الاولـــى بحياتـــي

الفصل الثالث عشر

#الاولى_بحياتي
الفصل الثالث عشر
#بقلمي_اسراءالجميلي

مو سهله ينسي يوسف ..
اخذ قلبي و عقلي وياه ..
اني هسه بلا روح ..
باوعتله لگيت عيونه مليانه دموع ..
ابتسمت بالگوة ..
شفت انت الرجال تريد تبچي عليه ..
لعد اني شلون الي صرت وياه واحد !
اني الي ما شفت منه غير بس الخير شلون ؟
حقچ صح تحچين كون ربي يعينچ ..
ان شاء الله ..

رجعنه البيت عيالي اخذت بنتي و رجعني عماد علمود دوامي ..
اتفقت وياهم بعد كل اسبوع اروحلهم الخميس ..
لان عمتي وضعها تعبان ..

مرت الايام و الليالي ..
صح التهيت بدوام الكلية بس ابد ما چنت فرحانه بيها ..
چنت اصنع الضحكة و علاقاتي كلها رسمية وي الكل ..
محد چان يدري بيه ارمله و عدي طفل ..

بيوم اجه زوج سناء گلي اكو شركة تريد موظفه على الحسابات ..
طبعاً الشركة مال صديقه ..
هو مقنعه انو اني بعد ما اكمل كلية اطلع للشركة ..
كليتي چانت قريبه هواية عليها ..
كلها كيفت و بالذات ابوية ..

طبعاً بس اسعد بحش من مرته رفض ..
لان هي مكملة دراسة و هو ميقبل تتعيين ..
اسعد : شنو اهليه يعني شكو گوا..... بيها !
انت لو جاي وياية للحكومي چان كتلتهم على نظراتهم و حقارتهم ..

ابوية : بويه رجل اختك شريكه و يعرف اخلاقه يعني مو واحد غريب ..
ارشد : شنو رئيكم اروح اسال على الشركة و بعدها نقرر اداوم لو لا ؟
ابوية : خوش حچي يابه ..

صدگ راح ارشد سال طلعت شركه الها اسمها و معروفه ..
و بيها فوگ ال ٥٠ موظف و موظفه ..
اشتغلت وياهم و هم محد يدري بوضعي ..
غير بس مدير الشركة لان صديق رجل اختي ..

بقيت اروح و اجي بديت اتعلم على الشغل ..
لان چنت حريصة كلش ..
احب اتمييز وين ما اكون ..
معتنيه بنفسي و لبسي ..
شخصيتي مرحه و بنفس الوكت محترمه كلش ..
صارت حياتي روتينيه كلش بس راضيه بيها ..

اكثر المرات الي چنت اروح بيها لعيالي الگه يوسف ..
صار الي نعمه الاخ و الصديق ..
يسمعني و اسمعه يحب بنتي و احب امه ..
كلامنه چان گدام الكل ..
رقمي ما طلبه ابد ..
لاني غيرته بعد وفاة عادل ..
يعني علاقة گرابة و اهل ..
نسيت كل الي گالته رقية بسبب تصرفاته ويايه ..
شغلة وحدة چنت استغربله من احچي على شغلي ..
يضوج كلش و احسه معاجبه بس اني اغلس ..

بنتي بدت تكبر و تحچي بعض الكلمات ..
چانت كلش هادئ و نازكة و صوتها مينسمع ..
محبوبه بشكل تضحك للهوى ..
اني نجحت للثاني و بديت اداوم بيه ..

بيوم طلعت من الشركة دا ارجع للبيت ..
بقيت متانية تجي الكيه دا اصعد بيها ..
لان قريبه على بيتنه متحتاج خط ..

وگفت يمي سيارة مونيكا سودة الفين و هسه ..
بيها رجال يطلع عمره نهاية ال ٣٠ ..
وجه ابيض شوارب عريضة واثق بروحه ..
بيده سبحه فضية تلمع يفر بيها ..
بقه يباوع عليه عيونه تلحگني و اني امشي ..
بقيت امشي طز بيه حاله حال كومة زلم يباوعون ..