عمر.. كمت ماعرف شسوي ادور بشوارع وبيدي التلفون وادك عليهم اريد اعرف لكوو بس ماكووو فص ملح وذاب فقدت كعدت بالكاع وخليت ايدي على راسي وكلت ربي دخيلك رده الي سالم اباوع العالم لتمت ونثبرو اخذت نفس وكمت رحت بلاغة بس ما قبلو يتأخذون اجرأتهم لازم تمر 24 ساعه اني روحي طافره وعلى اخري زكحت بيهم لكككك تعرف ويامن تحكي انته
..هاي ياهو الجاي ويكلي تعرف ويامن تحجي شنو ابن الرئيس وانه مادري منوو يعني
..لك كواـــ اني الـ ملازم عمر عرفت اني منووو
..اا.. ا ...عذرني سيدي بس انته تعرف القوانين بس تامر انه راح انطي خبر للشباب وميصير خاطرك اله طيب
..طلعت من المركز وضليت افتر بشوارع على امل اشوف نمر كدامي بس ماكو اختفه ابني ضاع مني ضلمت الدنيه وطر اليل واني بشارع ما رجعت دك تلفوني بو موسى جاوبت بلهفه كتله هااا خويه بشرر لكيتوو
..لا ولله يخوي انه خابرتك على إمل انو تكون لكي بس واضح انته هم ماحصلت شي
..غمضت عيني وكتله بو موسى وين راح راح تخبل
..صلي على نبي خويه قابل وين يروح منه نلكا بس انته اهده هسه ورجع للبيت الحجيه ثبرت الدنيه تريدك
..كتله شلون ارجع وبني ماموجود بالبيت تريدني ارتاح وهوه ضايع صدك تحجي مارجع لحد ما الكه ابني
..خويه ارجع خلي نشوف حل ونشوف شلون راح تصفه هسه انته بشارع ادور من الضهر لليل حصلت شي ارجع خويه وربكـ راح نلكاا بس خلي نهده ونتوصل الحل معين مو مطشرين ومثبورين وكلشي ما نحصل
..سكتت شفت كلمه صح كلتله ثواني واكون يمكم
..خوش واحنه ننتظركـ
..رجعت للسياره شغلتها ورجعت للبيت وصلت للركن شفت العالم ملتمه وهوسه ناس طابه وناس طالعه طبكت السياره ونزلت العالم تحجي وياي وانه بالي مو يمهم اول مدخلت رحت على خلود ستلمته رزايل
بس فهميني انتي شلون ام ولج ما تفكدين ابنج وين ما وين لج بس فهميني هنااا كلب لو حجررر
الحجيه..وليش ترجع عليها مثل ما هو ابنها ابنكم هم وثنينكم غلط انه كم مره ومره كتله يمه رد مرتك الخاطر ابنكم ترى يضيع اذا ما ترجع مرتكـ وكتلك اذا ما ترغبها وماتريدها مرتك خليها بس تربي ابنك وتهتم بي لكن لااا عاندت ومارضيت وشفت نتيجت عنادك وين وصلنه هاي احنه مثبورين لان نمر ماكو مختفي
..سمعت كل كلمه كالتها الحجيه ويا كل كلمه دكولها اكره روحي اي اني سبب اني ضيعت ابني اني تيهته لو مرجعها ومخليها تهتم بي جان ما وصلنه الهاي الدرجه
..سماره.. لمن حجت الحجيه خفت على نمر ونقهرت عليه وخفت لان احتمال جبير راح يرجعها واذا رجعت اني راح ادمر بس كلت مو مهم اهم شي يرجع نمر وشيريد يصير خلي يصيرر كعدو الكل بصاله اباوع على عمر مثل طفل ومضيع امه تايه ومكسور ومقهور وندم واصح بعينه وكل شويه يندار على الباب يباوع لمن شفته بهاي الحاله نقهرت حيل ونكسر خاطري عليه رحت للمطبخ علمود اجيبله مي خطيه شويه علمود يهده لمن جاي اروح للمطبخ سمعت همس جوه الدرج صوت خلود وهاي الي اسمها حنون على كولت اميره هاي حنون من شكلها مبينه شيطانه وخبيثه وابد محبيتها وين متروح خلود تلحكها المهم وكفت على بايت الدرج ردت اسمع شيحجن
