قلوب_ حائره

البارت الخامس

نواره: طبيت للمطبخ لكيت اخو نهال يمنه اسمه نادر انسان كلش طيب وحباب بس الخلل بيه مو بي كلبي بطل يدك لأحد نهائيا. ومدام كلبي مادك اله مستحيل اوافق اتزوجه. طبيت كلت السلام عليكم
نادر: وعليكم السلام. شونج نواره او ام قند ههههه . للكاتبه نبراس الخالدي
نواره: ابتسمت عادي نفس الشي ماعندي فرق. خطيه يحاول يلطف الجو بس مدا اتقبل احد بحياتي كلما اشوف احد اشوف جمال بي فبسرعه يطلع من نفسي. بدينه انصب غده اني وماما. وهو كعد ويه بابا يمنه بلمطبخ ع ميز الطعام ويسولفون احنه مطبخنه جبير كلش. اكلج ماما
ام نزار: هاا ماما كولي
نواره: هذا شعنده هنا
ام نزار: اجه يشوف نهال جان مسافر
نواره: امممم فكرت ابالي لعد شلون من اجت نهال من اهلهه كالت يريد يخطبني. كتلهه الله يثخن اللبن
نهال: هاا حبيباتي تاخرت عليجن جنت اصلي
ام نزار: لا ماعدنه شي ماماتي
نواره: باوعتلهه وكتلهه تدرين بخوج هنا؟
نهال: اي اجه قبل نص ساعه.
نواره: وين جان مسافر اخوج؟ وضليت مركزه عليهه واباوعلهه بنضرة شك
نهال: هااا جان مسافر بتركيا
نواره: شكد صارله. للكاتبه نبراس الخالدي
نهال: هههههه شنو تحقيق يله خطيه كتلهم الجوع
نواره:طبعا احنه من نحجي نبسبس بصوت ناصي. اوك بس كلت بكلبي والله اذا مسويه فلم اطيح حضج. احس كوه دا تقربني منه. صبينه غده وبلشنه نتغده ويسولفون بس اني ماسولفت حسيت نفسي مامرتاحه مجرد اجاوب ع كد السؤال وضليت اوكل بقنوده في سبيل محد يحجي وياي. كملت وكومت قنوده بحجة اكوم اغسللهه وطفرت لغرفتي ضليت بغرفتي شغلت التلفزيون لقنوده ع طيور الجنه واني ضليت العب بتلفوني.جان اطب امي
ام نزار: شبيج يمه طفرتي لغرفتج دنزلي ساعدي مرت اخوج بلماعين
نواره: متاكده علمود الماعين. كليلهه خلي تعوفهن من يروح اخوهه اطلع اغسلهن كلهن
ام نزار: وقابل نادر مضايقج
نواره: ماما رحمه لاهلج عوفيني. اريد انام راسي يوجعني
ام نزار: همداج مو صوجج
نواره: اف شنو من قهر هذا عبالهم تعبر عليه. عفت قنوده تباوع تلفزيون ونمت.
اعرفكم ع نفسي اني نادر عمري ٣٠سنه عندي مضخر مال ادويه ومستلزمات طبيه اصير اخو نهال مرت اخو نواره. مواصفاتي طويل وجسمي متروس بس مو سمين ولحيه خفيفه يعني ينطلع بيه بلكي اعجب نواره. طبعا نواره شالعه كلبي بعرس نهال شفتهه شنو من ادب وجمال ونزاكه وبيهه جاذبيه عجيبه اول مشفتهه حبيتهه فاتحت نهال ببداية زواجهه ان اريد اخطبهه حجتلي كلشي عنهه وشكد جانت متأذيه بزواجهه حيل ضجت معقوله هذا الجمال يتأذه ويبجي دعيت الله تصير من قسمتي واعيشهه ايام احلى من الاحلام بس هي من تشوفني مجرد ترد السلام وتبتسم وهاهيه هذا الي بيني وبينهه حاولت اتقرب منهه من زواج نهال لسه بس قافله بصراحه عجبتني اكثر احب البنيه