قلوب_ حائره

البارت الحادي عشر

نواره: سمعنه الباب تندك طفرت ع حيلي كمت ارجف. بكر منو الي دا يدك
بكر: تفاجأت محد يندل هذا البيت ولا احد يعرف اني هنا. مادري لاتخافين حبيبي خاف احد من الجوارين ابقي هنا لا اطلعين
نواره: احس مابقت قطرة دم بيه كلبي يكلي راح تصير مصيبه ضليت واكفه بمكاني متحركت
بكر: طلعت للباب فتحتهه نصدمت شفت اخو نواره وابوهه وواحد وياهم يمكن الي كالت عليه نادر. اهلا عمي
ابو نزار: صيح نواره بسرعه منريد فضايح
هيثم: شنو يصيحهه اليوم ادفنهه هنا هي وياه
بكر: ابوهه جان هادئ كأن الهدوء ماقبل العاصفه وجوهم ماتتفسر والحق وياهم كتلهم عمي شتسوي نواره هنا 
هيثم: لاتسوي نفسك متدري وينهه اليوم احركم وعلي
بكر: دفعني اخوهه وطب حيل خفت ع نواره خاف يأذوهه
نواره: من سمعت صوتهم جسمي كله كام يرجف حسيت بخوف عمري ماحاسته فعلا الموقف صعب كلش اكو ميز طعام كبالي وعليه جرجف طبيت جواه وصار الجرجف فوكاي يعني بعد مابين بس من الخوف جسمي كله ينفض وحتى سنوني يطكطكن وحاطه ايدي ع حلكي حتى ماسوي صوت.
بكر: طبيت وراه للبيت افتر البيت كله واجه يطب للصاله كتله هيثم اسمعني دفعني وفتح الباب
بكر: كمت ابالع ودمي نشف مو خوف ع نفسي بس خايف عليهه ماراح يرحموهه ابد طب للصاله باوعنه منا ومنا فارغه مابيهه احد تفاجأت هذه وين راحت حتى هو تفاجأ توقع يلكاهه باوعلي
هيثم: وين نواره وين وديتهه
نواره: سمعت باب الصاله انفتح كطعت حتى النفس خاف يحس عليه بس منتهيه من الخوف.
بكر: حسيت نفسي سيطرت كتله شمدريني وينهه دفعني وطلع طلعت وراه
ابو نزار: وين اختك هيثم
هيثم: بويه ماموجوده
نادر: شنو ماموجوده اني شفتهه طبت بعيني
بكر: باوعتله بشمئزاز الضاهر متوهم انت اجيت وحدي. باوعت لعمي مبين كوه كامش نفسه كتله عمي لاتتوقع انسوي شي ممكن يأذيكم اني احترمكم واقدركم وداعت بنتي خاف شو وين طلعت جوز هسه تلكاهه بلبيت
ابو نزار: يصير خير ابني يصير خير
بكر: باوعلي وكلي يصير خير بس مبين ممصدكني
هيثم: اذا عرفت اكو بينكم شي اذبحكم ع القبله
بكر: ماحاجيته كل الحق وياهم مو شي هين بس بالي كله يم نواره يمكن هسه وكف كلبهه من الخوف بس اريدهم يروحون حتى اشوفهه وينهه. شفتهم راحو طبيت وقفلت الباب الخارجيه ورحت اركض صحت نواره وينج راحو لاتخافين
نواره: سمعته صاح نواره وكلي راحو طلعت اركض ودموعي تجري من الخوف رحت حضنته
بكر: اجت تركض حضنتني مثل الطفل وترجف من الخوف. طبطبت عليهه اشش لاتخافين اني موجود
نواره: بكر شلون والله ايذبحوني شلون ارجع للبيت وابجي
بكر: تعالي اكعدي وارتاحي خلي اجيبلج مي
نواره: لاتروح ماريد ابقه يمي
بكر: مجلبه بيه متقبل تعوفني هذا المي ماعوفج والله وكمشت وجهه بديني وباوعت بعيونهه ماعوفج للموت لو اعرف انطي روحي بس ماخليهم يمسون شعره منج لاتخافين
نواره: من كلي هيج شويه هديت وهمزيت براسى بمعني اوك
بكر: رحت جبتلهه مي شربت. كومي حبيبي غسلي وتعالي
نواره: كمت غسلت ورجعت يمه شويه هديت وخف الخوف كتله شلون شنسوي هسه
بكر: ماخليج ترجعين لبيتكم اخاف عليج خاف يأذوج
نواره: عزززه العزاني لعد شلون ابقه هنا مراح يسكتون اذا حسو راح يأذوك
بكر: لا متبقين هنا اغير مكانج ونعقد واني اخذ اجازه واكول لأمي اني مسافر عندي شغل فتره علما تهده الاوضاع ونرجع وانتي مرتي ميكدرون يسوون شي بعد
نواره: انت شعبالك هي بلحجي والله ميسكتون يكلبون الدنيه
بكر: منبقه هنا نروح لغير محافظه جان سافرنه بس جواز ماعندج
نواره: وبنتي شلون افاركهه ماكدر افاركهه لحظه اموت بدونهه
