الاولـــى بحياتـــي

الفصل الثاني عشر

#الاولى_بحياتي
الفصل الثاني عشر
#قصص_اسراءالجميلي

جده انت الوحيد الطالع علييّ ..
توديني الي للشط و تردني شربة ماي ما شربت ..
ههه يحفظچ النه جده ..
اتنام يمي ..
لا جده اروح بفراشي ..

صعدت الغرفتي بدلت هدومي ..
ذبيت روحي على فراشي بقيت اباوع على السگف ..
الي صار حلم لو حقيقية ؟
اسال روحي و اجاوبها : حقيقة بس صعبه تتصدگ ..

اويلي عليك عادل هستوك ارتاحيت و مشت امورك ..
اوف يا خويه سلامي الروحك الطيبه وين متكون ..
تمنيتك تبقى ويانه اكثر يا اعز من راح و تركني ..
بچيتك حزن و الم و شوگ ما ظنتي بيوم ينتهي ..
غفيت و دموعي بللت مخدتي ..

مرت الايام رجعت الشغلي و بعد ما شفت سماره او بتها لانها دخلت بالعدة ..
الي سمعته من ميادة انها كلش تعبانه ..
و وقتها كله بغرفتها ..
وجه معبس دومه ..
تگلهم هسوني بديت احبها ..
و حبيته اكثر مما حبني ..
يروح من ايدي غفل ..

چنت اخابر اكرم اشوفها اخاف تحتاج شئ ..
كل ليلي و نهاري افكر بألي امعشعشه ابالي ..
تفكيري اختلف بيها ..
چنت افكر بس بحبي الها و شوكت اخلص منه حتى اگدر اعيش ..
هسه دا افكر هي شلون راح تگدر تعيش ؟
دا افكر شلون اگدر اريحها و اسعدها و اكون سند الها ..

بعد مرور تقريباً ٥ شهور على وفاة عادل ..
رجعت من الشغل صبتلي امي ..
اكل و هي ساكته بس تباوع عليه ..

خير يمه اشو اليوم ساكته ؟
زفرة نفس و حچت بطريقة الواحد الكاتم عصبيته ..
ليش طلگت رقية ؟
شذكرچ بيها يوم ؟
دا اسالك جاوبني ؟
انت ما قبلت تحچي من سالناك و الها گتلها اگص السانچ اذت حچيتي ..
و هسه شتغير حتى تريدين تعرفين ؟
شوف يوسف انت ابني قطعة من چبدي ..
و ما متعودة تضم عليه ..
بلعت ريگي و باوعتلها ..
يووم خصم الحچي رقية شكت بيه دا اخونها وي وحدة ..

عادي كل النسوان تشك ؟
يمه تشك بيه اخونها وي مرة اخوية ؟
عزه بعينها شجابك على مرة يونس ؟
هاي شگد چلبه ؟
يمه مو يونس ؟
عادل الله يرحمه ..
ضربت امي على رجلها ..
عزه بعين حظها تتلگاها ابختها ان شاء ..
ليش هو اكو اشرف من سماره ؟
هي هيچ يمه رحنالهم و من رجعنه هيچ گالتلي ..
و اني اصلاً ممرتاح وياها گلت كافي عاد اظلمها وياية ..

بس يمه رقيه ما عافتك ؟
شلون يعني ؟
يمه رقية مخابره سماره و حاچيه وياها كيت و كيت ..
گمت على حيلي ..
و دا اطلع من باب المطبخ ..
كضتني امي من ايدي ..
وك يمه اگف ..

يمه ليش هيچ تسوي ليش الي بسماره مو كافي حتى تزيده ؟
شعدها وياها ؟
هي من حظها المصخم ..
و الله يمه هذا الي وصلني من ميادة بت خالك ..
لهذا هي بعد متريد تروحلهم لعيالها متريد تشوفك ..
حسبي الله عليها ..

انوب بعد متحملت نار وجت بيه ..
فتت اخذت سچينه و ركض على الباب ..
عوفيني اروح اكتلها هاي الكلبة بت الكلب ..
يمه وين تروح ؟
يمه هاي مو مريتك هسه ؟
مو يفصلونه هاي غريبة عليك ؟
گعدت بالگاع عضيت باصبعي قوي ..
اخخخ منچ ارقية ..