#لمة_بنات
●من كتابات زهراء العراقية ●
8
زينب
دخلت لغرفتي مخنوكة ريتني ما سمعت الي سمعته حتى لو كذب هو أذاني مستحيل نعمان يسويها اني واثقة بيه لكن ليش من اجيت من بيت اهلي مكان ملهوف علية اوف اصلا هو كان راجع من المستشفى تعبان وحال الويل حاله لا تخلين هاي السوسة تأثر عليج .. بس ليش بكت بحرقة !! يااارب احتاريت ريح بالي و اعطني الحكمة ياارب ..
خالتي ام زهراء عزمت امي و احنه بيت خالتي ايمان وام تيم على العشا بمناسبة استرجاع عافية بتها والي عرفته يردون يذبحون طلي ويشون اللحم ولان نعمان وعثمان خبيرين همه الي راح يشون . بس خالتي طلبت اروح من هسة قبل العشة انضف الها الباجة . مسحت ادموعي ورحت ويه ورد سحولتها كوة زهراء وصتني اجيبها هي قافله ماتريد اتقابل خالد
وهاي زينب هم بلوة كوة قنعتها تجي ويانا اوف منهن مجاريح العشق اواسي واشاقة وياهن واني مذبوحة من داخل اريد من يواسيني ..
ردنا نطلع من البيت صادفنا نعمان
:- هاا وين
جاوبته بثقل غصبا عني :-مو كتلك لبيت خالة نشتغل وانساعدهم
:- ها يلا روحن
باوع الي وكال :- امسحي هذا المكياج
صفنت بوجه
:- يا مكياج هذا هو اني صايره مكياج
فعلا ماكنت حاطة شي بس اعصابي تلفانه وخدودي موردات من العصبيه !!!
:- هاي الحمرة الي على خدودج
:- ما مخلية شي يلا وخر دنفوت
باوعلي بعيونه الاحبهن معاتب اسلوبي الجاف بنظراته وراح ااووف ليش الله خلقك هيج وسيم و تدخل القلب حتى اتعذب اني بيك !!!!
رحنا لبيت خالة واني بالي يم نعمان اووف هسه اكيد هاي تلكته ..
اسراء مكانت تشتغل كاعده بالهول هي ومروة لكيناهم جايين همه وخواتي هم رشا و اية يشتغلن حلويات و مقبلات زهراء تموت عليهم بس مو هلكد بيهم اية نادرة سوت البيتنجانية و التفاحية وطحينة حمص لكيت امي دا تطحن بالحمص المسلوق بالخلاط وخالتي ام زهراء اسوي بكسور الذبيحه .
اجت ببالي فكرة اروح هسة اشوف نعمان
كمت طلعت .. دخلت لبيتي شفت محد بالهول صعدت لغرفتي .. واني قلبي يلعب . كوة ايدي فتحت الباب .. غمضت اعيوني بأرتياح من شفتها فارغة نزلت ابسرعة ... اريد ارجع لبيت خالتي .. وجان اسمع صوت من المطبخ .. خفق قلبي هذا صوت نعمان .ردت ادخل شفتة جالس على الطاولة و ناهد دا تسكبلة شاي واتباوع اله وتبتسم بس هو بس ضهرة عليه .
مادخلت وهمه ما شافوني صفحت على الحايط ..
ناهد:- اتريد بعد سكر ..
نعمان :- ما يحتاج .
خاط الاستكان وكال وهو معصب مبين
:- هسة شنو رايدة ؟؟؟
:- شنو شنو رايدة نعمان لا تخبلني
اني اهنا ساحت روحي نعمان ليش يحجي وياها هيج من غير تكلفة !!!!!!!!!!!
نعمان :- يا ناهد الي صار صار بعد لا اتلحين رجاءا اني غلطت اعرف لكن ماتخرب حياتي غلطة بعدين انت ...
قاطعته هي وكالت :- اني شنو ؟؟؟؟؟ هاااا لك اني حبيتك ...
اجيت اوكع من طولي ويغمى علية حسيت نفسي بعد ما اكدر اطلعه
حطيت ايدي على حلكي اكتم بصرخاتي وطلعت لبرة اشتم هوى واني اذكر كل لحظة عشتها مع حب عمري من طفولتنا معروفين اني اله وهو الي حرم عليه اي عريس يتقدم ماصرت اشوف رجل غيرة وعيت عليه ووعى عليه ما صورت بيوم يصير لوحده غيري اتلمسة وتعرف طباعه غيري كنت اظن هو مايشوف غيري بعد ؟؟؟!!!!
طلعت من البيت رجعت لهناك شافتني زينب ..
زينب:- زوز وين كنتي امي اتريدج اكول خل تجي تنظف الراس ويه خالتها
هزيت راسي ورحت ..
انضف واشعوط بالباجة من غير شعور بالمحيط واني قلبي المشعوط ...
