الاولـــى بحياتـــي

الفصل الرابع

#الاولى_بحياتي
الفصل الرابع
#قصص_اسراءالجميلي

(( المشكله بالحب الاعمى انو هو اصدق حب ..
لانك تختار حبيبك بقلبك بلا متشوف اي عيوب يحملها ..
لا يعرف يتراجع ..
لا يعرف يكول لا ..
نحب رغم معرفتنا بسؤء وبشاعة اختيارنه ..
بشاعة الغدر والخذلان و الخيانه و الفراگ الاجباري ..
نحب حتى لو يوميه نشرب كاس السم و انام ..
فوگاها نستطعم بي چنه عسل ))

سبحان من خلقه الـ هالولد مدري اني شفته حلو مدري هو حلو صدگ ..
باوعلي بنظرة اعجاب لا مو اعجاب بس شنو چانت ما ادري !
هواية ولد ينعجبون بيه لان شكلي جذاب بسبب لون شعري الغريب و جرت عيوني و نزاكة ملامحي ..
بس نظرة هالولد غريبه كلش ..

نزلت عيني من مستحاتي ..
دخل وراية عادل ..
عرفنه على بعض طلع ابن عمته الچبيره و اخوه بالرضاعة و كاتم اسراره ..
سلمت عليه ..
حچه ويايه كلام عادي بس صوته يرجف استغربت بس ما اهتميت ابد ..
دخلونه جوه للصالة من باب خشب قديمه ..

جديته متوسطه الصالة بجودليه قديمه ..
گدامها صينية بيها قوري الچاي و الاستكانات بطاسة مي و علبة الجبن التارستها شكر ..
فوطة سودة لافه بيها راسها و چرغد نازل على گصتها ..
دگات على حنجها زايدتها جمال ..
وجه اسطواني بيه كل نظرات الغزل القديم ..
باوعتلي بعيونها الچبيره السودة و تجاعيد الزمن الحايطتها ..
احس شايفتها قبل ..
جمالها رغم كبر عمرها يخلي الواحد يصعب عليه يشيل عينه منها ..

هاي يمه أعديل هاي مريتك ؟
تقرب عليها باس ايدها و راسها ..
اي جده هاي ضلعي ..
ها جده چنك عاشگ مثل عمتك الحبت و نستنه ؟

حچت مريه على يسرتي واگفه يم الباب ..
شوكت تنسون هالموضوع يوم ؟
ما ينسي يمه ..
تحچي و تأشر على قلبها ..
رغم السنين و حسرت ابوچ و موته بلاياچ ما تنسي ..
صار عدي فضول اعرف قصة هاي العمه الحلوة ..
رغم ايدها چانت عوجة يعني بيها عوق شوية ..

طبعاً بوست ايد بيبيته لزمت راسي بيدها المليانه تجاعيد و باسته ..
جرتني يمها ..
تعاي جده خلي املي عيني منچ ..
عادل گعد بصفي ..
ظلت تتفحصني بعيونها الثابقه من غير و لا كلمه ..
بعدها بدت تعرفني على عائلتها الصغيره الباقية ..
بتها الارمله خطية يمكن ايدها معوقه و ولدها الاثنين ..
الي چان واحد منهم الصغير يوسف الي فتحنه الباب ..

دخل علينه شايل عصير بيده قدمنياها ..
من اجه گبالي عرفت ليش من شفت بيبيته كأنوا شايفتها ..
السبب يوسف نسخه منها على ولد و شوارب و لحيه ..
ضايفه جمال على جماله ..

اخذت العصير منه و استغفرت ربي لاني مره متزوجه ..
و اعرف حدود الله كلش زين ..
وخرت عيني عنه ..

اخذت كمعه من العصير حسيتني دايخة ..
انتبه عليه عادل بديره وحدة گبالي ..
يوسف صار وراه مباشره ..
شبيچ حبيبه ؟
گوم جده مريتك وجها مصوفر ..
هاي ما تحملت سحب الدم غسله الها ..