قلوب_ حائره

البارت التاسع

نواره: اي كول
بكر: اني...... اني..... اني معجب بيج
نواره: وجهي كام ينطي الوان من الخجل رغم اني مو كلش تفاجأت جنت متوقعه من نضراته اليه  بس خجلت منه وخصوصا هو عيونه ماشالهن عني كمت ماعرف شحجي بعدين اجه نزار ع بالي صح بكر عاجبني بس نزار مستحيل يوافق ع زواجنه وخصوصا بعد كل الي عرفته.
بكر: اشو ساكته فدوه احجي لاتضلين ساكته
نواره: اني اسفه بس مافكر لا بلحب ولا بلزواج اعذرني
بكر: صدكيني ماخليج تحتاجين شي الي تؤمرين بي انفذه الج وبنتج نربيهه ويه نور وتصير اخت الهه
نواره: مكدرت احجي اكثر من هيج اختنكت حيل اذا ابقه شويه دموعي يخونني وينزلن واني ماريد ابجي كدامه كتله اني صار لازم اروح تأخرت
بكر: ابقي شويه بس خلي نتفاهم
نواره: ماكدر خليت ونزلت
بكر: صحت وراهه اوكفي خلي اوصلج
نواره: ماكو داعي اني أجر سياره ورجع للمدرسه
بكر: حيل ضجت وتعصبت كتلهه بصوت صعدي لاتكفريني منا العالم
نواره: عزه من سمعت صوته حيل خفت صعدت بسرعه وشغل السياره وطلع بسرعه الطريق كله ساكتين محجينه بس النفس مالته يكفي يتنفس بصوت عالي ومبين علي الضوجه بس مسويت أي ردة فعل وصلنه يم المدرسه نزلت بسرعه بدون ماباوعله وطبيت جوه بلأداره كعدت بس كوه اخذ نفسي وماطايقه أي شي وره شويه طلعنه شفته واكف ينتظر بنته دنكت ورحت للخط رجعت للبيت.
بكر: مكدرت اسيطر ع نفسي صحت بيهه بصوت هي كبل خافت وصعدت عصبتني تريد تروح وحدهه ضلت الطريق كله ساكته تمنيتهه تحجي كلمه بس ماحجت وبس وصلنه نزلت بدون حتى متباوعلي وضليت واكف انتظر نور وره شويه طلعت هي دنكت ومشت وهم ماباوعتلي عيوني صارن بكصتي من الضوجه والخلقج يانواره لو تموتين متصيرين لغيري انت مالتي لوحدي بعدين اخذت نور ورجعنه للبيت صاحوني ع الغده كتلهم ماشتهي ضليت امدد بفراشي واتكلب تخيلتهه تنام بحضني والعب بشعرهه تخيلت ضحكتهه اوووف يانواره شلعتي كلبي خليت ونمت.
نواره: رجعت للبيت تلكاني نزار جان يمنه ويريد يروح هلو حبيبي وين رايح بعد وكت
نزار: لا عندي دوام اريد اروح وقنوده عوفيهه دا تلعب ويه حماده بلبيت من اجي من الدوام اجيبهه الج
نواره: ماشي حبيبي مو مشكله. نزار انت شونك؟؟ من سألته حبيت اطمئن علي بعد الي حجالياه بكر
نزار: ابتسمت لايضل بالج اني زين يله مع السلامه
نواره: الله وياك اوووف ربي يريح كلبك ياابن امي وابوي. طبيت لكيت امي ونهال دا يحضرن بلغده سلمت عليهن
نهال. ام نزار: وعليكم السلام
نهال: يله حبي بدلي وتعالي تغدي
ام نزار: شونج يمه خو مايوجعج شي
نواره: لا مابيه شي بس تعبانه اريد انام انتو تغدو
ام نزار: ليش يمه صايره متاكلين زين
نواره: ماشتهي ماما تعبانه فدوه. صعدت بدلت ومددت ع الجربايه اريد انام ومافكر بشي بس ماكدر عدت كلشي صار وياي اليوم اني ليش ضايجه ومخنوكه ليش كلبي يوجعني كافي ماريد افكر خليت المخده ع راسي ونمت.
بكر: كعدت المغرب صليت ودا العب بتلفوني اجت امي
ام بكر: يمه خلي اخطبلك نواره اذا عاجبتك
بكر: يمه بعد وكت لهذا الحجي
ام بكر: ليش يمه شايف عليهه شي البنيه
بكر: لا يمه خو ماكو شي بس لازم اخذ موافقتهه هي ياله اخطب بكلبي كلت السالفه حيل معقده لا هي موافقه واخوهه هم مستحيل يوافق بس والله ماعوفج
ام بكر: الله كريم يمه ماتلكه احسن منك
بكر: يمه صبي عشه كتلني الجوع ومامتغدي. لعد نور وين
ام بكر: دا تلعب بغرفتي عوفهه
بكر: تعشيت وطلعت يم جماعتي بلكهوه
نواره: كعدت من النوم صليت ودا اساعد نهال بلعشه
نهال: نواره اشو مرديتي خبر
نواره: ع شنو
نهال: ع سالفة اخويه
