قلوب_ حائره

الجزء العاشر

نواره: شنو من صور؟ بس جسمي كله يرجف من الخوف موقف لا احسد عليه اهلي كلهم اجو ابالي وبين عيوني مابقت قطرة دم بيه
نادر: روحي شوفيهن وانتي تعرفين وارجعي انتظرج
نواره: سديته منه واريد افتح الصور اديه يرجفن كوه اتجرأت وفتحتهن وتفاجأت ونصدمت صور واني دا انزل من سيارة بكر واني دا اصعد جمدت بمكاني من الخوف حتى دموعي نشفن رجع دك عليه واني ارجف
نادر: بلا ماتحجين اي شي رغم السويتي لسه رايدج وافقي وانسه الموضوع حتى تعرفين شكد احبج ومشتريج
نواره: صرت كوه اخذ النفس من كلي هيج دموعي نزلن عشره عشره دا يستغلني هو هذا الي جنت اكول عليه خوش انسان دا يستغلني واكيد هسه اخذ عني نظره مو حلوه. ضليت ساكته ماحجيت اصلا ماعرف شحجي.
نزار: فكري وكليلي واصلا ماكو شي تفكرين بي كم يوم وتنطيني خبر يمته اجيب اهلي اوك باي يحلوه.
نواره: سده واني مصدومه شسوي يربي هذا حتلو اوافق بي راح يكون ماخذ عني فكره مو حلوه راح يذلني اوووف مروتك ربي ساعدني ماعندي غيرك احد يوكفلي. ضليت ابجي لحد منمت. كعدت الصبح لكيت امي وابويه
ام نادر: تعالي يمه تريكي
نواره: ماشتهي اريد اطلع تأخرت. طلعت للدوام واني راسي احسه يريد يطك شسوي يربي اكول لبكر احسن..... لا ماكله افرض كلي شعليه اني وهو اصلا مامبين كلش بلصور وصلت للدوام حسبه توديني وحسبه تجيبني وكلساع دموعي يخونني وينزلن اجتني نور
نور: شونج ست
نواره: هلو حبيبتي
نور: شبيج ست تبجين
نواره: مابيه شي بس راسي يوجعني روحي حبيبتي العبي ويه صديقاتج.
نور: اوك ست باي
نواره: كملت الدوام وطلعت واني بغير عالم اليحاجيني اضل اسويله اي اي وماعرف شيحجي رجعت للبيت كبل لغرفتي حتى ماسألت ع قنوده.
بكر: رحت اجيب نور من الروضه شفتهه من طلعت مارفعت راسهه ولا باوعتلي كلش ضجت رغم اني قريب عليهه اجت نور
نور: هلو بابا حبيبي
بكر: هلو حبيبة بابا شونه الدوام
نور: حلو بس ضايجه ع ست نواره
بكر: ليش شبيهه رجف كلبي
نور: شفتهه كاعده بلحديقه وتبجي
بكر: معقوله لسه زعلانه مني لان صحت بيهه لا مامعقوله. زين باباتي هم عرفتي ليش تبجي
نور: كالتلي راسي يوجعني
بكر: اكيد شي صاير كلبي نغزني عليهه والله الي يرشهه بمي ارشه دم ضليت احوص بس ماكدر اخابرهه رجعت للبيت تغديت وضليت افكر خاف بيهه شي خاف احد مسهه بحجايه اوووف ربي..
نواره: مر اسبوع ع مخابرتنه اني ونادر بس الخوف والقلق نفسه ويوميه اشوف بكر واكف يم الروضه يجي ياخذ نور بس احسه عبالك ينتظر يشوفني ومن اشوفه اكول طبعا هو شهامه عايش حياته واني الي وكعت بيهه. ذبلت حيل بهذا الاسبوع لا اكل ولا اشرب ونفسيتي زباله ماريد اعيد نفس المعاناة نفسهه الي عشتهه ويه جمال وماريد اهلي يعرفون بطلعتي ويه بكر ويفهموني غلط اني وياه هواي شغلات ابالي والم بصدري كأن كابس ع نفسي وصرت عصبيه ع ابسط الامور اتعصب واصيح. نومت قنوده بليل ودك تلفوني نادر دا يتصل كمشت كلبي دموعي نزلن وحدهن كوه جاوبت الووو
نادر: هاا يحلوه يمته نجي اني واهلي
نواره: سكتت ماحجيت مدا اكدر انطقهه
نادر: شبيج ساكته انتي اكيد ماتريدين تنفضحين مو
نواره: اني انخدعت بيك توقعتك خوش انسان
نادر: قابل طلعت مثلج ادك دروب
نواره: ماسمحلك اني مسويت شي غلط لاتتجاوز
نادر: عموما اني باجر اجيب امي واجي اريدج تطلعين حلوه اوك باي
نواره: اخ يكلبي انهاريت من البجي كم اشهك مكدرت انام للصبح لعبت نفسي منه يمكن لو جايني بأسلوب احسن من هيج جان يمكن ملعبت نفسي منه هيج كمت اكرهه ماطيقه باوعت الساعه ب٧ واني منايمه وعيوني مورمه كمت غسلت وبدلت وحاولت اخفي الورم بلمكياج بس خفيف كلعاده طلعت للدوام . شفت بكر واكف بلسياره دا يباوعلي واني كوه كامشه نفسي رحت عليه وكفت كباله واني كلبي نار بنفسي ياخذني بحضنه ويساعدني وبنفس الوقت اريد اطلع نار الله كلهه بي ماكو احد كدامي غيره