بكر: فتره اتحملي لعد اعوفهم يذبحوج لو يأذوج وخصوصا هذا الحقير الي اسمه نادر مشوفهم صورج وانتي دا تصعدين وياي
نواره: اني شفت الصور انت ممبين لان سيارتك مضلله وانت مانزلت بوقتهه جان شوفتك الصور بس من الخوف مسحتهن وره مدزلياهن
بكر: صدكيني ماكو غير حل
نواره: فعلا ماكو غير حل كلت بكلبي اوووف يانواره وين وصلتي وشراح يصير بيج شلون راح تتحملين افراك بنتك ماكو غير اوافق بكر ونشوف شراح يصير
بكر: انتي هسه ابقي هنا خلي اروح اوصل نور للبيت وارجعلج
نواره: لا فدوه لتروح وتعوفني خاف يجون وراك لا فدوه ابقه يمي
بكر: اوكفي لحظه خلي اخابر دكيت ع صديقي وياي بلدوام بس علاقتي كلش قويه بيه  هلو احمد شونك
احمد: الغالي ابو نور انت شونك ليش ممداوم اليوم
بكر: صار عندي شغل اكلك خويه محتاج منك كم شغله
احمد: انت تؤمرني ابو نور
بكر: انت مرتك كتلي جابت ويم اهلهه مو وبيتك فارغ
احمد: اي ليش
بكر: محتاح بيتك فد يومين بس مو البالك والله
احمد: انت شتعرفني قابل ارفضلك طلب وقابل ماعرف اخلاقك
بكر: بعد كلبي بس الحجي بينه ماريد احد يعرف ولا حتى مرتك واني من اشوفك اسولفلك
احمد: ماشي حبيبي اني حطلب اجازه هسه واطلع انتظرك بلبيت
بكر: اي واريد منك شغله ثانيه
احمد: اي اؤمرني
بكر: انت تندل روضه نور بنتي اريدك توديهه للبيت
احمد: اي اندلهه لعد راح اخذهه اوديهه وبعدين اروح للبيت انتظرك
بكر: مانسالك هذا الفضل
احمد: ازعل منج والله احنه اخوه يله خلي الحك اطلع
بكر: سمعتي كل الحجي مو
نواره: اي بس شسوي بلبيت مالته
بكر: ماكدر ابقيج هنا خاف مراقبيني شويه ونطلع من الباب الخلفيه نروح بتكسي خلي سيارتي تبقه هنا ونروح لبيت صديقي تبقين هناك علما باجر اخذ اجازه شهر حتلو بدون راتب وارجعلج حتى نروح لبغداد عدنه بيت جدي هناك فارغ اوك
نواره: مابيدي شي اسوي كتله اوك
بكر: نواره ثقي بيه صدكيني ماكو غير حل اموت ولا يأذوج علما تهده الاوضاع
نواره: ماشي. وره ساعه طلعنه لبيت صديقه لكيناه منتظرنه تفاجأ من شافني
بكر: طبي جوه هسه اجي.
نواره: طبيت جوه البيت مرتب وصغير كعدت بلمطبخ انتظر بكر
احمد: شكو بكر منو هذه
بكر: مرتي هذه
احمد: مرتك؟؟؟ يمته تزوجت
بكر: احبهه واهلهه رادو يزوجوهه وشردت من اهلهه وعقدنه البارحه وعلما اخذ اجازه ونسافر. تقصدت كتله نسافر وماردت احجيله الموضوع لضبط خاف ياخذ فكره غلط وماريد احد يعرف اني بلعراق ولا حتى هو الاحتياط واجب.
احمد: انت كل عقلك توكع نفسك بهيج مصيبه
بكر: احبهه ماكدر اتخلى عنهه ماراح انثقل عليك هنه يومين ونروح
احمد: انت تخبلت بابا هذا بيتك ابقه شكد متريد
بكر: ماتقصر حبيبي.
احمد: يله اني اترخص وتره امك سألت عليك من وصلت بنتك كتلهه عنده شغل
بكر: اي عاشت ايدك الله وياك. طبيت جوه لكيتهه كاعده وتبجي لخاطر الله كافي بجي مروتج اخذتهه بحضني اني يمج صدكيني فتره وكلشي ينحل انشالله طبعا احجي واني مامقتنع بكلامي بس شسوي اريد اهديهه
نواره: انشالله وتره غلقت تلفوني كلت خاف يدكون
بكر: اي زين سويتي انتي اخذي راحتج راح اروح للبيت اخذ السياره واروح اشوف امي ونور واكللهم راح اسافر اليوم وماتاخر وارجعلج لاتخافين البيت امان واقفلي الباب وانتظريني وهاج هذا تلفوني الثاني بقي يمج اوك بستهه براسهه وطلعت.
نواره: راح وقفلت الباب وراه ضليت افتر بلبيت اشوفه مددت ع القنفه بلهول ونمت بدون مادري.
بكر: رحت للبيت حتى اخذ السياره رجعت من الباب الخلفيه كلت خاف احد منهم مراقبني احتياط قفلت البيت وطلعت بلسياره رحت للبيت اشوف امي وصلت للباب هستوني نزلت جان اشوف نزار وهيثم وراي....

وللحكايه بقايه😉