نواره: الصراحه جنت ناسيه الموضوع وهي ذكرتني كتلهه نهال لاتزعلين مني بس اني ماريد اتزوج
نهال: لاتكوليهه فدوه ولج والله يحبج ورايدج يموت اذا رفضتي ارجعي فكري بعد احنه مامستعجلين
نواره: بس نهال
نهال: بدون بس انتي فكري وبس
نواره: ابتسمت الهه كتلهه الله كريم. كملنه العشه وتعشينه وضلينه كاعدين نسولف كلنه. اكلج نهال اشو هيثم ماكو
نهال: راح يجيب حلويات مشتهيهن
نواره: هاا خوش اي والله مال حلويات هسه. اشو نزار ماجاب قنوده لسه 
ام نزار: هسه يجيبهه تلكيهه ملتهيه تلعب
نواره: خلي اخابره شتاقيتلهه بنوتي. هاا نزار وين قنوده تأخرتوا
نزار: شويه واجيبهه تعاركت ويه رنا ومكدرت اجيبهه العصر
نواره: خير اجي اخذهه اني
نزار: لا اني جاي واصلا ابات يمكم روحي طالعه
نواره: هلا بيك حبيبي تعال
ابو نزار: هاا شكو شصاير
نواره: متعاركين هو ورنا ومبين ضايج يكول ابات هنا
ام نزار: شنو هذه ماتمل من العراكات والمشاكل
نواره: شمدريج يمه جوز الصوج من ابنج دا نحجي جان يطب هيثم
هيثم: جبتلكم حلويات الا اشرررررد من حلويات لبنان اكيد اغلبيتكم ماكلين منهه هههههه
نواره: اييييي اجت بوكتهه انطيني
هيثم: شبيج جوعيه
نواره: عابت انطيني قطعه راح اموت كمت اسبل
هيثم: اعووووع كبر لعبتي نفسي
ام نزار. ابو نزار ونهال: ههههههههه
ام نزار: واني يمه مافكرت بيه
هيثم: طبعا يمه جبتلج حلويات مال دايت شلون انساج بعد كلبي تروحلك نواره فدوه هههههه
نواره ونهال و ابونزار: هههههههه
ام نزار: لا ولك اسم الله ع بنيتي
نواره: يمه اروحلج فدوه شعدنه غيرج شويه واجه نزار
نزار: السلام عليكم
كلهم: وعليكم السلام
قنوده: ماما ماما
نواره: يمه بنوتي اشتاقيتلج حضنتهه حيل وهي هم حاضنتني
هيثم: شنو اجيت ع الريحه
نزار: اي شتميت ريحة حلويات شو نطيني خلي نضوك
هيثم: مو طيب مايفيدك
نزار: اي حتلو مو طيب انطيني لوتي
هيثم: هههههه هاك بلعافيه
ام نزار: يمه شبيهه مرتك
نزار: مابيهه شي بس وحده من جوارينه كايلتهه ع العركه وموصلتلهه حجي غلط وتعاركت وياي وتكلي تريد تزوج عليه عفتهه واجيت
ام نزار: يااااا وهي شجاهه كلشي اتصدك لاتضوج يمه
نزار: عادي يمه متعود عليهه
نواره: ضلينه نسولف ونشاقه وبعدين صعدت لغرفتي نومت قنوده وضليت ممدده بلفراش والعب بتلفون طلعت صفحة بكر وضليت اكلب بيهه واباوع لصوره وابتسم معقوله يحبني زين يجوز يريد يتسلى يكلك ارمله واتسلى بيهه اووووف زين ليش ماسوي صفحه جديده واراسله منهه واسولف وياه واشوف ينطي مجال وبنفس الوقت اتعرف عليه اكثر بس بدون ميعرف اني منو اي احسن فكره دا احجي ويه نفسي جان يدك التلفون رقم غريب ماجاوبت الوقت متأخر ومادري ليش معجبني اجاوب رغم اني اجاوب ارقام غريبه عادي ضل يدك اكثر من مره وماجاوبت شويه ووصلتني رساله مكتوب بيهه اني نادر جاوبي حبابه. هذا شيريد بهذا الوقت ومنين جاب رقمي اكيد من نهال يرالهه فهم اووووف اني اعلمهه غير تاخذ اذني ياله تنطي اله رجع اتصل دك شويه وجاوبت الوووو
نادر: شونج نواره
نواره: الحمدلله انت شونك
نادر: اذا انتي بخير اني اصير بخير
نواره: اممممم الحمدلله ع كل حال
نادر: اريد اشوفج لازم نحجي ونتفاهم
نواره: اكيد ماقبل شلون اطلع وياك مايصير
نادر: يعني وياي ماطلعين بس ويه احد ثاني اطلعين
نواره: جمدت بمكاني من كلي هيج بس لا شايفنه اني وبكر
نادر: اشو سكتي انصدمتي مو!! راح ادزلج صور شوفيهن راح يعجبنج........

وللحكايه بقايه😉
ادري البارت مو كلش طويل بس بيه حمى ومريضه حيل ومصخنه وكوه كتبت مادري شنو سالفة الحمى هليام. بدت الاحداث تسخن بلقصه ويه الصخونه مالتي هههههه انتظروني بأحداث احلى ومشوقه اكثر احبكم