ثم إن قلبي بك يمتلئ عشقا وبقربك يزهر

مع كل غرورك وكبريائك ، تضعف امامي وهدا مايدفعني لتخلي عن العالم لأجلك .

في هديكا اللحظة حست غزل بضعف مالك ، بسبب حبه ليها ، مادرتش اي اهمية لتهديد مالك بنتهاء زواجهم ، كان كل همها شن بيصير في حبيبها وزوجها بعد مايعرف علاش درقت عليه قصة حمله ، ومالك قال هكي لأنه كان موجوع ، غزل بنسبة ليه كل شي حلو في حياته ، هيا الي طلعته من الحالة الي كان فيها ( مالك قبل مايلتقي بغزل كان كاره روحه وعيلته كلهم ماعمره دار حساب لمحبة حظ في حياته ، وكان يبي يموت بأي طريقة فكان يشترك في عمليات تهريب سلاح ومخدرات لكن عمره ماتعطى ، وكان ديما يشترك في سبقات والرالي ، يعني متع واحد عايش من قلت الموت ، وغزل هيا الي طلعاته من الحالة هادي ، وكانت ديما تدعم فيه وتشجع فيه باش يتغير ، وفعلا صار وتغير ) فاهو قلبه انكسر .

نرجعو لروايتنا ، حطها مالك في حوش امليها ونزل قعد يهدرز مع الولاد العيلة ، وغزل خشت داخل واقفة علي مراية ادير في ميك اب وتفكر كيف بتقوله .
اصالة : قلتلك مرت خالي خفي روحك باش تقعمزي مع الناس .
غزل كان شاردة .
ضربتها اصالة علي كتفها : هيييي في مني انكلم .
غزل : ايييي ايدك صغيرة الزفت لكن مفعولها كبير .
اصالة : هاها ها تضحك تعرفي .
غزل : اممممم .
اصالة : وين كنتي سارحة .
غزل بتنهيدة : ولا شي .
اصالة انتبهت انه في شي : خيرك غزولتي في شي .
غزل : لا مافي شي ، شن كنتي تبي مني ؟؟
اصالة : قالتلك مرة خالي تعالي هدرزي علي الناس .
غزل : اهو جاية كملت .

مشت غزل تهدرز مع الناس ، وتعشو ورقدو .

تاني يوم >>>
نجاح جت تنوض في غزل : اشيه اشيه خميرة النوم بدت تنوض بكري البين فرنسا غيرتك .
غزل : مارقدتش اصلا .
نجاح : تو مايوصل فيك المغرب لين تبدي طايبة .
غزل : اصلا قبل المغرب بنكون في حوشي .
نجاح : علاش العفو .
غزل : مالك يبيني .
نجاح : مالا بري لراجلك .

ناضو كلهم ، فطرو وضمو الحوش ، ولمت غزل حوايجها ، وركبت سيارتها ، وهيا في طريقها للحوش .

عند تسنيم >>>
مشت لحوش خوها مراد فتحتلها مرته .
جنان ( مرة مراد ) : اهلين تفضلي .
تسنيم : زيد فضلك ، وين مراد .
جنان : كيف روح من العمل تغدا ورقد .
تسنيم : باهي نوضيهولي نبيه .
مشت جنان تنوض في مراد .
جنان : مراد ، مرااااد .
مراد : خير بلاك ، مش قلت ماتجيش جهتي .
جنان : شن تسحابني ميتة عليك ، تسنيم جت وقالت تبيك .
دفها مراد وناض مشي لتسنيم .
مراد : خيرك ماتصلتيش قبل ماتجي .
تسنيم : اتصلت ، لكن انتا مرديتش .
مراد : كيف حالك .
تسنيم : الحمد لله ، كيف حالك انتا .
مراد قالها وهوا يشبح لجنان وهيا ماشية جهت المطبخ : من ربي بخير .
تسنيم : نبي نطلب منك طلب .
مراد : تاخدني عيوني .
جت جنان حطت سفرة العصير .
مراد : تقدري تمشي .
جنان مشت وهيا دمعتها علي خدها .
تسنيم : خيرك هكي معاها .
مراد : مادخلكش .
تسنيم : مش دنبها هيا الي صار .
مراد : سلم اوخيتي كملي الموضوع الي تبيني فيه .
تسنيم : نبيك تعزم مالك ومرته عندك .
مراد : تسنيم ( وهيا قصت عليه قبل مايكمل ) .
تسنيم : نعرف شن يتقولي لكن اني نبي نشبحها في شني خير مني باش حبها هيا ، شن المميز فيها باش اختارها هيا .
مراد : يتتعبي هكي راه .
تسنيم : لا بنرتاح ، باللهي متردنيش .
مراد : يصير خير .