الاولـــى بحياتـــي

الفصل الثامن عشر

#الاولى_بحياتي
الفصل الثامن عشر
#قصص_اسراءالجميلي

صارت حراره و دم بهدومنه و بدينه ..
عرفت السچينه دخلت بواحد بينه ..

نزلت راسي بخوف بيناتنه و بعدت نفسي عنه ..
شفت السچينه داخله ابطني ..
فهمت من حرارة صوابي محسيت ..
من شفت الدم مغرگني دخت و وگعت ..

فتحت عيوني على الم فضيع ..
اباوع بالمستشفى ..
بقيت اعيط من الالم گلبتها ..

المهم طلع الجرح سطحي خيطوه ..
رجعوني هو و امي للبيت ..
عافني بالبيت و راح ..
اجوي اخوتي رادوا يهدون على اهله ..
ارشد : انتوا كلشي متعرفون بالعشاير ..

اذا هدينه عليهم هسه و همه متبرين منه ..
تصير العيله علينه ..
اني : ترى اني الي جريت السچينه و ردت اضربه بيها ..
مو دا ادافع عنه هو فلس ميسوى عندي ..

اسعد : اي انتِ مدافعين ادري بيچ ..
يحچي باستهزاء ويايه ..
بقيت الوب من الالم ..
گلت الـ امي گالتلي عادي لحم و انشگ ..
انطوني ڤاليوم نمت ..
گعدت لعبانه نفسي و بس اتقيئ ..
ما بقه شئ بمعدتي ما طلع ..

مشيت ظهري محدب وصلتلهم للهول ..
شفت امي و اسعد ..
گمزت امي عليه ركض ..
فدوة اروحلك خوية الحگلي بعد ما اتحمل الالم ..
اسعد يحچي وياية بعنتره :
مو وحدچ ضربتي بسچينه ؟
هسه وحدچ روحي للمستشفى ..

وك اسعد راح اموت و الله ..
وخطيتي تظل برگبتگ ..
استغفرلله يا رب ..
گام وي امي لفوني بعباتي و رحنه ..
ودوني للطوارئ ضربوني ابره مسكنه ..

بقيت يومين كلشي ما يبقه بمعدتي ..
و الالم مو طبيعي ..
جيرانه گالت الـ امي ودوها استشاري باطنية ..

صدگ رحنه الدكتور باطنية سونار و اشعات ..
رجح انو اكو ثقب بالامعاء ..
بس لازم عملية استكشافية لان الامعاء طويلة ..
حتى يحددون وين الثقب و يگصوها ..

واحد من جوارينه بلغ حيدر على حالي ..
گايلها : ترى مرتك مواته لو تلحگ عليها لو لا ..
اجانه للبيت يبچي ..
يتوسل بأخوتي : هاي مرتي لازم اني اوديها ..
و اني اصرف عليها ..

خليها تصير زينه و بعدين هي تقرر ..
اني عندي صديقي خوش دكتور بمستشفى............ .
اشرتلهم لاخوتي براسي ارضوا ..
هو چان السبب بالي صار الي ..
على الاقل يتحمل المسؤولية وياهم شوية ..

اخذوني للمستشفى الاهلية مال صديقه ..
المهم دخلوني لعملية استكشافية طولت ٤ ساعات و نص ..
طلع عدي ثقبين بالامعاء و واحد بالمبيض ..
عالجوها بس المشكلة جسمي متحمل دخلت بغيبوبه ..

بعد ٣ ايام صحيت لگيته هو و امي يمي ..
وجهم مورم و عيونهم صغرانه من كثر النوح عليه ..
لگيت خمس صوندات بجسمي ..
شربة مي ميصير ينطوني ..
انطوني طلع من فتحت الصوندة ..