#لمة_بنات
●من كتابات زهراء العراقية ●
4
نور
قررت اتكلم مع اسراء نوقف هاي المهزلة ولو هي هليام قل شغفها بتيم ؛ مو وقتها اروح الها وما عرفت شصار مع ورد خليها على باجر ..
...........
أسراء :- طلعت روحي والكأبة فول كل ما احجي مع امي اتعيرني واتوب اتقارني بمروة الي كنت اني اشرح الها وتاخذ مني المراجع والملازم حتى استنساخ كنت استنسخ الها بسبب مصروفها القليل؛ هي وصلت للتريده واني لا ؛ هذا الشي كان حاز بنفسي ومحسسني بالنقص طلعت من البيت كلت لأمي اروح لنورة . بس بالحقيقه من وصلت لباب نورة ما دخلت كلت اروح اشتري أيس كريم هاي تحبه هليام هي وكفت وياي وكفة رجال عكس مروة الي الي سؤالها قل وحتى جايتها النا قلت حقها تتكبر واخيرا راح اصير احسن مني بشي فاكيد شافت نفسها !
طلعت على الشارع العام كنت امشي وسرحانه ...شفت من بعيد ابو عضلات على كولة نورة وابتسمت من اذكرت الرهان . لدخلت لمحل المرطبات واشتريت حجم عائلي
وطلعت اتعرفون ترة مو مبالغه البنت الي تمشي وحدها لازم تسمع كلام من اي شاب .
منطقتنا احنه بيها عادي ناس تلبس عبي وعادي مثلنا حجاب وبس وحتى عدنا جيرنا بتهم عمرها 15 ما تتحجب عادي كلمن واعتقاده وتربيتة . كنت لابسة ثوب وعليه يلك كابوي وشال سمائي ...
باوعت ما شفت ابو عضلات كان واكف امام سوبر ماركت امام محل المرطبات .. وما اعرف يمكن اولاد عمي واحد منهم وياه بس داخل المحل وتيم ينتظرة
دا اتمشة بس كلت ما ارجع لفرعنا اروح من طريق الساحه بيها حديقة حلوة حاطه ايد بجيب يلكي والثانيه لازمه بيها الايس كريم
فتت من يم بيت مروة صفنت على بابهم وكلت :- والله زمان افوت من بابكم وما ادخل !
اهنا حسيت خلفي واحد يمشي مدري ليش ظنيته تيم كلت يمكن شافني واجه يوصلني .
اباوع كان شاب مبين مراهق من عمري شكله مألوف اكيد من المنطقة ..
حسيته صار يمشي ابصفي اني كلت اوف ووكفت كلت خل يتعداني وامشي خلفه افضل . اشو هذا هم وكف همزين كنت مطلعة ايدي من جيبي
همس :- جنج العافية ما تاخذين رقمي *****
خزرته بنظرتي وعفته وهو ضل يتلوك وراية
:-عفيه بس اخذي رقمي
واني مغلسة عنه وسرعت بمشيتي ..
بس مضايقه يعني لو شافني احد شيكول عليه هذا لازك اني مو طبعي اكعد ارزل بالشارع وخوافة حيل . حسيت شخص ثاني صار بصفي
وكال :- السلام عليكم
الصوت غير مألوف باوعت وجان اشوف تيم المعضل واكف يمي طلعت عصفورة يمة
:-مضايقة من شي
:- اشلونك تيم ا اقصد وعليكم السلام
:- اكو شي خوية
خاف الولد من كلي تيم خوية وجان يخزرة بنظرات قاتلة خله ومشى الولد ..
باوع الي وكال :- حتى شبابه قليلين مرؤة عفة بلد مابي راحه
كالها بضيق وهو يباوع للطريق واديه خلف ضهره
:- شكرا تيم
:- على شنو الشكر انت بت عمي ؛ بس المفروض ما تمشين وحدج بهيج طريق مليان كلاب مو شباب هسه هذا يقبل واحد يتقرب من اخته .
ما كلت شي وسكتت مااعرف شكول عنده حق
دخلنا للفرع
وكفت يم الباب وكتله
:- شكرا الك اني كل مرة اطلع مع عبود بس هذا بالشارع يلعب مااعرف وين ..
وكف خلفي ووجه على الشارع وكال :- يلا صكي الباب
ضحكت من كال صكي مهما كان عراقي يبقى قضى عمرة بالخليج . دكيت الجرس
انفتح الباب انويره ضلت اتباوع النا اثنينا وكفت خلف الباب ودخلنا
اني :- السلام عليكم
نورة :- وعليكم السلام
وكانت اتباوع النا دخل تيم وعافنه
