قلوب_ حائره

البارت السادس

بكر: من كلتلي هيج احس رجليه ماتن والساني انشل واريد اخذ نفس ماكدر ميت شغله اجت ابالي رحت اركض طبيت لكيتهه متمدده بلحديقه ويحاول يكعدن بيهه المعلمات وماكو نفس تخبلت كتلهن شبيهه كالن ماندري وكعت وحدهه شلتهه ورحت اركض للسياره نومتهه ليوره واخذت نور بسرعه وسقت كل سرعتي للمستشفى طبيت شايلهه صحت للممرضات خليناهه ع السديه شدولهه كانونه وحطولهه مغذي وضربوهه ابر اباوعلهه وجهه اصفر ادعي بداخلي واكول ربي مروتك كون مابيهه شي بعدين كالت الدكتوره عدهه هبوط حاد بضغطهه طمنتني. بلحظه نسيت هي مزوجه ونسيت حتى الناس ثنيت بلكاع وكمشت ايدهه واباوعلهه اريدهه تفتح شفت نور واكفه ع صفحه وتبجي كتلهه شبيج بابا  . للكاتبه نبراس الخالدي
نور: بابا ست نواره ماتت مو
بكر: لا حبيبتي هي مريضه شويه مابيهه شي تعالي حضنتهه واهدي بيهه كسرت كلبي متوقعتهه هلكد تحب نواره رجعت التفت ع نواره حسيت عليهه بدت تفتح
نواره: اني وين
بكر: لاتخافين انتي بلمستشفى مابيج شي بس ضغطج هبط
نواره: انت منو . احس راسي يريد يطك احس نفسي بين الصاحيه وبين المغمه عليه
بكر: اني بكر ابو نور تذكرتيني
نواره: اي تذكرتك ضليت صافنه بعيونه ومبين الخوف عليه جان يدك تلفوني طلعته لكيت ١٦ مكالمه والساعه ب٢ ونص والمفروض اطلع ب١٢ ونص من الدوام جاوبت الووو هاا بابا
ابو نزار: هاا نواره وينج بويه شو تاخرتي
نواره: بابا تخربطت بلروضه وجابوني للمستشفى
ابو نزار: يله جاين عليج
ام نزار: يمه بنيتي وين كلي شبيهه
ابو نزار: اهدي يامره متخربطه بلروضه وماخذيهه للمستشفى يله كومي خلي نروحلهه
ام نزار: يمه سوده عليه كلبي حس بيهه شي. خلي اجيب عباتي
نهال: عمو خلي اكعد هيثم يروح وياكم
ابو نزار: لا بنتي ماكو داعي. وينج يامره فضيهه
ام نزار: اي اجيت يله امشينه
هيثم: هاا وين رايحين خير
ابو نزار: اختك متخربطه بلدوام وماخذيهه  للمستشفى
هيثم: غير تكعدوني يله ابدل بسرعه اروح وياكم
ابو نزار: بويه تأخرنه فضهه بسرعه
ام نزار: يله يمه كلبي طك ع اختك
هيثم: يله امشولنه خلصت
بكر: ضليت مركز بعيونهه واحجي بكلبي معقوله طلعتي قسمة غيري تمنيتج ام بيتي والله اوووف بس يمكن الله مارايد. جان يدك تلفونهه يمكن اهلهه مدري رجلهه عفتهه وكمت دكيت ع البيت طمنتهم نور وياي ورحت للكافتريا جبتلهه عصير ورجعت هاا شون صرتي؟
نواره: ماعرف شلون اشكرك تعبتك وياي
بكر: تحجي بنزاكه وتتهرب من عيوني يمكن فاضحاتني
نواره: احجي وياه بس اتهرب من عيونه مادري شلون يباوعلي حبيت نظرة الخوف عليه ونظره ثانيه مافهمتهه
بكر: ماسويت شي تعبج راحه اهم شي تكونين بخير وزينه
نواره: خجلت من كلي هيج احسه يريد ياكلني بعيونه. شويه وجوي امي وابويه وهيثم
ابو نزار. هيثم: السلام عليكم
ام نزار: يمه بنيتي شبيج شيوجعج
بكر: وعليكم السلام
نواره: ماما مابيه شي صرت زينه. بابا هذا بكر ابو نور طالبه عندي هو جابني للمستشفى من جان مغمى عليه. وهذا بابا وماما وميثم اخويه
ابو نزار: مشكور ابني تعبناك ويانه ماننسه فضلك   . للكاتبه نبراس الخالدي
هيثم: مشكور خويه
بكر: سلمت عليهم ماسويت غير واجبي ماكو داعي للشكر. يله اني اترخص. حمدلله ع سلامتج ست نواره
نواره: تسلم وشكرا مره ثانيه وبتسمت بادلني ببتسامه خفيفه