الصعبه. رجعت حاجيت نهال مره ثانيه قبل كم يوم من جانت يمنه كالت متقبل تتزوج بعدين كالت عندي فكره راح اكللهه انت تريد تخطبهه بس حاول تتقرب منهه حتى من تتقرب منهه متفكر انت تريد علاقه وكذا وكالت كم يوم تعال علينه وراح اكللهم جنت امسافر وصارلك هواي ماشايفني حتى محد ينتبه اني وافقتهه الرأي كلت عسى وان تنجح الخطه بس لمن جيت ماشفتهه ضليت كاعد احجي ويه ابوهه وامهه وعيني ع الباب كلساع اكول هسه تجي وماكو طك كلبي وره نص ساعه طبت الشمعه مالتي فدوه تلمع وكلهه نزاكه سلمت عليهه وحبيت الطف الجو بس هي نفس ابتسامتهه ومجرد ردت السلام وسحبت نفسهه وراحت تصب غده ويه امهه وبعدهه بدينه نتغده وهي مدنكه توكل ابتهه ومتحجي بس اذا احد سألهه واني محجيت وياهه مردت احرج نفسي بس فرحان لان هي قريبه عليه واشوفهه كدامي بعدين خلصت لبنتهه وطفرت بعد ماشفتهه اشرت لنهال كتلهه وين راحت كالت عوفهه براحتهه ماريد اروحلهه خاف تشك كتلهه اوك شويه كعدت ورجعت للبيت بس كلبي طاير لان شفتهه بعدهه لفيت راسي ونمت مابيه ارجع للمضخر.
بكر: تفكيري بنواره خبلني تاكل وتشرب وياي احس وين ماروح ابالي ووصيت نور ماتتصل عليهه هواي لان عيب. مر اسبوع من عرفت بيهه مزوجه كمت من اروح اخذ نور من الروضه او من اوصلهه ماتاخر مجرد اخذهه وطلع صار سبوع ماشايفهه ولا سامع صوتهه احس نفسي مخنوك اي حبيتهه مو بيدي. رحت للدوام كعدت ع مكتبي اجت موظفه وياي
ندى: هلو بكر شونك
بكر: هلو ست ندى. للكاتبه نبراس الخالدي
ندى: كم مره كتلك ناديني ندى وبس
بكر: تحجي وتتماوع واني روحي طافره اباوعلهه واقارن بينهه وبين نواره ذيج ثكل وادب وهاي متاكد أي شي اطلبه منهه تسوي بعدين كلت اني من كل عقلي دا اقارن اصلا ماكو وجه للمقارنه.
ندى: بكر بكر يمعود وين رحت
بكر: هاا وياج
ندى: وين وياي الشاغل بالك عيني
بكر: كولي رايده شي
ندى: شنو رأيك نروح نتغده بره اليوم
بكر: لا ماكدر لازم تروح اجيب نور من الروضه
ندى: اوك ع راحتك من تفرغ خابرني ونطلع
بكر: ضاجت وطلعت. طبج مرض شنو لزكه. صار وكت طلعة نور رحت للروضه شفت بعدهم ماطالعين ضليت واكف انتظر.
نواره: طلعت للدوام بس احس جسمي متكسر وراسي يوجعني اخذت براسيتول وضليت الدوام كله دايخه ومو ع بعضي صار نهاية الدوام واكفه بلحديقه مال الروضه انتظر الخط وماحسيت ع نفسي وكعت.
نور: جنت طالعه لبابا وشفت ست نواره وكعت اجيت اركض عليهه وابجي عبالي ماتت مثل ماما وصحت المديره والمعلمات كالن خلي نشوف سياره ناخذهه للمستشفى كتلهن بابا واكف بره هو ياخذهه ورحت اركض اصيحه وابجي
بكر: كاعد بلسياره واشوف اجت نور تصيح بابا وتبجي تخبلت هاي شبيهه نزلت ركضت عليهه. شبيج بابا
نور: بابا ست نواره ماتت... للكاتبه نبراس الخالدي

وللحكايه بقايه😉