#لمة_بنات
الفصل 2 و 3 و 4
ايمان :--
صحيت لكيت نفسي بالغرفة وويه اختي كاعده ام زهراء وتبجي
كمت مفزوعه ووكفت على حيلي وهي هم وكفت سندتني
" وين بتي ...ورد وين
بالقوة طلع صوتها مخنوك بالعبرات
"وين بتي ...
"اخذوها اخذوها اخوتها
ضربت ايدي على صدري وطلعت ادور على بتي بهذا القصر الملعون
.........................................
ورد
كنت جالسه وحدي بمكان اظلم ...عيوني مربطه احاول افتحها ..انفتحن واخيرا ...لكيت نفسي بغرفة ..كنت اباوع للسكف التفتت على كيفي ..شفت برادي ..لونهم مو غريب عليه ...ذني ذني اني اشتريتهم ...اي اني اختاريتهم !!!!
باوعت للمنضده ...هاي جبته ويه خالد قبل يومين بس ... هاي خزانتي .. هاي صورة خطوبتنا على الميز ...هاي غرفتي ..اي هي ...كدرت اميزها .. اكوا واحد كاعد على كرسي ومنطي الي ضهره ..
هذا منو ؟؟؟
معقول خالد ...خالد خالد ...تذكرت
رجعت بيه الذاكرة . . ولفت بيه من قبلني خالد .وحملني وحطني على السرير ..
رجعت غمضت عيني متآلمه و دموعي طلعت حارة كوت خدي .
" ا اريد اروح منا
طل طلكني
هذا الي كدرت اكوله مطلبي ...هو الخلاص منه
التفتت عليه من عرفني صحيت
نزيت من شفته نعمان اخوية
اتقرب عليه ابسرعه
اني حطيت اديه على وجهي احمي نفسي منه
" ورد ....
كنت ابجي
"والله ما سويت شي ...والله اني اخاف ربي ما اسويها
"ادري ...
رفعت نضري عليه هو الاخر هم كان مدمع ..
ورة اشويه صار دك قوي على بابنا متت خوف
اخويه عثمان هاد عليه ...بس اني بحمى نعمان .
.................
اسراء
شفت بعيوني اشلون ذياب واكف يتفرج وبس نعمان الي كدر يطلع ورد ويحميها من اديهم
واكثر شي مستفز سواه ذياب الي كنت اراقب تصرفاته ..راح يواسي اخوه !!!
كان ودي اروح افترس خالد واقتله وهذا راح يريد. يواسيه
بالقوة هدات الاوضاع هدوا عثمان عمي ابو تيم وابو نعمان وكالوا نصبر للصبح ...
جبرونا انروح لغرفنا ...بس اشلون نرتاح ويزورنا النوم بعد الي صار لورد ...
اعتقد مو بس دمعتي بعيني كلنا كنت اشوف زهراء بس دموعها تتكلم ... حتى اختي شهد القاسية كانت تبكي بشده عليها
عرفت بهذا اليوم احنه مو بس لمة بنات عم ..احنه روح وحده نبكي ونفرح ونتآلم سوة كانت ليلة مفجعه جدا بعد ما اتهام خالد وطعنه لشرف ورد
دخل ذياب
كنت على السرير منطرحه
اسراء نمتي ؟؟؟
لا
اووف امنين طلعت هاي السالفه ... هاي ورد اشلون كانت
كمت من مكاني
"شنو قصدك .....ترة ورد كلشي ما مسويه
"شو دسكتي ....طلعت مو بنت
صحت
"اااش و لا كلمه
"لا اصيحين بوجهي
واتعاركنا بيومها نام برة
..................
زهراء
ثاني يوم الصبح
صاحونا على الريوك ...
نزلت اني وخواتي وامي
وخاله ايمان كوة تمشي وكالت اريد اشوف بتي .
امي كالت الها بس اكلي لكمه البنيه تعبانه خليها ترتاح
صادفتنا ام تيم
امي صبحت عليها . وخاله ايمان بس اتباوع للأرض
"صباح الخير ام تيم
باوعت لأمي بسخرية
"يا خير هذا .. بنات الشوارع ما خلت النا خير
خالتي راحت من يمنا ابسرعه ونزلت
وامي ما ردت عليها
سكتت !!!!
ما انسى نظرات الملامه الي اتوجهت لخالتي ايمان ولا انحناء ضهرها الي وضح ...
.
ب 9 كعد عثمان طالعه روحه وبس يصيح ..
اني سمعت من زينب راح ياخذون ورد لطبيبة خاصة العصر
...................
نورة
ما كنت اعرف شنو الي جاي يصير
غير الهدوء الي عم بس اسمع همسات كلام ام تيم وبتها على ورد ... غيرها محد يجيب طاريها كأنها نفت وانخاف نسأل عليها ابد ما شفناها احنه خواتها
بس ما انسى منظر امي وهي ساكته
...
دخلت عليها كانت وحدها بالغرفة
رحت الها مسرعه وذبيت نفسي بحظنها كالعاده
.بس هالمرة ما حاوطتني بأديها ما كالت بتي المخربطه اجت ..! ما باستني من خدي .. باوعت لأديها بمكانهم مسيبات كأنهم خمالات واعيونها ذبلانه ...
دخل بابا ..
حتى ما انتبه لوجودي
" شفتي ..شفتي تربيتج ...شفتي لوين وصصلنا
ضل يلوم بيها .. وهي بس دمعاتها ضهرت ..
ما اعرف ليش الكل متهم امي ...ليش بس هي المسؤؤلة عنه ؟؟؟؟؟؟
