيطتي اندگت الباب صار الدگ اقوى رحت فتحتها ركض و بعدني اعيط ..
يوسف : شبيچ تعيطين صوتچ ملئ الشارع ؟
الحگني خوية فدوة اخوك تصوب ..
و طلعت للشارع ..
جرني من ايدي : وين بلبسچ هذا ؟

باوعت على نفسي لابسه دشداشة كيمونه و فوگ الركبه ..
رجعت الغرفتي ركض لبست عباتي الاسلامية و طلعت ..
مفكرت حتى ابنتي العفتها جوه ..
طلعت على عماية ما اعرف وين اروح ..

شفت امه جاي عليه ..
عمتي : هاي يمه قلبي يقلي ابني مات مو ؟
لا عمه فدوة لا تگولين هيچ هسه نروح نجيبه ..
هذا الحچي اني مستمره بالبچي و الدگ عليه ..

رفع التلفون ..
عادل شلونك حبيبي ؟
بيك شئ طمني يا نبض قلبي ؟
هلا خيتي اني صاحبه ما بيه شئ احنه باليرموك ..
تصوب بچتفه بس ..
يعني و الله زين ؟
اي خيتي ما بي شئ ..
ايييه رحم الله والديك ..
سديته و وگفت دموعي ..

يوسف : ها بشري ؟
ماكو شئ متصوب بس ؟
منو گلچ ؟
صاحبه شال التلفون ..
لعد خلي اندگ على عماد يجي ويانه ..
اي خوش ..

خابرنه عماد و رحنه بسيارته بعد ما طمنه خالتي ..
يلا زين صوابه خفيف هسه ينطوه اجازة و يبقه يمي شهر ..
يوسف و عماد يضحكون على ضحكتي و فرحتي ..

طبينه للمستشفى اندور عليه ..
الولد شافوا مجموعة شباب واگفين يبچون ..
طلعوا ذولة صحبانه ..
عرفت رجلي راح من ايدي ..
سكتت كلمه محچيت و لا عطت و لا نزلت دمعه وحدة ..

اجاني يوسف عيونه وارمه من البچي و الظاهر ضارب عليها ..
الله يعينچ خوية ..
لك صويحبي خويييه العزيز ..

اني اباوعله بدون حركه ..
عماد اجه گله رجعها للبيت اني اكمل الاوراق ..
اخذنه تكسي هو يمش خشمه الطريق كله و اني اباوع على الشوارع و البيوت و المحلات ..
عبالك كلشي دا اشوفه اول مره بحياتي ..

وداني الاهلي : استقبلوني امي و سناء بعياط و بچي ..
احضنهم و ساكته دخلت لگيت بنين بيد وسن و تبچي ..
اخذتها منها خليتها بحضني ..

لزمت تلفوني بيدي اباوع عليه ..
بعد المن اخابر بيك ؟
منو بعد يدلعني و يدللني ..
على يا ايد انام و اغفى و ارتاح ..

امي : يمه ابچي فدوة لا تظلين كاتمتها ..
رفعت عيني باوعتلها و ساكته ..
سناء : زين اكلي حتى ترضعين بنتچ خطية ؟
قدمتلي ماعون بي مي لحم ..
ما اريد ..
ودوني البيتي ..
امي : منو يوديچ يمه ؟

اريد اروح احضر بيتي اكيد حيطلعوه منه ..
مو يمه لازم يطلعوه من بيته ؟
امي : اي يمه من بيته ..
رحت وداني اكرم وي امي و سناء ..

رحت البيتي گعدت نظفته كله من فوگ ليجوه ..
عطرته و بخرته ..
طر الفجر و اني اشتغل و مقبلت احد يساعدني ..
نزلت فرشة عرسنه من فوگ الكنتور ..
گعدت على چربايتي ارتچيت على تاجها ..
خليت الفرشة بحضني و اتلمس بيها ..
غفيت ما اعرف شلون !