بكر: وصلت نور وشفت خطهه وكف ضليت واكف اباوعلهه حيل مشتاقلهه وصلت لباب الروضه ورجعت اجت عليه تفاجأت وفرحت وصلت يمي ضلت تباوعلي بس حيل تعبانه مبين عليهه ومو طبيعيه كتلهه صباح الخير
نواره: وينه الخير بس كلي
بكر: شبيج نواره شكو
نواره: ياريتني ماطلعت وياك ذاك اليوم ولا شفتك
بكر: نصدمت من هيج كلتلي توقعت غير حجي منهه. فهميني شكو
نواره: كمت ابجي ماتحملت بكر راح ادمر
بكر: من شفت دموعهه ومهزوزه احس نهد حيلي نسيت حتى احنه واكفين بلشارع. فدوه لاتبجين بس فهميني شكو؟ بعلي مايطلعله صبح الي يأذيج بس احجيلي شكو
نواره:تذكرت احنه بلشارع ضليت اتلفت منا ومنا هو انتبه عليه
بكر: روحي اخذي اجازه وتعالي نروح فد مكان واحجيلي كلشي
نواره: يعني تريدني اعيد الغلط السويته
بكر: غلط؟ انتي ماسويتي شي غلط نواره
نواره: شفت هي الوضعيه تعبانه وهو ملجأي الوحيد الموضوع يستاهل اجازف كتله اطلب اجازه واجيك
بكر: ماشي منتظرج بلسياره بس راح اوكف مسافه حتى محد ينتبه اوك
نواره: اوك. رحت طلبت اجازه وطلعت اتمشيت شويه لكيته واكف بلفرع باوعت منا ومنا كلت خاف نادر مراقبني كلبي وجعي وخفت من ذكرته صعدت وياه طلع بلسياره. احنه وين رايحين
بكر: بكيفج المكان الي يريحج
نواره: ماريد مكان عام خاف احد يشوفنه
بكر: راح اكلج شي بس متفهميني غلط
نواره: حسيته خايف عليه حسيت كاعده من صدك ويه رجال يعتمد عليه رغم بعدني محجيتله اي شي بس اول مره انتبه عليه وباوع لكل تفصيل بي شكله رجولي وجسمه يخبل وعطره فضيع تارس السياره
بكر: شفتهه تباوعلي فرحت ومركزه عليه وهي بعالم ثاني حاجيتهه ماردت ردت احرجهه بس كلت خطيه. نواره وياي دا احاجيج
نواره: هاا اي كول
بكر: كتلج ماريد تفهميني غلط
نواره: لا مافهمك كول
بكر: احسن شي نروح لبيتي الثاني اني ساده غير ذاك بيتنه الكاعدين بي ائمن حتى نسولف براحتنه
نواره: بس بكر ميصير
بكر: نواره لخاطر الله ثقي بيه شتشوفيني اني من النوع الي يدور سوالف تعبانه لو ممكن أذيج
نواره: استسلمت ماعندي غير حل كتله اوك بس فدوه مانتأخر
بكر: ماشي الطريق كله ساكته ماحجت بس مهمومه مبين عليهه ياترى شنو الموضوع الي هيج مسوي بيهه ومذبلهه وصلنه نزلنه فتحت الباب
نواره: فتح الباب اني جمدت بمكاني متردده ادخل
بكر: نواره طبي شبيج
نواره: طبيت للصاله كعدت بيت مرتب وحلو وملموم بس بي تراب لان متروك ضليت اباوع للبيت ومرتبكه
بكر: سديت الباب ورجعتلهه لكيتهه بلصاله كاعده اباوع لأديهه ترجف كعدت بصفهه كتلهه نواره لاتتوقعين فد يوم اأذيج امني من ناحيتي انتي صرتي قطعه من كلبي الله شاهد عليه
نواره: ضليت صافنه عليه معقوله هلكد يحبني
بكر: يله احجيلي شكو شصاير
نواره: فجأه تذكرت وكمت ابجي وسولفتله كلشي
بكر: وليش ماكتيلي مو رقمي عندج مو يوميه كدامج ليش متحمله وحدج والخلقج امحي اذا ايمس شعره منج انتي اليه وماتصيرين لغيري وفنه اذا حجه كلمه لأهلج
نواره: انهاريت بلبجي صار عصبي وكام يصيح ويغلط ع نادر خفت حيل
بكر: كمت اصيح ماكدرت اتمالك اعصابي ماتخيلهه تصير لغيري او أحد يأذيهه كامت تبجي حيل وتشهك ماتحملت شفتهه هيج. حبيبي لاتبجين لخاطري فدوه اروحلج اني اسف عليت صوتي كعدت بصفهه واخذتهه بحضني اوووف يانواره اخذتي روحي وكلبي وعقلي
نواره: حضني حسيت بأمان مو طبيعي بعمري ماحاسته بادلته الحضن ماريده يعوفني خليني بحضنه نسيت الدنيه
بكر: من بادلتني الحضن فرحت يعني هم تحبني والله يانواره مستعد احارب الدنيه كلهه ع مودج واريد اشوف يا كو...د يوصلج.
نواره: حاضني وساكتين بس كلوبنه ودكاتهه تحجي وجان نسمع الباب تندك قوي طفرت من مكاني.....

وللحكايه بقايه😉