ابو نزار: امشي ويانه نضيفكم بلبيت وتغده وروح
بكر: والنعم منكم ماتقصرون. سلمت عليهم واخذت نور ورحت مبين عليهم عائله محافضه وخوش ناس بس اشو زوجهه ماكو جوز بلدوام.
نواره: ضليت استرق النضر وهو يحجي ويه اهلي انتبهت عليه اكثر ذيج المره مركزت عنده لحيه خفيفه وشعره بي شويه شيب بس منطي جمال وجاذبيه وجسمه رياضي سرحت بي وامي تحجي وياي واني مو يمهه بس اكللهه اي واي بس بالي مو وياهه. واحس هو يسترق النظر اليه بس من ايباوعلي ابعد نظري عنه. بعدهه سلم علينه وبوست نور وراحو. بعدهه رجعنه للبيت لكيت خطيه نهال منومه قنوده يمهه لان كايمه تبجي لان لا امي ولا اني بلبيت صعدت لغرفتي بدلت
نهال: حبي خلي اصبلج غده اكلي شويه
نواره: ماشتهي راس يوجعني خلي انام
نهال: ماشي براحتج من تكعدين اكلي. وقنوده عوفيهه نايمه يمي ونامي ورتاحي
نواره: ماشي يسلمو حبيبتي تعبتج
نهال: يمعوده قابل شسويت يله خلي اروح اصب غده خطيه كلهم ماتغدو ضلو قلقين عليج. وامج وابوج كلساع تجي شغله ع بالهم ساعه يكولون نخطفت ساعه يكولون ضربتهه سياره هههههه خطيه
نواره: هههههه الحمدلله مابيه شي
نهال: يله نامي دوختج باي
نواره: حطيت راسي ع المخده اجه بكر ابالي تذكرت اول مفتحت عيوني ولكيته كبالي وخوفه عليه واضح بعيونه حاول يخفي بكل الطرق بس مكدر ضليت افكر لحد منمت
بكر: رجعنه للبيت سولفت لأمي اصلا ماضم عليهه شي واني الوحيد الهه ماكو لا اخوه ولا خوات وابوي رجال جبير متقاعد
ام بكر: خطيه وهسه شلون صارت
بكر: صارت احسن
ام بكر: اي الحمدلله يله كعدو خلي اصبلكم غده. للكاتبه نبراس الخالدي
بكر: صحت نور وكعدنه نتغده 
نور: اني ماريد اكل😔
بكر: ليش بابا متردين
نور: ست نواره مريضه واني ضايجه عليهه
بكر: لا حبيبتي مابيهه شي صارت زينه
نور: معليه ماريد
بكر: زين كومي خابريهه حتى تتأكدين وحتى تتغدين
نور: اي خلي اجيب التلفون
بكر: راحت تركض تجيب التلفون وفرحت من كتلهه خابريهه
ام بكر: يمه بنتك حيل متعلقه بمعلمتهه وتحبهه
بكر: اي يمنه ادري ولو تشوفين شكد بجت عليهه بلمستشفى
ام بكر: خوش بنيه نواره
بكر: اي يمه ادب واخلاق وكلشي. اجت نور ضايجه
بكر: هاا بابا دكيتي
نور: ادك ومتجاوب
بكر: بابا عوفيهه خاف نايمه عيب
نور: بس هلمره ادك اذا مجاوبت بعد مادك
بكر: يله دكي
نواره: حسيت ع التلفون يدك واني نايمه. جاوبت كبل بدون ماشوف الرقم. الووو بصوت منعس
نور: هلو ست شون صرتي
بكر: وهي تحجي فتحت السبيكر حتى اسمع
نواره: هلو نور حبيبتي صرت احسن
نور: ست ماتغديت ضايجه عليج
نواره: لا حبيبتي لازم تاكلين مابيه شي ماشي
نور: ماشي ست راح اكل
نواره: عفيه بلورده يله روحي اكلي زين
نور: ماشي ست بيباي
نواره: بيباي
بكر: تحجي وياهه ومبين جانت نايمه صوتهه منعس واني مبتسم شكد حنينه وبعز مرضهه تحجي وياهه بحنيه وبأسلوب يخبل. هاا مو كتلج صارت زينه يله اكلي
نور: اي بابا جوعانه اريد اكل
بكر: شكد ملعونه هههههه
ام بكر: هههههه اكلج نور
نور: هاا بيبي
ام بكر: ست نواره هم اتزوجت بعد
نور: مادري
بكر: صفنت شنو تزوجت بعد كتلهه ليش هي مو مزوجه؟؟
ام بكر: اي بس خطيه تطلكت من ٢ ونص...للكاتبه نبراس الخالدي

وللحكايه بقايه😉
  اسفه بنات غلطت بأرقام البارتات
واريد رأيكم بلقصه واحداثه وانشالله تكون عجبتكم لحد الان.... احبكم